Read Maltese Bible with DC – IL-BIBBJA IL-KOTBA MQADDSA BÀRUK 4 Bible Online

BÀRUK 4 - Maltese Bible with DC – IL-BIBBJA IL-KOTBA MQADDSA bible

BÀRUK 4

¹Hu ktieb il-kmandamenti ta’ Alla, hu l-Liġi li tibqa’ għal dejjem; kull min iħarsu jgħix, dawk li jħalluh imutu.

²Erġa’ lura, Ġakobb, u ilqa’ l-għerf, imxi lejn id-dija ta’ dawlu;

³titlaqx il-glorja tiegħek lil ħaddieħor, lanqas ġieħek lil ġens barrani.

⁴Hienja aħna, Iżrael, għax dak li jogħġob ’l Alla kien mgħarraf lilna.

⁵Agħmel il-qalb, poplu tiegħi, int, it-tifkira ta’ Iżrael!

⁶Kontu mibjugħa lill-ġnus, iżda mhux biex tiġu fix-xejn; kontu mogħtija f’idejn l-għedewwa, għax kebbistu l-korla ta’ Alla.

⁷Xgħeltu l-għadab ta’ min sawwarkom, għax offrejtu s-sagrifiċċju lill-allat, u mhux lil Alla.

⁸Insejtu lil Alla ta’ dejjem, lil dak li għajjixkom. Imlejtu bl-imrar lil Ġerusalemm, lil dik li rabbietkom.

⁹Għax hi rat il-korla ta’ Alla nieżel fuqkom, u qalet: “Isimgħu ġirien Sijon: Alla bagħat niket kbir fuqi,

¹⁰għax ġarrabt jasar uliedi, subien u bniet, il-jasar li fih bagħathom Alla ta’ dejjem.

¹¹Jekk it-trobbija tagħhom ferrħitni, it-tlugħ tagħhom bikkieni u qasamli qalbi.

¹²Ħadd m’għadu jifraħ bija, armla li baqgħet weħidha; kelli ħafna u telquni, għax uliedi dinbu, u daru lura mil-Liġi ta’ Alla.

¹³Il-kmandamenti tiegħu m’għarfuhomx, lanqas ma mxew fi triqat il-preċetti ta’ Alla. Lanqas ħadu l-mogħdijiet ta’ tagħlim il-ġustizzja tiegħu.

¹⁴Ħa jiġu ġirien Sijon! Ftakru fl-eżilju ta’ wliedi, subien u bniet, li ġieb fuqhom Alla ta’ dejjem.

¹⁵Għax ġie fuqhom ġens mill-bogħod, ġens kiefer, u b’ilsien barrani, ġens bla qima għax-xjuħ, ġens bla ħasra għat-trabi.

¹⁶Lill-armla ħadulha l-għeżież tagħha, ħallewni waħdi, ċaħħduni minn bnieti.

¹⁷“Imma jien kif nista’ ngħinkom?

¹⁸Dak li ġieb fuqkom dan id-deni, hu biss jista’ jeħliskom mill-għedewwa.

¹⁹Morru, uliedi, morru, jien nibqa’ hawn mitluqa waħdi.

²⁰Neħħejt minn fuqi lbies is-sliem, u xeddejt l-ixkora tal-penitenza; nibqa’ ngħajjat lil Alla ta’ dejjem, għomri kollu.

²¹Agħmlu l-qalb, uliedi, sejħu lil Alla, u hu jeħliskom mit-tirannija, minn id l-għedewwa tagħkom.

²²Jien stennejt is-salvazzjoni tagħkom mingħand Alla ta’ dejjem, u ġieni l-ferħ mingħand il-Qaddis. Minħabba l-ħniena li dalwaqt tilħaqkom mingħand Alla ta’ dejjem, is-Salvatur tagħkom.

²³Jien bgħattkom, imnikkta u mbikkija, imma Alla jreġġagħkom għal għandi, bil-hena u l-ferħ għal dejjem.

²⁴Bħalma issa ġirien Sijon raw l-eżilju, hekk għad jaraw dalwaqt is-salvazzjoni mingħand Alla tagħkom, li se tiġikom b’sebħ kbir, u bid-dija ta’ Alla ta’ dejjem.

²⁵Uliedi, stabru bil-korla ta’ Alla, li laħqitkom. Ħaqarkom l-għadu, imma dalwaqt taraw il-qerda tiegħu, u minn fuq għonqu għad tgħaddi[5].

²⁶Uliedi mħejma kellhom jgħaddu minn toroq imħarbta; ħaduhom bħal merħla maħtufa mill-għadu.

²⁷Agħmlu l-qalb, uliedi, sejħu lil Alla; dak li ġarrabkom għad jiftakar fikom.

²⁸Bħalma fittixtu titbiegħdu minn Alla hekk issa duru lejh u fittxuh b’ħerqa għaxar darbiet aqwa.

²⁹Għax dak li bagħat fuqkom dan l-hemm kollu, hekk għad isalvakom, u jimliekom b’ferħ dejjiemi.”

³⁰Agħmel il-qalb Ġerusalemm, min tak ismek għad ifarrġek.

³¹Imsejkna dawk li għamlulek id-deni, u ferħu b’waqegħtek.

³²Imsejkna l-ibliet li ijassru lil uliedek; imsejkna l-belt li ħadet lil uliedek.

³³Għax bħalma ferħet b’waqegħtek u tgħaxxqet bil-qerda tiegħek, hekk għad titnikket għall-ħerba tagħha.

³⁴Jien inneħħilha l-ferħ tal-kotra tagħha, u għaxqitha fi swied il-qalb nibdilha.

³⁵Xita ta’ nar għad tinżel fuqha mingħand Alla ta’ dejjem, għal ħafna żmien, u jgħammru fiha l-ispirti ħżiena[6] għal żmien twil.

³⁶Ħares lejn il-Lvant, Ġerusalemm, u ara l-ferħ li ġej għalik mingħand Alla.

³⁷Arahom ġejjin uliedek, li darba int bgħatt ’il bogħod; ġejjin flimkien miġbura mil-Lvant u mill-Punent, għall-kelma tal-Qaddis, kollhom ferħana bil-glorja ta’ Alla.