Read Maltese Bible with DC – IL-BIBBJA IL-KOTBA MQADDSA EŻEKJEL 1 Bible Online

EŻEKJEL 1 - Maltese Bible with DC – IL-BIBBJA IL-KOTBA MQADDSA bible

EŻEKJEL 1

¹Ġara li fis-sena tletin[1], fir-raba’ xahar, fil-ħamsa tax-xahar, kif kont fost l-itturufnati ħdejn ix-xmara Kebar, infetħu s-smewwiet u rajt viżjonijiet ta’ Alla.

²Fil-ħamsa tax-xahar, meta s-sultan Ġeħojakin kien ilu ħames snin itturufnat,

³il-kelma tal-Mulej ġiet lil Eżekjel, bin il-qassis Bużi, fl-art tal-Kaldin ħdejn ix-xmara Kebar; kien hemm li ġiet fuqu id il-Mulej.

⁴Kont qiegħed inħares, u f’daqqa waħda ħassejt riefnu ġej min-naħa tat-Tramuntana, u rajt sħaba kbira, imdawra bid-dija, u nar ileħħ il-ħin kollu minnha, u ġon-nar bħal bronż ileqq.

⁵F’nofsha kien hemm xbieha ta’ erba’ ħlejjaq ħajjin[2], li mid-dehra tagħhom kellhom is-sura ta’ bniedem.

⁶Kellhom erba’ wċuħ kull wieħed, u erba’ ġwienaħ kull wieħed.

⁷Riġlejhom riġlejn wieqfa, u qiegħ riġlejhom bħal qiegħ riġel ta’ għoġol, u kienu jiddu bħal bronż ileqq.

⁸Kellhom sura ta’ id ta’ bniedem taħt ġwenħajhom, u l-erba’ wċuħ tagħhom kienu jħarsu lejn l-erba’ naħat.

⁹Ġwenħajhom kienu jmissu wieħed mal-ieħor, u ma kinux idawru wiċċhom huma u jimxu, imma kull wieħed minnhom kien jimxi dritt ’il quddiem.

¹⁰U x-xbieha ta’ wiċċhom kienet wiċċ ta’ bniedem minn quddiem, u wiċċ ta’ ljun fuq il-lemin tagħhom l-erbgħa, u wiċċ ta’ għoġol fuq ix-xellug tagħhom l-erbgħa, u wiċċ ta’ ajkla fuq wara.

¹¹Ġwenħajhom kienu miftuħin ’il fuq; żewġ ġwienaħ kienu jmissu wieħed mal-ieħor, u żewġ ġwienaħ kienu jgħattu ’l ġisimhom;

¹²u kollha kienu jimxu dritt ’il quddiem, u kienu jmorru fejn kien imexxihom l-ispirtu, u ma kinux iduru lura huma u miexja.

¹³U f’nofs l-erba’ ħlejjaq ħajjin kien hemm bħal ġamar ta’ nar jaqbad, bħal torċi jiġġerrew qalb il-ħlejjaq ħajjin; in-nar kien jiddi, u minn ġon-nar kien ileħħ il-beraq,

¹⁴u l-ħlejjaq ħajjin kienu jżiġġu ’l hawn u ’l hemm bħall-beraq.

¹⁵U ħarist lejn dawk il-ħlejjaq ħajjin, u nara rota ħdejhom fl-art, waħda ħdejn kull wieħed minnhom l-erbgħa.

¹⁶U d-dehra tar-roti u l-għamla tagħhom kienu donnhom ħaġar ta’ Tarsis, kellhom għamla waħda, l-erbgħa li kienu, maħduma qishom imsallbin waħda ġo oħra.

¹⁷U kienu jistgħu jimxu fuq l-erba’ naħat tagħhom, bla ma jilwu huma u miexja.

¹⁸U ħarist u rajt li kellhom iċ-ċrieki, u dawn iċ-ċrieki kienu mimlija għajnejn madwarhom l-erbgħa.

¹⁹U meta l-ħlejjaq ħajjin kienu jimxu, ir-roti kienu jimxu magħhom; meta l-ħlejjaq ħajjin kienu jintrefgħu mill-art, kienu jintrefgħu wkoll ir-roti magħhom.

²⁰U kull fejn l-ispirtu kien jeħodhom kienu jimxu, u r-roti kienu jintrefgħu flimkien magħhom, għax fihom kien hemm ukoll l-ispirtu tal-ħlejjaq ħajjin.

²¹Kull meta dawn kienu jimxu, kienu jimxu r-roti wkoll; u meta kienu jieqfu, kienu jieqfu; u kull meta l-ħlejjaq kienu jintrefgħu mill-art, kienu jintrefgħu r-roti wkoll magħhom, għax l-ispirtu tal-ħlejjaq ħajjin kien fir-roti wkoll.

²²U fuq ras il-ħlejjaq ħajjin kien hemm bħal tisqifa ċara bħall-kristall mifruxa ’l fuq minn rashom.

²³Taħt din it-tisqifa ġwenħajhom kienu miftuħin wieħed lejn l-ieħor, u kull wieħed minnhom kellu żewġ ġwienaħ oħra jgħattulu ġismu.

²⁴U smajt il-ħoss ta’ ġwenħajhom bħall-ħoss ta’ ilma kotran, donnu l-leħen ta’ Alla li jista’ kollox; huma u mexjin kienu jagħmlu ħsejjes li jtarrxu, qisu l-ħoss ta’ eżerċtu, u meta jieqfu kienu jniżżlu ġwenħajhom.

²⁵Instema’ ħoss mill-għoli tas-sema mifrux fuq rashom; u meta huma waqfu niżżlu ġwenħajhom.

²⁶Fl-għoli tas-sema, mifrux fuq rashom, kien hemm bħal żaffir f’għamla ta’ tron[3], u fuq din l-għamla ta’ tron kien jidher bħal bniedem[4] bilqiegħda fuqu fl-għoli.

²⁷U rajt bħal bronż ileqq donnu nar li kien jagħlqu minn kullimkien, qisu minn ġenbejh ’il fuq; u rajt bħal nar qisu minn ġenbejh ’l isfel u dija madwaru kollu, bħal qawsalla fis-sħab meta tagħmel ix-xita; hekk kont tistħajjilha d-dija ta’ madwaru.

²⁸Hekk dehritli x-xbieha tal-glorja tal-Mulej, u malli rajtha nxtħett wiċċi fl-art. U smajt il-leħen ta’ wieħed jitkellem u jgħidli: