Read Maltese Bible with DC – IL-BIBBJA IL-KOTBA MQADDSA EŻEKJEL 10 Bible Online

EŻEKJEL 10 - Maltese Bible with DC – IL-BIBBJA IL-KOTBA MQADDSA bible

EŻEKJEL 10

¹U ħarist u rajt fuq it-tisqifa ta’ fuq ras il-kerubini bħal ħaġra taż-żaffir, donnha għamla ta’ tron, li kienet tidher fuqhom.

²U qal lir-raġel li kien liebes l-għażel: “Idħol bejn ir-roti li hemm taħt il-kerubini, u imla l-keffa ta’ jdejk b’ġamar tan-nar[31] minn bejn il-kerubini u xerrdu fuq il-belt.” U dak daħal, quddiem għajnejja.

³Meta daħal dak ir-raġel il-kerubini kienu wieqfa n-naħa tal-lemin tat-tempju, u s-sħaba kienet timla l-bitħa ta’ ġewwa.

⁴U l-glorja tal-Mulej intrefgħet minn fuq il-kerubini u marret fuq l-għatba tat-tempju; u mtela t-tempju bis-sħaba u l-bitħa mtliet bid-dija tal-glorja tal-Mulej.

⁵U l-ħoss tal-ġwienaħ tal-kerubini kien jinstama’ sa mill-bitħa ta’ barra bħal leħen ta’ Alla li jista’ kollox meta jitkellem.

⁶U ġara li malli ta l-ordni lir-raġel liebes l-għażel u qallu: “Ħu n-nar minn bejn ir-roti, minn bejn il-kerubini,” dan daħal u waqaf ħdejn ir-roti.

⁷U wieħed mill-kerubini tawwal idu minn bejn il-kerubini għal fuq in-nar li kien hemm bejn il-kerubini, ħa minnu u qiegħdu fil-keffa ta’ id ir-raġel liebes l-għażel, u dan ħadu, u ħareġ.

⁸U taħt ġwenħajn il-kerubini kienet tidher għamla ta’ id ta’ bniedem.

⁹U ħarist u rajt erba’ roti ħdejn il-kerubini: rota ħdejn kull kerubin; u r-roti kienu jiddu qishom ħaġar tat-topazju.

¹⁰Jekk tarahom l-erbgħa kienu ta’ għamla waħda, bħallikieku rota mdaħħla ġo oħra.

¹¹Meta kienu jiċċaqalqu, kienu jimxu lejn l-erba’ naħat tagħhom, bla ma jilwu huma u miexja, għax kienu jmorru ’l fejn kienet tħares ir-rota ta’ quddiem bla ma jilwu huma u miexja.

¹²Ġisimhom kollu - daharhom, idejhom, ġwenħajhom - u r-roti kienu mimlija għajnejn, minn kull naħa, l-erba’ roti li kienu.

¹³Kif smajt, ir-roti kienu jsejħulhom ‘galgal’.

¹⁴Kull wieħed kellu erba’ wċuħ: wieħed wiċċ ta’ gendus[32], it-tieni wiċċ ta’ bniedem, it-tielet wiċċ ta’ ljun, u r-raba’ wiċċ ta’ ajkla.

¹⁵Imbagħad il-kerubini ntrefgħu. Kienu l-istess ħlejjaq ħajjin li kont rajt ħdejn ix-xmara Kebar.

¹⁶U huma u jimxu l-kerubini, kienu jimxu r-roti ħdejhom; u meta l-kerubini kienu jiftħu ġwenħajhom biex jogħlew ’il fuq mill-art, ir-roti ma kinux iwarrbu minn ħdejhom.

¹⁷Meta l-kerubini kienu jieqfu, kienu jieqfu wkoll ir-roti; u meta kienu jogħlew, kienu jogħlew magħhom huma wkoll, għax kien hemm fihom l-ispirtu tal-ħlejjaq ħajjin.

¹⁸Imbagħad il-glorja tal-Mulej telqet mid-daħla tat-tempju, u qagħdet fuq il-kerubini;

¹⁹u l-kerubini fetħu ġwenħajhom, ħarġu u ntrefgħu mill-art quddiem għajnejja, bir-roti maġenbhom. Imbagħad waqfu ħdejn it-tempju tal-Mulej fid-daħla tal-bieb li jagħti għal-Lvant, bil-glorja ta’ Alla ta’ Iżrael fuqhom, min-naħa ta’ fuq.

²⁰Dawn kienu l-istess ħlejjaq ħajjin li kont rajt taħt Alla ta’ Iżrael ħdejn ix-xmara Kebar; u għaraft li kienu kerubini.

²¹Kull waħda mill-ħlejjaq ħajjin kellha erba’ wċuħ u erba’ ġwienaħ, b’sura ta’ id ta’ bniedem taħt ġwenħajhom.

²²U minn suret wiċċhom kienu l-istess uċuħ li kont rajt ħdejn ix-xmara Kebar. Kull waħda minnhom kienet miexja ’l quddiem.