Read Maltese Bible with DC – IL-BIBBJA IL-KOTBA MQADDSA EŻEKJEL 11 Bible Online

EŻEKJEL 11 - Maltese Bible with DC – IL-BIBBJA IL-KOTBA MQADDSA bible

EŻEKJEL 11

¹Imbagħad l-ispirtu refagħni u ħadni fil-bieb tal-Lvant ta’ dar il-Mulej li jħares in-naħa tal-Lvant. U, ara, fid-daħla tal-bieb kien hemm ħamsa u għoxrin raġel; u f’nofshom ilmaħt lil Ġażanija bin Għażżur u Pelatija bin Benaja, ilkoll prinċpijiet tal-poplu.

²U qalli: “O bniedem, dawn huma n-nies li jfasslu l-ħażen u jagħtu l-pariri ħżiena f’din il-belt, u jmorru jgħidu:

³‘M’hemmx għaġla nibnu d-djar. Din hi l-borma, u aħna l-laħam[33].’

⁴Għalhekk ħabbrilhom, o bniedem, ħabbrilhom!’ ”

⁵U niżel fuqi l-ispirtu tal-Mulej, u qalli: “Għidilhom: dan jgħid il-Mulej: Intom hekk tgħidu, dar Iżrael, u jiena naf x’jiġikom f’moħħkom.

⁶Intom qtiltu fuq li qtiltu f’din il-belt, u triqatha mlejtuhom bil-mejtin.

⁷Għalhekk, jgħid Sidi l-Mulej: ‘Il-mejtin tagħkom li intom xħettuhom f’nofs il-belt huma l-laħam, u dil-belt hi l-borma; u lilkom noħroġkom minnha.

⁸Intom tibżgħu mix-xabla, imma jien ix-xabla nġib għalikom, oraklu ta’ Sidi l-Mulej.

⁹Jien noħroġkom minn ġo nofsha u nerħikom f’idejn il-barranin, u nagħmel ħaqq minnkom.

¹⁰Jgħaddukom minn xifer ix-xabla; fuq il-fruntieri ta’ Iżrael nagħmel ħaqq minnkom; tkunu tafu mbagħad, li jien il-Mulej.

¹¹Il-belt ma tkunilkomx bħall-borma u intom ma tkunux il-laħam f’nofsha; fuq il-fruntieri ta’ Iżrael nagħmel ħaqq minnkom.

¹²U tkunu tafu, imbagħad, li jiena l-Mulej; għax intom ma mxejtux skont il-liġijiet tiegħi, u lanqas ma għamiltu d-digrieti tiegħi; biex imxejtu skont il-liġijiet tal-ġnus ta’ madwarkom.”

¹³Malli temmejt inħabbar, Pelatija bin Benaja miet u jien inxtħett wiċċi fl-art u għajjatt għajta kbira u għedt: “Ah! Sidi Mulej, se teqred int il-fdal ta’ Iżrael?”

¹⁴U ġietni l-kelma tal-Mulej, u qalli:

¹⁵“O bniedem, lil ħutek, lil sħabek itturufnati miegħek, id-dar kollha ta’ Iżrael, lilhom ilkoll, dan qalulhom dawk li jgħammru f’Ġerusalemm: ‘Tbegħedtu mill-Mulej; lilna ngħatat l-art bħala wirt.’

¹⁶Mela għid: ‘Hekk qal Sidi l-Mulej: Iva, bgħatthom ’il bogħod fost il-ġnus, xerridthom f’artijiet barranin, u għal ftit żmien kont tempju għalihom fl-art li marru fiha.’

¹⁷Mela għid: ‘Dan jgħid Sidi l-Mulej: Jiena niġborkom minn fost il-ġnus, rreġġagħkom lura mill-artijiet fejn kont xerridtkom u nagħtikom l-art ta’ Iżrael.

¹⁸U jiġu fiha u huma jwarrbu minnha l-għajb kollu[34] u l-qżiżijiet kollha tagħha.

¹⁹U nagħtihom qalb oħra, u nnissel spirtu ġdid ġewwa fihom; naqlgħalhom il-qalb tal-ġebel minn ġisimhom, u nagħtihom qalb tal-laħam,

²⁰biex huma jimxu fuq il-preċetti tiegħi u jħarsu l-liġijiet tiegħi, u jagħmluhom. Imbagħad huma jkunu l-poplu tiegħi u jiena nkun Alla tagħhom.

²¹Imma dawk li qalbhom marbuta mal-idoli, l-għajb u l-qżiżijiet tagħhom, jiena nitlobhom kont tal-imġiba tagħhom, oraklu tal-Mulej.’ ”

²²U l-kerubini fetħu ġwenħajhom, bir-roti maġenbhom; u l-glorja ta’ Alla ta’ Iżrael kienet fuqhom.

²³U l-glorja tal-Mulej tqanqlet minn nofs il-belt, u marret qagħdet fuq l-għolja n-naħa tal-Lvant tal-belt.

²⁴L-ispirtu refagħni u ħadni f’art il-Kaldin fost l-itturufnati, f’dehra ta’ Alla; u għabet minn quddiemi d-dehra li kont rajt.

²⁵U jien għedt lill-itturufnati kulma wrieni l-Mulej.