Read Maltese Bible with DC – IL-BIBBJA IL-KOTBA MQADDSA EŻEKJEL 15 Bible Online

EŻEKJEL 15 - Maltese Bible with DC – IL-BIBBJA IL-KOTBA MQADDSA bible

EŻEKJEL 15

¹U ġietni l-kelma tal-Mulej u qalli:

²“O bniedem, x’inhu l-ħatab tad-dielja, aħjar mill-bqija tal-ħatab, iż-żarġun li hemm fost is-siġar tal-foresta?

³Forsi jieħdu l-injam minnu, biex jagħmlu minnu xi biċċa xogħol? Forsi jieħdu minnu xi kavilja għad-dendil?

⁴Ara, jitfgħuh fin-nar għall-ħruq, u trufu t-tnejn jikolhom in-nar, u n-nofs ukoll jinħaraq. U meta n-nofs ikun maħruq ukoll, jista’ jiswa għal xi xogħol?

⁵Ara, meta kien għadu sħiħ, ma kien jiswa għal ebda xogħol. Kemm inqas issa, li kielu n-nar u qerdu, jista’ jsir xogħol minnu?

⁶Għalhekk dan jgħid Sidi l-Mulej: Bħalma l-ħatab tad-dielja, fost il-ħatab tal-foresta, jien nitfgħu fin-nar għall-ħruq, hekk nitlaq lin-nies ta’ Ġerusalemm.

⁷Indawwar wiċċi kontrihom; min-nar ħarġu, u n-nar għad jikkunsmahom. U tkunu tafu li jien il-Mulej, meta jien indawwar wiċċi kontrihom.

⁸U nagħmel ħerba mill-pajjiż talli kisru l-kelma li taw,” oraklu tal-Mulej.