Read Maltese Bible with DC – IL-BIBBJA IL-KOTBA MQADDSA EŻEKJEL 16 Bible Online

EŻEKJEL 16 - Maltese Bible with DC – IL-BIBBJA IL-KOTBA MQADDSA bible

EŻEKJEL 16

²“O bniedem, uri ’l Ġerusalemm l-għarukażijiet tagħha[42],

³u għidilha: ‘Dan jgħid Sidi l-Mulej lil Ġerusalemm: Nislek u twelidek mill-art tal-Kangħanin: missierek mill-Amurrin u ommok mill-Ħittin[43].

⁴Fi twelidek, nhar twelidek, ma qatgħulekx il-ħajta ta’ żokortok, bl-ilma ma ħaslukx biex titnaddaf, ma għorkukx bil-melħ u anqas fisqewk fil-faxex.

⁵Ebda għajn ma tħassritek biex tagħmillek xi ħaġa minn dan kollu u tħenn għalik, imma stkerrhuk u rmewk fuq wiċċ ir-raba’ f’jum twelidek, dak in-nhar li int twelidt!

⁶“Għaddejt jien minn ħdejk, rajtek titmiegħek f’demmek u għedtlek kif kont mgħargħra f’demmek: ‘Int tgħix

⁷u tikber bħal nebbiet tar-raba’.’ U int trabbejt, u kbirt u lħaqt il-milja ta’ xbubitek; sidrek imtela u xagħrek kiber, imma kont għadek għarwiena u mikxufa.

⁸“U jiena għaddejt minn ħdejk u ħarist, u rajtek li kont fi żmienek, żmien l-imħabba. Jien frixt fuqek djul mantari[44] u għattejtlek għawarek; u ħliftlek u dħalt f’patt miegħek, u int sirt tiegħi, oraklu ta’ Sidi l-Mulej.

⁹Ħsiltek bl-ilma, naddaftlek demmek u biż-żejt dliktek.

¹⁰Libbistek il-brukkat u xeddejtlek sandli tad-delfin, dawwartek bl-għażel u ksejtek bil-ħarir.

¹¹Żejjintek bil-ġawhar; qegħedtlek il-brazzuletti f’dirgħajk, u ġiżirana ma’ għonqok;

¹²qegħedtlek ħolqa f’imnifsejk, u msielet f’widnejk, u dijadema sabiħa tlellex f’rasek.

¹³“Kont imżejjna bid-deheb u l-fidda, u lbiesek kien għażel, ħarir, u brukkat. Smid, u għasel, u żejt kont tiekol. Kont sirt sabiħa fuq li sabiħa, u kien jixraqlek tkun sultana.

¹⁴“Beda jissemma ġmielek fost il-ġnus: għax xejn ma kien jonqsu t-tiżjin li jien qegħedt fuqek, oraklu ta’ Sidi l-Mulej.

¹⁵“Imma int tlift rasek bi ġmielek, u ntlaqt għaż-żina, u sawwabt iż-żina tiegħek fuq min ġie ġie.

¹⁶Ħadt minn ilbiesek, u għamilt santwarji mżejna fuq l-għoljiet u żnejt fuqhom[45];

¹⁷u qbadt il-ġawhar ta’ ġmielek, id-deheb u l-fidda li jien stess kont tajtek, u għamilt minnhom xbihat ta’ rġiel u magħhom żnejt.

¹⁸Ħadt minn ilbiesek tal-brukkat u ksejthom bih, u offrejtilhom iż-żejt u l-inċens ifuħ, li tajtek jien.

¹⁹Ħobżi li kont tajtek - tmajtek smid, żejt u għasel - ħadtu, u offrejtulhom b’sagrifiċċju jfuħ u jgħaxxaq, oraklu tal-Mulej.

²⁰“Qbadt imbagħad lill-istess uliedek, subien u bniet, li inti wlidtli, u ssagrifikajthomlhom ħa jieklu minnhom. Taħsbu li mhuma xejn dawn l-għemejjel faħxija tiegħek?

²¹Qtiltli lil uliedi biex offrejthomlhom ħalli jgħadduhom min-nar[46].

²²U meta kont tagħmel dawn l-għarukażijiet u dawn l-għemejjel faħxija tiegħek, ma kontx tiftakar f’żgħożitek meta kont għarwiena u mikxufa titmiegħek f’demmek!

²³Issa wara dan il-ħażen kollu tiegħek - gwaj, gwaj għalik, oraklu ta’ Sidi l-Mulej -

²⁴int bnejt kmajra u tellajt għarix f’kull misraħ[47].

²⁵F’ras kull triq waqqaft għarixek u kasbart ġmielek, u berraħt riġlejk għal kull min ġie ġie u komplejt biż-żina tiegħek.

²⁶“Żnejt ma’ wlied l-Eġittu, ġirienek imġissma sewwa, u komplejt żidt fiż-żina tiegħek biex tipprovokani.

²⁷“Għalhekk meddejt idejja kontrik, u naqqast sehmek, u rħejtek għar-rieda tal-għedewwa tiegħek, il-bniet tal-Filistin, li stħaw mill-imġiba faħxija tiegħek.

²⁸“Int żnejt ukoll ma’ wlied l-Assirja, żnejt magħhom u qatt ma xbajt;

²⁹komplejt għalhekk biż-żina tiegħek f’art il-Kaldin, u lanqas b’dan ma xbajt.

³⁰“Kemm kienet tferfer qalbek, oraklu tal-Mulej, biex għamilt dan kollu, xogħol ta’ prostituta bla mistħija?

³¹Bnejt il-kmajriet tiegħek f’ras kull triq, u f’kull misraħ tellajt l-għerejjex tiegħek. U lanqas kont bħal prostituta għall-qligħ, għax kont tistmerr il-ħlas,

³²imma bħal mara adultera; minflok ’il żewġha, tilqa’ l-barranin.

³³Kull prostituta jagħtuha xi ħaġa, iżda int tajt ir-rigali tiegħek lil ħbiebek kollha; kont ixxaħħamhom biex jiġu jiżnu miegħek min-naħat kollha ta’ madwarek.

³⁴Fl-għemejjel żienja tiegħek ġara l-maqlub ta’ nisa oħra: lilek ħadd ma kien ifittxek biex jiżni miegħek, kont int li tħallas, u lilek ħadd ma kien iħallsek! Miegħek kien kollox bil-maqlub!

³⁵“Mela, ja mara żienja, isma’ l-kelma tal-Mulej:

³⁶Dan jgħid Sidi l-Mulej: Talli int intlaqt daqstant f’għemilek, u kxift għawarek biex żnejt ma’ ħbiebek, u minħabba l-idoli moqżieża tiegħek, u l-qtil ta’ wliedek li int offrejtilhom,

³⁷jien se niġbor ’il ħbiebek kollha, l-għaxqa tiegħek, ’il dawk kollha li int ħabbejt u ’l dawk kollha li kont tistmerr; niġborhom kontrik minn kull naħa. Quddiemhom jien nikxiflek għawarek kollha ħalli jarawhom kollha kemm huma.

³⁸“Jiena nagħmel ħaqq minnek ta’ mara adultera u qattiela. Niżfoga fuqek fid-demm is-saħna u l-għira tiegħi.

³⁹Nerħik f’idejhom ħa jġarrfulek il-kmajriet u l-għerejjex tiegħek; ineżżgħuk minn ħwejġek, jeħdulek il-ġawhar ilellex tiegħek u jħalluk hemm mikxufa u għarwiena.

⁴⁰Ixewxu l-folla kontrik, iħaġġruk u jinfduk bix-xabla;

⁴¹jagħtu n-nar lil djarek, u jagħmlu ħaqq minnek quddiem għajnejn ħafna nisa.

⁴²Intemm iż-żina tiegħek u ħlas aktar ma tagħtix ’il ħbiebek. Hekk intemm l-għadab tiegħi għalik, l-għira tiegħek tħallik; inserraħ il-qilla tiegħi u ma nagħdabx għalik aktar.

⁴³Għax int ma ftakartx fil-jiem ta’ żgħożitek u madankollu m’għamiltx ħlief saħħantni għalik; jien nitfa’ fuq rasek ħlas l-imġiba tiegħek, oraklu ta’ Sidi l-Mulej. Ma għallejtnix int bl-għemejjel moqżieża kollha tiegħek?

⁴⁴“Ara! Kull qabbiel jista’ jqabbillek hekk: ‘Skont l-omm il-bint!’

⁴⁵Bint ommok int[48], li kienet tistmell lil żewġha u lil uliedha; oħt ħutek il-bniet int, li kienu jistmellu lil żwieġhom u lil uliedhom. Ommkom, bint il-Ħittin, missierkom wild l-Amurrin.

⁴⁶Oħtok il-kbira hi Samarija[49] fuq ix-xellug tiegħek b’uliedha l-bniet; oħtok iż-żgħira hi Sodoma fuq il-lemin tiegħek b’uliedha l-bniet.

⁴⁷“Int għall-ewwel ma qbadtx triqathom, lanqas m’għamilt għarukażijiet, imma biss għal ftit taż-żmien. Iżda mbagħad tħassart f’imġibtek kollha aktar minnhom.

⁴⁸“Daqs kemm jien ħaj, oraklu ta’ Sidi l-Mulej, oħtok Sodoma u bnietha m’għamlux dak li għamilt int u bnietek.

⁴⁹Ara! Dan kien id-dnub ta’ oħtok Sodoma, hi u wliedha l-bniet: kienu kburin, imxebbgħin bil-ħobż, u moħħhom mistrieħ u kwiet, imma lill-imsejken u l-fqir qatt ma weżnuhom.

⁵⁰Imtlew bihom infushom u għamlu kulma jien nistmell, u jien ċħadthom malli rajt dan.

⁵¹“U Samarija ma għamlitx in-nofs tad-dnubiet li għamilt int. Int waqajt f’għarukażijiet aktar minnhom, tant li ħutek ħdejk, ħdejn l-għarukażijiet tiegħek, bdew jidhru ġusti.

⁵²“Mela issa ġorr l-għajb tiegħek, ladarba għamilt tajjeb għal ħutek! Għax bi dnubietek int tqażżiżt aktar minnhom, u ħdejk saru ġusti aktar minnek. Istħi, mela, u ġorr fuqek l-għajb tiegħek, għax għamilt lil ħutek ġusti aktar minnek ħdejk.

⁵³“Imma jien inbiddlilhom xortihom: ix-xorti ta’ Sodoma u bnietha u x-xorti ta’ Samarija u bnietha; u xortik ukoll inbiddel f’nofshom,

⁵⁴ħalli int tħoss ukoll it-toqol tal-għajb tiegħek u tistħi minn dak kollu li int għamilt u tajthom pjaċir.

⁵⁵U ħutek, Sodoma u wliedha l-bniet, jerġgħu għal li kienu qabel; u wkoll Samarija u wliedha jerġgħu għal li kienu qabel; u int wkoll u wliedek terġgħu għal li kontu fl-imgħoddi.

⁵⁶“Ma kellhiex isem ħażin fuq fommok oħtok Sodoma fi żmien kburitek, qabel ma nkixfet ħżunitek?

⁵⁷Bħalha issa sirt int; jgħajruk in-nisa ta’ Edom u n-nisa tal-Filistin, il-ġirien tiegħek iżebilħuk ilkoll minn kull naħa.

⁵⁸Int qiegħda tħallas għal għemilek u qżiżijietek, oraklu tal-Mulej.”

⁵⁹Hekk jgħid Sidi l-Mulej: “Jien nagħmillek dak li għamilt int meta kasbart il-ħalfa u ksirt il-patt.

⁶⁰Imma jien niftakar fil-patt li għamilt miegħek fi żmien żgħożitek u nġedded il-patt tiegħi miegħek għal dejjem.

⁶¹Int imbagħad tiftakar fl-imġiba tiegħek u tistħi meta tilqa’ għandek lil ħutek il-bniet, sew ikbar u sew iżgħar minnek, li jien għad nagħtihomlok bħala wliedek, għalkemm mhux bis-saħħa tal-patt.

⁶²U nġedded il-patt tiegħi miegħek, ħa tagħraf li jiena l-Mulej,

⁶³biex tiftakar u timtela bil-mistħija, u ma jkollokx aktar ħila tiftaħ ħalqek minħabba l-għajb tiegħek, meta nkun ħfirtlek dak kollu li għamilt, oraklu ta’ Sidi l-Mulej.”