Read Maltese Bible with DC – IL-BIBBJA IL-KOTBA MQADDSA EŻEKJEL 17 Bible Online

EŻEKJEL 17 - Maltese Bible with DC – IL-BIBBJA IL-KOTBA MQADDSA bible

EŻEKJEL 17

¹U ġietni l-kelma tal-Mulej u qalli:

²“O bniedem, qabblilhom taqbila u fassal tixbiha għal ulied Iżrael.

³Għidilhom: Dan jgħid Sidi l-Mulej: ‘Kien hemm ajkla kbira[50], ġwenħajha kbar, b’pinen twal, u rix imżewwaq, li ġiet il-Libanu u ħadet fergħa mill-quċċata taċ-ċedru;

⁴ħasdet l-ogħla tarf tal-friegħi tagħha, u ħaditu f’art il-Kangħanin u ħallietu f’belt il-merkanti.

⁵Ħadet ukoll miż-żerriegħa ta’ dik l-art, u żergħetha f’għalqa taż-żrigħ, ħawlitha ħdejn gelgul ilma bħas-siġra taż-żafżaf.

⁶Nibtet u saret dielja mifruxa fl-art, u frigħetha meddet lejha, u għeruqha baqgħu hemm fejn kienet. U saret dielja, ħarġet iż-żraġen, u rmiet il-friegħi.

⁷Imma kien hemm ajkla oħra kbira[51], ġwenħajha kbar u rixha folt. Ara! Dik id-dielja dawret għeruqha lejha, u mill-ħmiemel fejn kienet imħawla meddet frigħetha lejha, ħalli ssaqqiha.

⁸Ħadha u ħawwilha f’art għammiela, ħdejn gliegel ta’ ilma xxettlet, ħalli toħroġ il-friegħi u l-frott tagħmel, biex hekk issir dielja sabiħa.’

⁹Għidilhom: ‘Dan jgħid Sidi l-Mulej: Taħsbu li se tmur tajjeb? Ma taqlagħhiex l-ajkla l-oħra minn għeruqha, taqtgħalha frottha u tħalliha tinxef? Jinxef ir-rimi kollu tal-friegħi tagħha. Ma tkunx meħtieġa saħħa kbira, jew kotra nies biex jaqilgħuha minn għeruqha.

¹⁰Araw! Jewwilla għax imxettla se tmur ’il quddiem? Ma tinxifx għalkollox malli jmissha r-riħ mil-Lvant? Iva, fil-ħmiemel fejn ixxettlet, tinxef.”

¹¹U ġietni l-kelma tal-Mulej, u qalli:

¹²“Għid lil din ir-razza rasha iebsa: Ma tafux xi jfisser dan? Għidilhom: ‘Araw! Ġie s-sultan ta’ Babilonja[52] Ġerusalemm, u qabad is-sultan tagħha u l-prinċpijiet tagħha u ħadhom miegħu Babilonja.

¹³U ħa wieħed minn nisel is-saltna, u għamlu sultan u għamel patt miegħu, u rabtu b’ġurament. U ħa miegħu wkoll il-kbarat tal-pajjiż,

¹⁴biex tiċċekken is-saltna u ma titkabbarx u s-sultan iħares il-patt li ntrabat bih, u hekk is-saltna żżomm sħiħa.

¹⁵“Imma hu qam kontrih u bagħat il-messaġġiera tiegħu l-Eġittu, biex dan jagħtih żwiemel u kotra nies. Tista’ tiġih tajba? Jista’ jeħlisha min għamel dan? Jista’ jikser il-patt u jeħles?’

¹⁶“Daqs kemm jien ħaj, oraklu ta’ Sidi l-Mulej, talli żeblaħ il-ħalfa tiegħu u kiser il-patt li għamel miegħu, f’nofs il-Belt ta’ Babilonja jmut, f’art is-sultan li tellgħu fuq it-tron.

¹⁷Il-Fargħun mhux se jgħinu b’eżerċtu kbir jew b’ħafna nies meta jkun hemm il-ġlied, meta jtellgħu r-rampa u jibnu ħajt madwar għall-qerda ta’ ħafna nies.

¹⁸Hu żeblaħ il-ġurament, u kiser il-patt; newwel idu u mbagħad għamel dan kollu: żgur li ma jeħlishiex!

¹⁹“Għalhekk dan jgħid Sidi l-Mulej: ‘Daqs kemm jien ħaj, il-ġurament tiegħi li kasbar u l-patt tiegħi li kiser, nitħallas tagħhom minn fuq rasu.

²⁰Nifrex fuqu x-xibka tiegħi, u jinqabad fl-ingassa tiegħi, u nkaxkru f’Babilonja, u hemmhekk nagħmel ħaqq minnu talli kiser kelmtu miegħi.

²¹L-aħjar fost il-qtajja’ kollha tal-eżerċtu tiegħu, jaqgħu taħt ix-xabla, u dawk li jeħilsuha jixxerrdu ma’ kull riħ. Imbagħad tkunu tafu li jiena, il-Mulej, tkellimt.”

²²Dan jgħid Sidi l-Mulej: “Jien naqta’ mill-quċċata taċ-ċedru[53] l-għoli, minn tarf il-friegħi l-għolja, rimja żgħira, u nxettilha fuq il-muntanja għolja u kbira;

²³fuq il-muntanja l-għolja ta’ Iżrael inxettilha. U hi toħroġ il-friegħi, u tagħmel il-frott, u ssir siġra sabiħa taċ-ċedru. U taħtha jistkenn kull tajr tal-ġwienaħ, jistkennu għad-dell tal-friegħi tagħha.

²⁴U jagħrfu s-siġar kollha tar-raba’ li jien il-Mulej, li siġra għolja nċekkinha, u siġra żgħira nkabbarha; nnixxef is-siġra l-ħadra, u n-niexfa bil-weraq inħaddarha. Jien, il-Mulej, tkellimt, u li għedt nagħmlu.”