Read Maltese Bible with DC – IL-BIBBJA IL-KOTBA MQADDSA EŻEKJEL 18 Bible Online

EŻEKJEL 18 - Maltese Bible with DC – IL-BIBBJA IL-KOTBA MQADDSA bible

EŻEKJEL 18

¹Ġietni l-kelma tal-Mulej, u qalli:

²“Xi tridu tfissru bih dan il-proverbju għall-art ta’ Iżrael: Il-missirijiet kielu l-għeneb qares u ddarrsu snien uliedhom[54]?

³Daqs kemm jien ħaj,” oraklu ta’ Sidi l-Mulej, “ma jkollkomx għalfejn ittennuh iżjed dan il-proverbju f’Iżrael.

⁴Araw, kulħadd huwa tiegħi; bħall-ħajja tal-missier hekk dik tal-iben tiegħi huma. Min jagħmel id-dnub, ikun hu li jmut.

⁵“Jekk wieħed jgħix ħajja sewwa u jagħmel il-ħaqq u s-sewwa, jiġifieri

⁶ma jmurx jiekol fuq il-muntanji[55], ma jerfax għajnejh lejn l-idoli tad-dar ta’ Iżrael, ma jtebbax il-mara ta’ għajru, ma jersaqx lejn mara fl-inġiesa tagħha,

⁷ma jaħqar lil ħadd, irodd lura r-rahan tad-dejn, ma jisraqx, jagħti ħobżu lil min hu bil-ġuħ, jostor bl-ilbies lill-għeri,

⁸u ma jislifx bl-imgħax, ma jiħux interessi, iżomm idu mill-ħażen, jagħmel il-ħaqq skont is-sewwa bejn bniedem u ieħor,

⁹iġib ruħu skont il-kmandamenti tiegħi u jħares id-digrieti tiegħi biex jagħmel is-sewwa, min jagħmel dan kollu huwa ġust, u żgur jgħix,” oraklu ta’ Sidi l-Mulej.

¹⁰“Iżda jekk huwa jiled iben li jagħtiha għas-serq u għat-tixrid tad-demm,

¹¹u jagħmel ħwejjeġ bħal dawn - għalkemm hu qatt ma jkun għamilhom - jekk l-iben imur jiekol fuq il-muntanji, u jtabba’ l-mara ta’ għajru,

¹²u jaħqar lill-fqar u lill-imsejkna, jisraq, ma jroddx lura r-rahan tad-dejn, jerfa’ għajnejh lejn l-idoli, jagħmel ħwejjeġ moqżieża,

¹³jislef bl-imgħax u jieħu l-interessi, jaqaw iben bħal dan se jgħix? Le, ma jgħixx; hu jkun għamel dawn il-ħwejjeġ moqżieża kollha, u żgur imut, demmu jkun fuqu.

¹⁴“Imma jekk jiled iben, u dan jara d-dnubiet li jkun għamel missieru, jibża’ u ma jagħmilx bħalhom;

¹⁵ma jmurx jiekol fuq il-muntanji u għajnejh ma jerfagħhomx fuq l-idoli ta’ dar Iżrael, il-mara ta’ għajru ma jtebbagħhiex,

¹⁶’il ħadd ma jaħqar, ma jżommx ir-rahan, ma jisraqx, jagħti ħobżu lil min hu bil-ġuħ, jostor bl-ilbies lill-għeri,

¹⁷iżomm idu mill-ħażen, imgħax u interessi ma jiħux, u jagħmel id-digrieti tiegħi u jimxi skont il-liġijiet tiegħi; dan ma jmutx minħabba dnubiet missieru, imma jibqa’ ħaj.

¹⁸Imma missieru li jkun żamm jew seraq dak li hu ta’ għajru, u jkun għamel dak li mhux sewwa f’nofs il-poplu tiegħu, minħabba ħżunitu, dan imut.

¹⁹U madankollu intom tgħidu: ‘M’għandux l-iben jitgħabba b’ħażen missieru? Jekk l-iben ikun għamel il-ħaqq u s-sewwa u ħares il-liġijiet tiegħi u għamilhom, dan jgħix!

²⁰“Il-bniedem li jidneb, hu għandu jmut; l-iben ma jbatix minħabba fid-dnubiet ta’ missieru, u lanqas il-missier minħabba fid-dnubiet ta’ ibnu. Il-ġustizzja tal-bniedem ġust titqieslu għalih ġid; u l-ħażen tal-bniedem ħażin jitqieslu għalih kastig.

²¹“Imma jekk il-bniedem ħażin jerġa’ lura minn ħtijietu kollha li jkun għamel, u jħares il-liġijiet kollha tiegħi u jagħmel il-ħaqq u l-ġustizzja, hu jgħix u ma jmutx.

²²Ebda dnub milli jkun għamel ma nfakkarlu; u hu jgħix minħabba fil-ġustizzja li jkun għamel.

²³Forsi jien togħġobni l-mewt tal-bniedem il-ħażin?” oraklu ta’ Sidi l-Mulej; “mhux aktar jogħġobni li jerġa’ lura minn triqatu u jgħix?

²⁴Iżda mbagħad forsi se jgħix il-bniedem ġust jekk jerġa’ lura mill-ġustizzja tiegħu u jagħmel il-ħażen kollu li jagħmel il-bniedem il-ħażin?” Ebda wieħed mill-għemejjel tajba tiegħu ma nfakkarlu, u minħabba l-qerq li jkun għamel u l-ħtija li fiha jkun waqa’, huwa jmut.

²⁵“Intom tgħidu: “Mhijiex sewwa l-imġiba tal-Mulej!’ Issa isimgħu, dar Iżrael: Forsi l-imġiba tiegħi mhijiex sewwa? Mhux l-imġiba tagħkom li mhijiex sewwa?

²⁶Jekk wieħed ġust jitbiegħed mill-ġustizzja tiegħu u jagħmel il-ħażen, u jmut minħabba dan, minħabba ħżunitu jkun miet.

²⁷Imma jekk il-midneb jerġa’ lura mid-dnub li jkun għamel, u jagħmel il-ħaqq u l-ġustizzja, hu jsalva ruħu.

²⁸Għax ikun intebaħ u reġa’ lura mid-dnubiet kollha li jkun għamel, u jibqa’ ħaj u ma jmutx.

²⁹Iżda dar Iżrael jgħidu: ‘Mhijiex sewwa l-imġiba tal-Mulej!’ Forsi l-imġiba tiegħi mhijiex sewwa, dar Iżrael? Mhux l-imġiba tagħkom li mhijiex sewwa?

³⁰Għalhekk lil kull wieħed minnkom niġġudikah skont imġibtu, dar Iżrael,” jgħid Sidi l-Mulej. “Indmu, u erġgħu lura minn dnubietkom kollha, biex ma jkollkomx xi jwaqqagħkom fil-ħażen.

³¹Biegħdu minnkom il-ħtijiet kollha li waqajtu fihom, u ġeddu qalbkom u ruħkom. L-għala tridu tmutu, dar Iżrael?

³²Jiena ma nieħu pjaċir bil-mewt ta’ ħadd,” jgħid Sidi l-Mulej. “Mela indmu u għixu.”