Read Maltese Bible with DC – IL-BIBBJA IL-KOTBA MQADDSA EŻEKJEL 19 Bible Online

EŻEKJEL 19 - Maltese Bible with DC – IL-BIBBJA IL-KOTBA MQADDSA bible

EŻEKJEL 19

¹U inti għanni għanja tal-biki għall-prinċpijiet ta’ Iżrael

²u għidilhom: X’iljuna kien fiha ommok[56] fost il-ljuni! Imteddet qalb il-ljuni ż-żgħar, u rabbiet il-ġriewi tagħha.

³Minn dawn il-ġriewi rawmet wieħed, sakemm kiber f’daqsxejn ta’ ljun[57]: tgħallem jaħtaf il-priża, u jiekol in-nies.

⁴U l-ġnus għajtu u nġemgħu kontrih, u nqabad fil-ħofra tagħhom. Imbagħad ħaduh bil-ħoloq fl-art tal-Eġittu.

⁵U meta rat li stenniet għal xejn, li tamitha sfat fix-xejn, ħadet ieħor minn ġriwitha, u minnu rawmet iljun żgħir[58].

⁶U beda jħuf qalb il-ljuni, u kiber f’daqsxejn ta’ ljun; tgħallem jaħtaf il-priża, u beda jiekol in-nies

⁷Ġarr il-priża lejn għerienu, u ħarbat bliethom. Twerwer il-pajjiż b’kulma kien fih għall-ħoss tat-tgargir tiegħu.

⁸Imbagħad il-ġnus daru għalih, mill-ibliet kollha ta’ madwar, firxu xbiekhom fuqu, u nqabad f’ħofrithom.

⁹Għalquh ġo gaġġa marbut bil-ktajjen, u ħaduh għand is-sultan ta’ Babilonja, u dan għalqu f’fortizza biex għajjatu aktar ma jinstamax, fuq l-għoljiet ta’ Iżrael.

¹⁰Ommok kienet bħal dielja f’qasam dwieli[59], imxettla ħdejn l-ilma kotran; kienet għammiela u kollha friegħi, minħabba l-ħafna ilma.

¹¹Ħareġ minnha żarġun b’saħħtu[60], u sar xettru ta’ sultan, intrefa’ ’l fuq minn bejn il-friegħi, u fl-għoli qalb il-friegħi folti kont tarah.

¹²Imma d-dielja qaċċtuha f’saħna, u mal-art meddewha. Ir-riħ mil-Lvant[61] nixxfilha l-frott; iż-żarġun b’saħħtu qaċċtuhulha, nixef u ħarqu n-nar.

¹³U issa tinsab imħawla fid-deżert, f’art għatxana u taħraq nar.

¹⁴Miż-żarġun ħareġ in-nar, u l-friegħi u l-frott kililha. Ma baqa’ ebda żarġun b’saħħtu, ebda xettru għal sultan. Din hi għanja ta’ lamentazzjoni u tkun għanja tal-vistu.