Read Maltese Bible with DC – IL-BIBBJA IL-KOTBA MQADDSA EŻEKJEL 20 Bible Online

EŻEKJEL 20 - Maltese Bible with DC – IL-BIBBJA IL-KOTBA MQADDSA bible

EŻEKJEL 20

¹U ġara li fis-seba’ sena[62], fl-għaxra tal-ħames xahar, ġew xi wħud mill-anzjani ta’ Iżrael jistħarrġu lill-Mulej u qagħdu bilqiegħda quddiemi:

²U ġietni l-kelma tal-Mulej u qalli:

³“O bniedem, kellem lix-xjuħ ta’ Iżrael u għidilhom: Dan jgħid Sidi l-Mulej: ‘Ġejtu intom biex tistħarrġuni? Daqs kemm jien ħaj, ma nħallikomx tistħarrġuni, oraklu ta’ Sidi l-Mulej.’

⁴“O bniedem, trid int tagħmel ħaqq minnhom? Trid tiġġudikahom? Mela għarrafhom bil-qżiżijiet ta’ missirijiethom.

⁵Għidilhom: ‘Dan jgħid Sidi l-Mulej: Meta jien għażilt lil Iżrael u rfajt idi u ħlift lil nisel dar Ġakobb u għarrafthom bija nnifsi fl-art tal-Eġittu, għollejt idi u għedtilhom: Jiena l-Mulej Alla tagħkom.

⁶Dakinhar erfajt idi u ħliftilhom li noħroġhom mill-art tal-Eġittu lejn art li għażilt għalihom, art tnixxi ħalib u għasel, ġawhra fost kemm huma l-artijiet.

⁷U għedtilhom: Armu kull wieħed minnkom il-kruhat li paxxew ’l għajnejkom u titniġġsux bl-allat tal-Eġittu. Jiena l-Mulej Alla tagħkom.

⁸Imma huma rvellaw kontrija u ma ridux jagħtuni widen; ma rmewx il-kruhat li paxxew ’l għajnejhom, u l-allat tal-Eġittu ma abbandunawhomx. “Imbagħad ħsibt li nsawwab il-qilla tiegħi fuqhom, li niżfoga għadbi fuqhom f’nofs l-art tal-Eġittu.

⁹Imma kelli nagħmel mod ieħor minħabba ismi; li ma jkunx imżeblaħ f’għajnejn il-ġnus, li huma kienu f’nofshom, u taħt għajnejhom għarrafthom bija nnifsi, u ħriġthom mill-art tal-Eġittu.

¹⁰Ħriġthom mill-art tal-Eġittu u ġibthom fid-deżert.

¹¹U tajthom il-liġijiet u l-preċetti tiegħi għarrafthom, li jekk bniedem jagħmilhom jista’ jgħix bihom.

¹²U tajthom is-Sibtijiet tiegħi biex ikunu sinjal bejni u bejnhom, u jkunu jafu li jien il-Mulej, li kkonsagrajthom.

¹³“Imma dar Iżrael irvellaw kontrija fid-deżert; skont il-liġijiet tiegħi ma mxewx u l-preċetti tiegħi abbandunawhom, li jekk bniedem jagħmilhom jista’ jgħix bihom. Is-Sibtijiet tiegħi pprofanawhom bis-sħiħ. Jien ħsibt, għalhekk, li nsawwab il-qilla tiegħi fuqhom fid-deżert biex neqridhom.

¹⁴Imma jien kelli nagħmel mod ieħor biex ismi ma jkunx imżeblaħ f’għajnejn il-ġnus li taħt għajnejhom ħriġthom.

¹⁵“Imma jiena rfajt idi fid-deżert u ħliftilhom li ma ndaħħalhomx fl-art li jiena wegħedthom, art tnixxi ħalib u għasel, ġawhra fost kemm huma l-artijiet.

¹⁶Stmerrew il-preċetti tiegħi, u ma mxewx fuq il-liġijiet tiegħi, ipprofanaw Sibtijieti għax qalbhom marret wara l-allat tagħhom.

¹⁷Iżda għajnejja tħassruhom, u ma għamiltilhomx deni, u ma qridthomx fid-deżert.

¹⁸“U għedt lil uliedhom fid-deżert: La timxux fuq drawwiet missirijietkom, u l-liġijiet tagħhom tħarsuhomx u b’allathom titniġġsux.

¹⁹Jiena l-Mulej Alla tagħkom. Imxu fuq il-liġijiet tiegħi, u ħarsu d-digrieti tiegħi, u għamluhom.

²⁰Qaddsu Sibtijieti u jkunu dawn sinjal bejni u bejnkom ħa tkunu tafu li jiena l-Mulej Alla tagħkom.

²¹U lanqas uliedhom ma ħarsu d-digrieti tiegħi, li jekk bniedem jagħmilhom jista’ jgħix bihom. Sibtijieti pprofanawhom. U jiena qtajtha li nsawwab qillti fuqhom, u nserraħ għadbi fuqhom fid-deżert.

²²Imma ġbidt idi lura, u għamilt mod li ismi ma jkunx imżeblaħ quddiem għajnejn il-ġnus, li quddiemhom ħriġthom.

²³“Imma rfajt idi u ħliftilhom fid-deżert li nxerridhom qalb il-ġnus u nferrixhom mal-artijiet,

²⁴għax id-digrieti tiegħi ma għamluhomx, u l-liġijiet tiegħi stmerrewhom, u Sibtijieti pprofanawhom, u xeħtu għajnejhom fuq allat missirijiethom.

²⁵Għalhekk tajthom liġijiet mhux tajbin[63], u digrieti li bihom ma jgħixux.

²⁶U niġġisthom bl-offerti tagħhom, u ħallejthom jgħaddu min-nar l-ulied tal-ewwel, biex inkexkixhom u jkunu jafu li jien il-Mulej.

²⁷“Mela, kellem, o bniedem, lil dar Iżrael u għidilhom: ‘Dan jgħid Sidi l-Mulej. B’dan ukoll komplew iżebilħuni missirijiethom, u jqarrqu bija.

²⁸Meta jien daħħalthom fl-art li jien għollejt idi u ħliftilhom li nagħtihielhom: kull fejn raw ħotba daqsxejn għolja jew siġra bi ftit friegħi, hemm offrew is-sagrifiċċji tagħhom, hemm ġiebu l-offerti tagħhom biex jinkuni, u hemm poġġew il-fwejjaħ jgħaxxqu tagħhom, u sawbu l-libazzjonijiet tagħhom.

²⁹U għedtilhom: X’inhi din l-għolja biex intom titilgħu fuqha? U għadhom sa llum stess ‘bama’[64] jsejħulha.

³⁰“Għalhekk għid lil dar Iżrael: ‘Dan jgħid Sidi l-Mulej: Jaqaw bħal missirijietkom tniġġistu, u għadkom tiżnu wara l-qżież ta’ allathom?

³¹Wara li tniġġistu bl-offerti tagħkom u għaddejtu lil uliedkom min-nar lill-allat tagħkom sal-lum, taħsbu li se nħallikom tistħarrġuni, dar Iżrael? Daqs kemm jien ħaj, oraklu ta’ Sidi l-Mulej, ma nħallikomx tistħarrġuni.

³²Dak li jiġikom f’moħħkom ma jseħħx, dak li qegħdin tgħidu: ‘Inkunu bħall-ġnus, bħar-razez ta’ artijiet oħra: naduraw il-ħatab u l-ħaġar.’

³³“Daqs kemm jien ħaj, oraklu ta’ Sidi l-Mulej, b’id qawwija, u bi driegħ merfugħ, b’qilla tbaqbaq, jien naħkem fuqkom.

³⁴Imbagħad noħroġkom minn fost il-popli u niġborkom mill-artijiet fejn jien xerridtkom fihom b’id qawwija, u bi driegħ merfugħ, u b’qilla tbaqbaq.

³⁵“Inġibkom fid-deżert tal-ġnus u hemm nagħmel ħaqq minnkom, hemm wiċċ imb wiċċ.

³⁶Bħalma għamilt ħaqq minn missirijietkom fid-deżert tal-Eġittu, hekk nagħmel ħaqq minnkom, oraklu ta’ Sidi l-Mulej.

³⁷Ngħaddikom minn taħt il-ħatar u ndaħħalkom bl-għadd.

³⁸U nnaqqi minnkom ix-xewwiexa u l-midinbin[65] kontrija, noħroġhom mill-art fejn huma barranin, imma f’art Iżrael ma jidħlux, u tkunu tafu li jiena l-Mulej.

³⁹“U intom, dar Iżrael, dan jgħid Sidi l-Mulej: Ħa jmur kull wieħed minnkom wara allatu, ħa jadurahom. Imma mbagħad ma jkun hemm ħadd minnkom li ma jismax minni; ismi l-qaddis ma tkasbrux iżjed bl-offerti tagħkom u b’allatkom.

⁴⁰“Għaliex fuq il-muntanja mqaddsa tiegħi, fuq l-għolja ta’ Iżrael, oraklu ta’ Sidi l-Mulej, hemm għad isservini d-dar kollha ta’ Iżrael, kemm ikun hemm fil-pajjiż; hemm nilqagħhom, hemm nistenniehom bl-offerti tagħhom, l-aħjar tal-offerti tagħkom u kulma tikkonsagrawli.

⁴¹Hemm nilqagħkom bħal fwieħa tgħaxxaq meta noħroġkom minn fost il-popli, u niġborkom mill-artijiet fejn xerridtkom, u nuri qdusiti fikom taħt għajnejn il-ġnus.

⁴²Imbagħad tkunu tafu li jiena l-Mulej, meta jien inġibkom fl-art ta’ Iżrael, l-art li jien għollejt idi u ħlift li nagħtiha lil missirijietkom.

⁴³Hemm tiftakru fl-imġiba tagħkom u fl-għemejjel tagħkom kollha li bihom tniġġistu, u tiddardru bikom infuskom, minħabba l-ħażen kollu li għamiltu.

⁴⁴U tkunu tafu li jiena l-Mulej, meta jien nimxi magħkom skont ismi, u mhux skont triqatkom il-ħżiena u skont l-għemejjel imħassra tagħkom, dar Iżrael, oraklu ta’ Sidi l-Mulej.”