Read Maltese Bible with DC – IL-BIBBJA IL-KOTBA MQADDSA EŻEKJEL 21 Bible Online

EŻEKJEL 21 - Maltese Bible with DC – IL-BIBBJA IL-KOTBA MQADDSA bible

EŻEKJEL 21

¹U ġietni l-kelma tal-Mulej, u qalli:

²“O bniedem, dawwar wiċċek lejn Teman, u ħabbar kontra l-foresta tan-Negeb[66], tanbar lin-naħa tan-Nofsinhar,

³u għid lill-foresta tan-Negeb: ‘Isma’ l-kelma tal-Mulej: ‘Arawni, se nkebbes fik in-nar, u kull siġra ħadra u kull siġra niexfa fik jikolha, u l-ilsna jħeġġu u ma jintfewx; jinħarqu l-uċuħ kollha min-Nofsinhar sat-Tramuntana.

⁴U kull bniedem jara li jien, il-Mulej, qabbadtu u ma nitfihx.”

⁵Imbagħad għedt: “Ah! Sidi Mulej, qegħdin jgħidu: ‘Dan mhux ħlief ħrejjef qiegħed iqabbel?’ ”

⁶U ġietni l-kelma tal-Mulej u qalli:

⁷“O bniedem, dawwar wiċċek lejn Ġerusalemm u tanbar kontra s-santwarji u ħabbar kontra l-pajjiż ta’ Iżrael.

⁸Għid lill-art ta’ Iżrael: ‘Dan jgħid il-Mulej: Arani ġej għalik u nislet ix-xabla tiegħi minn għantha biex neqred minn ġo nofsok il-ġust u l-ħażin.

⁹Irrid neqred minnek il-ġust u l-ħażin; għalhekk ix-xabla tiegħi se toħroġ mill-għant, tolqot kull bniedem min-Nofsinhar sat-Tramuntana;

¹⁰Kull bniedem ikollu jagħraf li jien il-Mulej li ħriġt ix-xabla tiegħi minn għantha u mhux se terġa’ lura iżjed.’

¹¹“Issa tniehed, o bniedem, tniehed b’qalbek maqsuma bl-imrar quddiem għajnejhom.

¹²U jiġri li jgħidulek: ‘Għala qiegħed titniehed?’ U int tweġibhom: ‘Minħabba aħbar[67], li malli tasal tinħall kull qalb, jintelqu d-dirgħajn, u tintreħa kull ruħ, u jimxu fl-ilma l-irkupptejn. Ara! Waslet, seħħet! Oraklu ta’ Sidi l-Mulej.’ ”

¹³U ġietni l-kelma tal-Mulej u qalli:

¹⁴“O bniedem, ħabbar u għid hekk: ‘Hekk jgħid Sidi l-Mulej:

¹⁵Xabla misnuna u llimata wkoll, misnuna għall-qatla, illimata biex tleħħ bħal beraq.

¹⁶Ħa tinħafen fl-id, bgħattha għall-illimar, xabla misnuna u llimata, lesta għall-qatla.

¹⁷Għajjat, ixher, o bniedem, imdendla fuq il-poplu tiegħi, imdendla fuq il-prinċpijiet kollha ta’ Iżrael, mogħtija lkoll għax-xabla mal-poplu tiegħi.

¹⁸Agħti għalhekk, fuq ġniebek! Tiġrib hemm lest għalikom. Min se jeħodha kontra l-ħatar? Jgħid Sidi l-Mulej.

¹⁹U int, O bniedem, ħabbar, ċapċap idejk! Tirdoppja x-xabla u ssir daqs tlieta, ix-xabla tal-massakru; din hi x-xabla tal-qatla l-kbira; tross fuqhom minn kull naħa.

²⁰Biex jinħallu qlubhom bil-biża’ jien qegħedt il-ponta tax-xabla f’kull bieb, biex il-maqtulin joktru fi bwiebhom. Iva, jien erħejt ix-xabla għall-massakru, xabla maħduma biex tleħħ bħall-beraq,’ misnuna għall-qerda.

²¹Iddur lejn il-lemin, iddur lejn ix-xellug, kull fejn iddur ix-xabla toqtol.

²²U jien ukoll idejja nċapċap, u għadbi nserraħ.’ Jiena, il-Mulej, tkellimt.”

²³U ġietni l-kelma tal-Mulej u qalli:

²⁴“U int, o bniedem, ħażżeż żewġ toroq mnejn għad tgħaddi x-xabla tas-sultan ta’ Babilonja. It-tnejn joħorġu minn pajjiż wieħed. Naqqax sinjal f’ras it-triq li tieħu għall-Belt.

²⁵Ħażżeż waħda mnejn tgħaddi x-xabla għal Rabbât, il-belt ta’ wlied Għammon, u oħra għal Ġuda u Ġerusalemm f’nofsha.

²⁶“Għax is-sultan ta’ Babilonja waqaf f’salib it-toroq[68], f’ras żewġ toroq, biex jistħarreġ xortih; hu ħallat il-vleġeġ, stħarreġ it-terafim, stħarreġ il-fwied.

²⁷F’idu l-leminija hemm ix-xorti bl-isem, ‘Ġerusalemm’ biex jiftaħ fommu u jordna l-qtil, jgħolli leħnu b’għajta ta’ gwerra, iqiegħed fil-bwieb l-għodda tal-gwerra għall-ħatt tas-swar, italla’ rampa u jagħlaqha b’ħajt.

²⁸Għal għajnejn Iżrael, dan hu kollu teħbir giddieb, billi huma għandhom il-wegħdiet maħlufa, u dan ifakkar il-ħażen tagħhom u hekk jinqabdu.

²⁹“Għalhekk dan jgħid Sidi l-Mulej: ‘Talli intom fakkartuni fil-ħażen tagħkom meta nkixfu dnubietkom u dehru ħtijietkom fl-għemejjel kollha tagħkom, ladarba ftakru fihom, tinqabdu żgur fix-xibka tagħhom.

³⁰“U int, prinċep ta’ Iżrael, bniedem bla ġieħ u midgħi, waslet is-siegħa tiegħek, wasal jumek u żmien il-kastig tal-aħħar, u t-tmiem ta’ żmien ħżunitek.

³¹“Dan jgħid Sidi l-Mulej: ‘Neħħi t-turbant, aqla’ l-kuruna! Li kien m’għadux li kien! Min hu minn taħt jitgħolla, u min hu minn fuq jitniżżel!

³²Ħerba, ħerba, ħerba nagħmel minnha! Hekk tibqa’ sakemm jasal min għandu dritt fuqha, u nagħtihielu.’

³³“U int, o bniedem, ħabbar u għid: ‘Hekk jgħid Sidi l-Mulej kontra wlied Għammon[69] u l-għajb tal-alla tagħhom, u għidilhom: ‘Ix-xabla, ix-xabla nsiltet għall-qatla, illimawha biex tleħħ bħall-beraq.

³⁴Huma u juruk viżjonijiet fiergħa, u jħabbrulek il-gideb, ix-xabla tinżel fuq għonq il-ħżiena u l-midgħajja. Wasal żmienhom, waslet is-siegħa tal-kastig tal-aħħar.

³⁵Se terġa’ tidħol fl-għant? Fil-post fejn inħloqt, fl-art fejn tnissilt, jien nagħmel ħaqq minnek.

³⁶Insawwab fuqek id-dagħdigħa tiegħi, nonfoħ kontrik in-nar tas-saħna tiegħi, u nerħik f’idejn nies slavaġ, nies jinqalgħu għall-qerda.

³⁷Tkun int ikel in-nar, f’nofs pajjiżek jiġri demmek, u iżjed ħadd ma jiftakrek: għax jien, il-Mulej, tkellimt.”