Read Maltese Bible with DC – IL-BIBBJA IL-KOTBA MQADDSA EŻEKJEL 23 Bible Online

EŻEKJEL 23 - Maltese Bible with DC – IL-BIBBJA IL-KOTBA MQADDSA bible

EŻEKJEL 23

²“O bniedem, kien hemm żewġ nisa mill-istess omm[70].

³It-tnejn f’żgħożithom żnew fl-Eġittu. Hemm kienu jteftfulhom f’sidirhom u jagħfsulhom ħobb xbubithom.

⁴Kien jisimhom: Oħola, il-kbira, u Oħoliba, oħtha. Saru n-nisa tiegħi u wilduli subien u bniet. Isimhom: Oħola hi Samarija; Oħoliba Ġerusalemm.

⁵“U Oħola żniet meta kienet għadha marti, u ntilfet għal wara ħbiebha, l-Assiri,

⁶gwerrieri lebsin il-vjola, gvernaturi, u uffiċjali, kollha żgħażagħ fihom għaxqa, rikkieba jirkbu ż-żwiemel.

⁷U ħliet iż-żina tagħha fuqhom, l-aħjar fost l-Assiri, u ċċappset bl-idoli kollha ta’ dawk li ġġennet għal warajhom.

⁸Lanqas m’abbandunat iż-żina tagħha tal-Eġittu; hemm l-Eġizzjani kienu jorqdu magħha f’żgħożitha u hemm kienu jagħfsulha ħobb xbubitha u jsawbu fuqha ż-żina tagħhom.

⁹“Għalhekk jien erħejtha f’idejn ħbiebha, f’idejn ulied l-Assirja, li ntilfet warajhom.

¹⁰Dawn, wara li kixfulha għawarha, qabdulha ’l uliedha, il-bniet u s-subien tagħha, u lilha għaddewha minn xifer ix-xabla. U ġiet f’ilsien in-nisa, u għamlu ħaqq minnha.

¹¹“Oħtha, Oħoliba, rat dan kollu, imma tbellhet aktar minnha, u ż-żina tagħha għadda ż-żina ta’ oħtha.

¹²Iġġennet għal wara ulied l-Assirja; gvernaturi, uffiċjali u gwerrieri lebsin il-vjola. Rikkieba jirkbu ż-żwiemel, kollha żgħażagħ fihom għaxqa.

¹³Jien rajt li hi wkoll tniġġset; it-tnejn qabdu l-istess triq.

¹⁴“U kompliet tiżni. Rat imbagħad irġiel imnaqqxin fil-ħajt, xbihat tal-Kaldin maqlugħin bin-nogħra;

¹⁵ġenbejhom imħażżmin bi ħżiem, bit-turbanti bil-pendenti f’rashom, mad-daqqa t’għajn donnhom kollha uffiċjali, xbihat ta’ wlied Babilonja, il-Kaldija, art twelidhom.

¹⁶U malli għajnejha marru fuqhom xegħlet għalihom; u bagħtet għandhom messaġġiera fil-Kaldija.

¹⁷“U wlied Babilonja ġew għandha għal friex l-imħabba u ċappsuha biż-żina tagħhom. Tniġġset magħhom sakemm ma ddardritx minnhom.

¹⁸“Meta hi wriet iż-żina tagħha u kixfet għawarha, jien stmellejtha bħalma kont stmellejt lil oħtha.

¹⁹Imma hi kompliet tkattar iż-żina tagħha, kompliet tiżni fuq li tiżni, meta ftakret fi żmien żgħożitha kemm kienet tiżni fl-art tal-Eġittu.

²⁰Xegħlet għall-irġiel żienja, li laħamhom laħam il-ħmir, u tixridhom tixrid iż-żwiemel.

²¹Int erġajt lura għall-ħażen ta’ żgħożitek meta l-Eġizzjani kienu jteftfulek f’sidrek u jagħfsulek ħobb xbubitek.”

²²“Għalhekk, Oħoliba, dan jgħid Sidi l-Mulej: ‘Arani, inxewwex kontrik lil ħbiebek li ġġennu għalik, u issa int stmellejthom, u nġibhom fuqek mill-inħawi ta’ madwarek.

²³Ulied Babilonja u l-Kaldin kollha, Pekod, Sugħa, u Kugħa, u wlied l-Assiri magħhom, żgħażagħ fihom għaxqa, gvernaturi u uffiċjali, gwerriera ta’ ħila u msemmija, ilkoll rikkieba jirkbu ż-żwiemel.

²⁴U jiġu għalik mit-Tramuntana bl-armi, karrijiet, vetturi, b’kotra ta’ popli bit-tarki, kbar u żgħar, u elmijiet, irossu fuqek minn kull naħa, u jien inħalli l-ħaqq f’idejhom, u jagħmlu ħaqq minnek skont drawwiethom.

²⁵U jien niżfoga l-għira tiegħi fuqek. Jittrattawk f’qillthom, iqaċċtulek imnieħrek u widnejk; u dak li jifdal minnek iqattgħuh bix-xabla. Is-subien u l-bniet tiegħek jeħduhomlok, u dak li jifdal minnek jikkunsmah in-nar.

²⁶Ineżżgħuk minn ħwejġek u jeħdulek il-ġawhar sabiħ tiegħek.

²⁷Ineħħulek minn fuqek l-għemil faħxi u ż-żina tiegħek fl-art tal-Eġittu; ma terfax aktar għajnejk lejhom, u l-Eġittu ma tiftakarx fih aktar.’

²⁸“Għax dan jgħid Sidi l-Mulej: Arani, se nerħik f’idejn dawk li int tobgħod, dawk li int stmellejt.

²⁹U jagħmlu minnek skont il-mibegħda tagħhom, jeħdulek ġidek u jħalluk imneżżgħa għarwiena, u jinkixef għawar iż-żina tiegħek u l-faħx ta’ għemilek,

³⁰Jagħmlulek dan kollu għax int żnejt mal-ġnus, u ċċappast bl-allat tagħhom.

³¹Triq waħda ma’ oħtok qbadt, u għalhekk nagħtik kusha f’idejk.”

³²Dan jgħid Sidi l-Mulej: “Kus oħtok tixrob, kus fond u wiesa’, mimli żufjett u żebliħ aktar milli jesa’.

³³Tintilef fis-sakra u l-għali, kus mimli tkexkix u twerwir, il-kus ta’ oħtok Samarija.

³⁴U int tixorbu u tqaxqxu, sax-xaqquf tiegħu tgerrem u tqatta’ sidrek, għax jien tkellimt, oraklu tal-Mulej.”

³⁵Għalhekk dan jgħid Sidi l-Mulej: “Talli inti nsejtni u tfajtni wara dahrek issa jkollok iġġorr il-piż tal-faħx u ż-żina tiegħek.”

³⁶Imbagħad il-Mulej qalli: “O bniedem, trid int tagħmel ħaqq minn Oħola u Oħoliba? Mela għarrafhom bi qżiżijiethom.

³⁷It-tnejn adulteri u hemm id-demm f’idejhom; waqgħu fl-adulterju ma’ allathom, u waslu biex għaddewlhom min-nar lil uliedhom, li wilduli, biex jikluhom.

³⁸U dan ukoll għamluli: fl-istess żmien tebbgħuli s-santwarju tiegħi u pprofanaw Sibtijieti.

³⁹Dakinhar li kienu joqtlu lil uliedhom lil allathom, kienu jidħlu fit-tempju tiegħi u jżebilħuh; u dan kienu jagħmluh f’dari stess!

⁴⁰U aktar, kienu jibagħtu għall-irġiel ġejjin mill-bogħod; kienu jibagħtulhom messaġġiera[71], u huma kienu jiġu! Għalihom int kont tinħasel, kont tiżbogħ għajnejk koħol, u tilbes il-ġawhar.

⁴¹Kont tinxteħet fuq divan lussuż, u fuq mejda rranġata quddiemek poġġejt żejti u l-fwejjaħ tiegħi.

⁴²U kien instama’ għandha għajjat ta’ għagħa u ferħ, u mal-irġiel mill-bliet kien hemm ukoll is-Sabijin ġejjin mid-deżert. Dawn qiegħdu brazzuletti f’idejn iż-żewġt aħwa, u kuruna sabiħa tlellex fuq rashom.

⁴³U jiena għedt: Ah, mara mkissra fl-adulterji! Issa żgur li jiżnu magħha, tkompli tiżni magħhom hi fost kulħadd!

⁴⁴Kienu jidħlu għandha bħalma jidħlu għand mara żienja; hekk kienu jidħlu għand Oħola u għand Oħoliba, it-tnejn nisa faħxija.

⁴⁵Imma l-irġiel sewwa għad jagħmlu ħaqq minnhom, il-ħaqq ta’ nisa adulteri, il-ħaqq ta’ nisa li xerrdu d-demm, għax huma adulteri t-tnejn u idejhom iċarċru d-demm!”

⁴⁶Għax dan jgħid Sidi l-Mulej: “Ħa titla’ folla nies għalihom u jabbandunawhom għat-twerwir u s-serq;

⁴⁷ħa jħaġġruhom u jbiċċruhom bix-xwabel tagħhom, joqtlulhom is-subien u l-bniet tagħhom, u djarhom jagħtuhom in-nar.

⁴⁸U hekk inneħħi l-faħx mill-pajjiż u n-nisa kollha jieħdu t-tagħlima u ma jkomplux bil-ħażen faħxi tagħhom.

⁴⁹Iroddulkom l-għemil faħxi tagħkom u titgħabbew bid-dnub tal-idolatrija tagħkom, ħalli tkunu tafu li jien is-Sid, jien il-Mulej!”