Read Maltese Bible with DC – IL-BIBBJA IL-KOTBA MQADDSA EŻEKJEL 25 Bible Online

EŻEKJEL 25 - Maltese Bible with DC – IL-BIBBJA IL-KOTBA MQADDSA bible

EŻEKJEL 25

¹U ġietni l-kelma tal-Mulej, u qalli:

²“O bniedem, dawwar wiċċek lejn Għammon, u ħabbar kontrihom:

³Għid lil ulied Għammon: ‘Isimgħu l-kelma ta’ Sidi l-Mulej: Dan jgħid Sidi l-Mulej: Talli int għajjatt ferħan: Ah! Ah! meta tkasbar is-santwarju tiegħi, meta tħarbat il-pajjiż ta’ Iżrael, meta dar Ġuda marru fl-eżilju, arani,

⁴għal dan kollu, se nerħik f’idejn in-nies tal-Lvant[76]. Itellgħu fik il-kampijiet tagħhom, iwaqqfu l-għerejjex tagħhom, jieklu l-frott tiegħek, u jixorbu ħalibek.

⁵Nagħmel minn Rabba mergħa għall-iġmla, mill-irħula tal-Għammonin mandra għall-imrieħel, u tkunu tafu li jien il-Mulej.

⁶“Għax dan jgħid Sidi l-Mulej: Talli int ċapċapt idejk u ħabbatt saqajk u fraħt mill-ħdura ta’ qalbek għax-xorti ta’ art Iżrael,

⁷arani, se mmidd idi għal fuqek u nagħmlek priża għall-ġnus u naqilgħek minn fost il-popli; u neqirdek minn fost il-pajjiżi u nagħmel minnek ħerba, ħalli tkun taf li jien il-Mulej.

⁸“Dan jgħid Sidi l-Mulej: Talli Mowab u Xegħir qalu: ‘Araw, id-dar ta’ Ġuda bħall-bqija tal-ġnus,’ arani, għalhekk,

⁹se niftaħ in-naħa muntanjuża ta’ Mowab u nġarraf blietha minn tarf għal ieħor, il-ġmiel ta’ artu: Betġesimot, Bagħal-megħon, Kirjatajm.

¹⁰Nerħiha f’idejn in-nies tal-Lvant, bħalma rħejt lil ulied Għammon, ħalli ma tissemmiex aktar fost il-ġnus.

¹¹Hekk nagħmel ħaqq minn Mowab, u jkunu jafu li jien il-Mulej.

¹²“Dan jgħid Sidi l-Mulej: Talli għamel Edom u vvendika ruħu minn dar Ġuda, u saru ħatja talli tħallsu b’idejhom minnhom,

¹³għalhekk dan jgħid Sidi l-Mulej: immidd idi fuq Edom u neqridlu n-nies u l-bhejjem u nagħmel minnu ħerba; minn Teman sa Dedan, jaqgħu taħt ix-xabla.

¹⁴Permezz tal-poplu tiegħi Iżrael nitħallas minn Edom u jagħmlu minn Edom skont għadbi u s-saħna tiegħi. Ikunu jafu li l-vendetta tiegħi, oraklu ta’ Sidi l-Mulej.

¹⁵“Dan jgħid Sidi l-Mulej: Talli għamlu l-Filistin u vvendikaw ruħhom skont il-ħdura ta’ qalbhom, biex jeqirduhom minħabba l-mibegħda minn żmien il-qedem,

¹⁶għalhekk dan jgħid Sidi l-Mulej: Arani, se mmidd idi fuq il-Filistin, u neqred il-Keretin, u nġib fix-xejn il-bqija li joqogħdu f’xatt il-baħar.

¹⁷Nivvendika ruħi minnhom bil-kbir u nikkastigahom bl-aħrax, u meta nitħallas minnhom ikunu jafu li jien il-Mulej.”