Read Maltese Bible with DC – IL-BIBBJA IL-KOTBA MQADDSA EŻEKJEL 26 Bible Online

EŻEKJEL 26 - Maltese Bible with DC – IL-BIBBJA IL-KOTBA MQADDSA bible

EŻEKJEL 26

¹Fil-ħdax-il sena[77], fl-ewwel tax-xahar, ġietni l-kelma tal-Mulej, u qalli:

²“O bniedem, talli Tir qalet għal Ġerusalemm: ‘Ah! Ah! Tfarrak il-bieb tal-fortizza, għal għandi jdur il-ġid tal-belt imħarbta,’

³għalhekk dan jgħid Sidi l-Mulej: Arani, kontrik ja Tir: intella’ għalik kotra ta’ popli bħalma l-baħar itella’ l-mewġ.

⁴U jġarrfu s-swar ta’ Tir, u jħottu t-torrijiet tagħha. Niknes minnha t-terrapien tagħha, u nagħmilha blata għerja.

⁵Tkun mifrex għax-xbiek f’nofs ta’ baħar, għax jien tkellimt, oraklu ta’ Sidi l-Mulej. Tkun priża għall-ġnus;

⁶u bnietha fir-raba’[78] jgħadduhomlha minn xifer ix-xabla, u jkun jafu li jien il-Mulej.”

⁷Għax dan jgħid Sidi l-Mulej: “Arani, se nġib mit-Tramuntana għal Tir lil Nabukodonosor, is-sultan ta’ Babilonja, Sultan fuq is-slaten, biż-żwiemel u l-karrijiet, bil-kavallerija u l-eżerċtu, u b’qatgħa ta’ poplu kbira.

⁸Bnietek fir-raba’ jgħaddihomlok minn xifer ix-xabla. Jibnilek ħajt madwarek, u jtella’ kontrik rampa, u jgħolli saqaf ta’ tarki għal fuqek.

⁹U jdawwar id-daqqiet tal-magni tiegħu għal fuq swarek u jġarraflek il-fortizza bl-imnanar tiegħu.

¹⁰Tgħattik l-għabra tal-kotra taż-żwiemel tiegħu; bil-ħsejjes tal-kavallerija, tar-roti u l-karrijiet; jitriegħdu swarek, meta huwa jidħol minn bwiebek, bħal wieħed dieħel f’belt b’ħitanha mċarrta.

¹¹Bi dwiefer iż-żwiemel jgħaddi, jikkalpestalek triqatek; lil niesek jgħaddihomlok minn xifer ix-xabla, u l-kolonni qawwija tiegħek iwittilek mal-art.

¹²Ġidek jagħmluh priża, u l-merkanzija jisirquhielek; iġarrfulek ħitanek, u jeqirdulek id-djar sbieħ tiegħek, il-ġebel tiegħek, l-injam u t-trab tiegħek, iwaddbuhomlok f’nofs ta’ baħar.

¹³Insikket l-għagħa tal-għana tiegħek; u d-daqq tal-arpi tiegħek ma jinstemax aktar.

¹⁴Nagħmel minnek blata għerja; tkun mifrex għax-xbiek. Ma tinbena qatt iżjed, għax jien, il-Mulej, tkellimt,” oraklu ta’ Sidi l-Mulej.

¹⁵Dan jgħid Sidi l-Mulej lil Tir: “Kif għad jitriegħdu l-gżejjer mal-ħoss ta’ waqagħtek, meta l-midruba jgħajtu, meta ssir l-istraġi f’nofsok!

¹⁶Il-prinċpijiet tal-baħar kollha għad jinżlu mit-tron tagħhom, ineħħu l-imnatar u l-ilbies tal-brukkat tagħhom. Jilbsu l-vistu, jinżlu bilqiegħda fl-art, jitkexkxu l-ħin kollu u jibqgħu skantati bik.

¹⁷“Imbagħad jgħannu għanja ta’ biki għalik u jgħidulek: ‘Kif ġejt fix-xejn int, għebt mill-baħar! Il-belt famuża, l-aqwa fuq l-ibħra, hi u n-nies tagħha, li kienu jbeżżgħu n-nies kollha, li jgħammru mal-baħar.

¹⁸Issa jitriegħdu l-gżejjer f’jiem il-waqgħa tiegħek; jitbellhu l-gżejjer fil-baħar bl-għejbien tiegħek.’ ”

¹⁹Għax dan jgħid Sidi l-Mulej: “Meta jiena nkun għamilt minnek belt imħarbta bħall-ibliet bla wens; meta nkun tellajt għalik il-baħar u għattewk ħalel kbar ta’ ilma,

²⁰imbagħad inniżżlek fil-qabar ħdejn dawk li diġà niżlu qablek għand poplu ta’ żmien ilu. Inġagħlek tgħammar f’qiegħ l-art, fost il-ħerbiet ta’ darba, ma’ oħrajn li diġà niżlu fil-qabar, biex qatt iżjed ma jgħammru fik, u int ma terġax lura f’art il-ħajjin.

²¹Jien nagħmel waħx minnek, ifittxuk u ma jsibuk qatt iżjed,” oraklu ta’ Sidi l-Mulej.