Read Maltese Bible with DC – IL-BIBBJA IL-KOTBA MQADDSA EŻEKJEL 27 Bible Online

EŻEKJEL 27 - Maltese Bible with DC – IL-BIBBJA IL-KOTBA MQADDSA bible

EŻEKJEL 27

¹U ġietni l-kelma tal-Mulej u qalli:

²“Inti, o bniedem, għanni għanja ta’ biki għal Tir.

³Għid lil Tir, sultana fuq dħul il-baħar[79], neguzjanta tal-popli f’ħafna gżejjer, dan jgħid Sidi l-Mulej; Tir, int għedt: ‘Jiena ġifen ta’ ġmiel bla qjies!’

⁴F’nofs l-ibħra trufijietek, il-bennejja tiegħek fawruk bi ġmielek;

⁵biċ-ċipress minn Xenir ħadmulek it-tavlar. Miċ-ċedru tal-Libanu ħadu biex jagħmlulek l-arblu.

⁶Mill-ballut ta’ Basan għamlulek l-imqadef. Il-gverta għamluhielek miċ-ċipress mill-gżejjer tal-Kittin, intarsjata bl-avorju.

⁷Għażel irrakkmat mill-Eġittu kien il-qlugħ tiegħek, u kien iservi ta’ bandiera; porpra u skarlatt minn xtut Elisa kienet it-tinda tiegħek.

⁸Ta’ Sidon u ta’ Arwad kienu l-qaddiefa tiegħek; u l-bdoti tiegħek nies imħarrġa minn Semer.

⁹Ix-xjuħ ta’ Gebal u n-nies imħarrġa tagħha kienu l-qlafat ta’ xquqek. “L-iġfien kollha tal-baħar u l-baħħara kienu jiġu għandek ipartu l-merkanzija tiegħek.

¹⁰Paras, Lud u Put kienu fl-eżerċtu tiegħek, nies gwerriera; it-tarka u l-elmu dendlu miegħek, u komplew żidulek ġmielek.

¹¹“In-nies ta’ Arwad u ta’ Ħalek kienu fuq id-dawra tas-swar tiegħek, u l-Gammedin fuq it-torrijiet; u tarkiethom dendluhom ma’ swarek dawramejt, u komplew żidulek ġmiel fuq ġmiel.

¹²“Tarsis kienet tinnegozja miegħek, minħabba l-ġid kbir li kellek; kienu jpartu l-fidda, il-ħadid, il-landa, u ċ-ċomb mal-merkanzija tiegħek.

¹³“Kienu jinneguzjaw miegħek Ġawan, Tubal u Mesek: kienu jpartu l-ilsiera u l-ħwejjeġ tal-bronż mal-merkanzija tiegħek.

¹⁴“In-nies ta’ Bet-togarma kienu jpartu żwiemel tat-tagħbija, żwiemel tal-ġiri, u bgħula mal-merkanzija tiegħek.

¹⁵“Kienu jinneguzjaw miegħek in-nies ta’ Dedan. Ħafna gżejjer il-kummerċ tagħhom kien f’idejk, u kienu jħallsuk bl-injieb tal-avorju u l-ebbanu.

¹⁶“Kien jinnegozja miegħek Edom minħabba l-ħafna xogħlijiet tiegħek; kienu jpartu miegħek il-karbunklu, il-porpra, il-brukkat, l-għażel fin, il-qroll u r-rubini mal-merkanzija tiegħek.

¹⁷“Ġuda u art Iżrael, huma wkoll kienu jinneguzjaw miegħek il-qamħ ta’ Minnit, tin, għasel, żejt, u balzmu.

¹⁸“Damasku wkoll kien jinnegozja miegħek minħabba l-ħafna xogħlijiet tiegħek u l-ġid kbir li kellek. Kienu jħallsuk bl-inbid ta’ Ħelbon u s-suf ta’ Saħar.

¹⁹U Ġawan kienu jpartu l-inbid minn Użal mal-merkanzija tiegħek; ħadid fondut, kassja u qasab tal-fwieħa kienu jpartu miegħek.

²⁰“Dedan kien ukoll jinnegozja s-sruġ għar-rkib.

²¹“L-Għarab u l-prinċpijiet ta’ Kedar huma wkoll kienu n-neguzjanti tiegħek; kienu jinneguzjaw miegħek il-ħrief, l-imtaten u l-bdabad.

²²“Il-merkanti ta’ Saba u Ragħma, huma wkoll kienu jinneguzjaw miegħek, u kienu jpartu mal-merkanzija tiegħek kull xorta ta’ ħwawar mill-aħjar u ħaġar prezzjuż u deheb.

²³“Ħaran, Kanni u Għeden, in-neguzjanti ta’ Saba, Assur, u Kilmad kienu wkoll jinneguzjaw miegħek;

²⁴kienu jpartu fis-swieq tiegħek ilbies sabiħ, imnatar tal-propra, brukkat, twapet minsuġin b’kuluri mżewqa, u ħbula mibrumin sewwa u b’saħħithom.

²⁵“U ġ-ġfien ta’ Tarsis kienu jġorrulek il-merkanzija. U hekk stagħnejt u ssebbaħt ħafna f’nofs ta’ baħar,

²⁶“Il-qaddiefa tiegħek ħarġuk f’nofs l-ibħra bejn sema u ilma, imma l-irjieħ tal-Lvant kissruk f’nofs ta’ baħar.

²⁷“Ġidek, it-tagħbija tiegħek, il-merkanzija, il-baħrin, il-bdoti, il-qlafat ta’ xquqek, in-neguzjanti ta’ ġidek, il-gwerriera tiegħek, li hemm għandek, u l-poplu tiegħek kollu jegħrqu f’qiegħ il-baħar f’jum il-ħerba tiegħek.

²⁸“Mal-ħoss tal-għajjat tal-bdoti tiegħek, tirtogħod ix-xtajta.

²⁹U jinżlu minn fuq ġfienhom, kull min jaqbad il-moqdief, u jinżlu l-art il-baħrin u l-bdoti kollha.

³⁰U jsemmgħu leħenhom minħabba fik, u jgħajtu bl-imrar f’qalbhom. Jixħtu t-trab fuq rashom, u jitmiegħku fl-irmied.

³¹Iqaxxru rashom minħabba fik, u jxiddu l-ixkejjer; jibkuk bl-imrar f’qalbhom, u b’sogħba ta’ swied il-qalb.

³²U jgħannulek lamentazzjoni, inewħu għalik u jgħidu: ‘Min kien bħal Tir, meqruda f’nofs ta’ baħar?’

³³Meta l-merkanzija tiegħek kienet toħroġ mill-ibħra, kont ixxabba’ l-ħafna popli bil-ġid kbir tiegħek; bil-merkanzija tiegħek kont tagħni s-slaten tal-art.

³⁴Issa kissrek il-baħar, u tinsab f’qiegħ l-ibħra; il-merkanzija tiegħek u l-ekwipaġġi kollha għerqu miegħek.

³⁵In-nies li jgħammru fil-gżejjer bliehu minħabba fik; u s-slaten tagħhom tkexkxu, u nxtorob wiċċhom.

³⁶In-neguzjanti fost il-popli bdew isaffrulek. Sirt il-waħx tad-dinja, spiċċajt għal dejjem!”