Read Maltese Bible with DC – IL-BIBBJA IL-KOTBA MQADDSA EŻEKJEL 29 Bible Online

EŻEKJEL 29 - Maltese Bible with DC – IL-BIBBJA IL-KOTBA MQADDSA bible

EŻEKJEL 29

¹Fl-għaxar sena[81], fit-tnax tal-għaxar xahar, ġietni l-kelma tal-Mulej, u qalli:

²“O bniedem, dawwar wiċċek lejn il-Fargħun, sultan tal-Eġittu, u ħabbar kontrih u kontra l-Eġittu kollu.

³Tkellem u għid: Dan jgħid Sidi l-Mulej: Arani kontrik, ja Fargħun, sultan tal-Eġittu, il-kukkudrill il-kbir imxaħxaħ f’nofs in-Nil, li qal: ‘Tiegħi n-Nil. Jien għamiltu.’

⁴Indaħħallek il-foxxni fi xdieqek, u nqabbadlek il-ħut tan-Nil ma’ qxurek; intellgħek min-Nil tiegħek, u l-ħut kollu tan-Nil, imqabbad ma’ qxurek.

⁵U nwaddbek fid-deżert, lilek u l-ħut kollu tan-Nil tiegħek; fuq wiċċ ir-raba’ taqa’, ma jiġbrukx u ma jidfnukx. Imma nħallik mitluq biex jikluk il-bhejjem tal-art, u l-għasafar tas-sema.

⁶U jkun jaf kull min jgħammar fl-Eġittu li jien il-Mulej, għax int kont appoġġ tal-qasab għad-dar ta’ Iżrael.

⁷U meta qabduk f’idhom, int inqsamt u ċarrattilhom ilkoll idejhom; u meta strieħu fuqek inksirt, u fekkiktilhom ilkoll ġenbejhom.

⁸“Għalhekk dan jgħid Sidi l-Mulej: ‘Arani, se nġib fuqek ix-xabla u nqaċċat minnek nies u bhejjem.

⁹U ssir l-art tal-Eġittu ħerba u xagħra, u jkunu jafu li jien il-Mulej, għax int għedt: Tiegħi n-Nil, u jien għamiltu.

¹⁰‘Għalhekk arani kontrik u n-Nil tiegħek, u nagħmel xagħra mill-art tal-Eġittu, minn Migdol sa Suweni[82] u sal-fruntieri ta’ Kus.

¹¹U ebda riġel ta’ bniedem ma jirfes fih u ebda riġel ta’ bhima ma jgħaddi minnu; u għal erbgħin sena ma jgħammar ħadd fih.

¹²‘Nagħmel mill-Eġittu art xagħrija f’nofs artijiet xagħrija oħra, u blietha għal erbgħin sena jkunu ħerbiet f’nofs bliet oħra mħarbta: inxerred l-Eġizzjani f’nofs il-ġnus u nferrixhom mal-artijiet.

¹³‘Għax dan jgħid Sidi l-Mulej: Fi tmiem l-erbgħin sena jien niġbor l-Eġizzjani minn fost il-ġnus li fihom kienu mxerrda.

¹⁴U nbiddlilhom xortihom, u nerġa’ nġibhom fl-art ta’ Patros[83], fl-art fejn tnisslu, u hemm ikunu saltna ċkejkna.

¹⁵Tkun l-iċken fost is-saltniet, u ma togħliex aktar fuq is-saltniet l-oħra; inċekkinhom biex ma jogħlewx aktar fuq il-ġnus.

¹⁶U ma jkunux aktar it-tama ta’ dar Iżrael, imma tifkira ta’ ħżunithom, ta’ meta kienu jduru għal għandhom. ‘U hekk ikunu jafu li jien il-Mulej.’ ”

¹⁷Fis-sena sebgħa u għoxrin[84], fl-ewwel tal-ewwel xahar, ġietni l-kelma tal-Mulej u qalli:

¹⁸“O bniedem, Nabukodonosor, sultan ta’ Babilonja, ħaddem bis-sħiħ l-eżerċtu tiegħu u għabbiehom b’xogħol iebes kontra Tir[85]; kull ras tfartset, kull spalla saret ġerħa waħda, u b’danakollu ma ħadu xejn minn Tir, u la hu u lanqas l-eżerċtu tiegħu, għat-taħbit li tħabtu għalih.

¹⁹Għalhekk dan jgħid Sidi l-Mulej: “Arani, se nagħti lil Nabukodonosor, sultan ta’ Babilonja, l-art tal-Eġittu u jeħodlu l-ġid tiegħu, ineżżgħu u jagħmel priża minn ħwejġu, u b’hekk iħallas l-eżerċtu tiegħu.

²⁰Għat-taħbit li tħabat kontra Tir nagħtih l-art tal-Eġittu, għax kulma għamlu, għamluh lili,” oraklu ta’ Sidi l-Mulej.

²¹Dakinhar innibbet qarn, bniedem qawwi, għal dar Iżrael, u lilek niftaħlek fommok f’nofshom, u jkunu jafu li jien il-Mulej.”