Read Maltese Bible with DC – IL-BIBBJA IL-KOTBA MQADDSA EŻEKJEL 3 Bible Online

EŻEKJEL 3 - Maltese Bible with DC – IL-BIBBJA IL-KOTBA MQADDSA bible

EŻEKJEL 3

¹U qalli: “O bniedem, kul dak kollu li ssib; kul dan il-ktieb, u mbagħad mur u kellem lil dar Iżrael.”

²Jien ftaħt ħalqi, u hu temmagħni dak il-ktieb.

³U qalli: “O bniedem, ħa jibilgħu l-istonku tiegħek, u jimtela l-ġewwieni tiegħek b’dan il-ktieb li qiegħed nagħtik.” Jien kiltu, u f’ħalqi ħassejtu ħelu għasel[9].

⁴U qalli: “O bniedem, aqbad u mur għand dar Iżrael, u wasslilhom dan il-kliem tiegħi.

⁵M’iniex nibagħtek għand poplu li kliemu ma jinftihemx u lsienu tqil; imma qed nibagħtek għand dar Iżrael.

⁶Mhux għand ġnus kbar li kliemhom ma jinftihemx u lsienhom tqil, tant li ma tifhmux; kieku bgħattek għandhom, kienu jisimgħuk.

⁷Imma d-dar ta’ Iżrael ma tridx tisma’ minnek, għax ma tridx tisma’ minni. Id-dar kollha ta’ Iżrael huma rashom iebsa u qalbhom xierfa.

⁸Imma ara, jien nagħmlek wiċċek sfiq bħalhom, rasek iebsa daqs tagħhom,

⁹u nagħmillek fehemtek aktar iebsa mid-djamant, aktar iebsa miż-żnied. La tibżax minnhom u la titwerwirx quddiemhom għax mhumiex ħlief qabda xewwiexa.”

¹⁰U qalli: “O bniedem, daħħal f’moħħok kulma ngħidlek, isimgħu sewwa,

¹¹u mur għand ulied il-poplu tiegħek itturufnati, u kellimhom. Għidilhom: ‘Dan jgħid il-Mulej’, iridu jew ma jridux jisimgħu.”

¹²Imbagħad l-ispirtu ħadni minn hemm, u warajja smajt ħoss ta’ theżżiża qawwija, filwaqt li l-glorja tal-Mulej[10] intrefgħet minn postha.

¹³Dan il-ħoss kien tal-ġwienaħ tal-ħlejjaq ħajjin, iħabbtu wieħed mal-ieħor, u ż-żaqżiq tar-roti fl-istess ħin magħhom, ħoss ta’ għagħa kbira.

¹⁴L-ispirtu refagħni u ħadni minn hemm. Tlaqt minn hemm bl-imrar f’qalbi, għax kont imqanqal sewwa f’ruħi.

¹⁵Id il-Mulej ħassejtha tqila fuqi. Wasalt Tel-abib[11] fost l-itturufnati li kienu jgħammru hemm fuq ix-xatt tax-xmara Kebar, fejn kienu joqogħdu. U qgħadt hemm miblugħ f’nofshom għal sebat ijiem.

¹⁶Fi tmiem is-sebat ijiem waslitli l-kelma tal-Mulej u qaltli:

¹⁷“O bniedem, jiena qegħedtlek għassies fuq dar Iżrael: kull meta tisma’ kelma minn fommi, inti għandek twiddibhom f’ismi.

¹⁸Meta jiena ngħid lil xi bniedem ħażin: ‘Int tmut żgur’, jekk inti ma twiddibx il-ħażin u ma tgħidlux biex jerġa’ lura minn triqtu l-ħażina ħalli huwa jgħix, il-ħażin imut minħabba l-ħażen tiegħu, imma jiena minn idejk infittex demmu.

¹⁹Imma jekk inti twiddeb lill-ħażin, u dan ma jerġax lura mid-dnub tiegħu u minn triqtu l-ħażina, huwa jmut minħabba ħżunitu, imma int tkun salvajt ħajtek.

²⁰“Jekk il-ġust iwarrab minn qdusitu u jagħmel il-ħażen, u jiena nfixklu, huwa jmut; billi inti ma tkunx widdibtu, huwa jmut minħabba l-ħtija tiegħu, u jien ma niftakarlux l-għemil tajjeb tiegħu; imma jien minn idejk infittex demmu.

²¹Imma jekk inti twiddeb lill-ġust biex ma jidnibx, u hu ma jidnibx, huwa jgħix għax inti tkun widdibtu, u int tkun salvajt ħajtek.”

²²U kienet hemm id il-Mulej fuqi u qalli: “Qum u mur lejn il-wita u nkellmek hemm.”

²³U jien qomt u ħriġt lejn il-wita u, ara, kien hemm wieqfa l-glorja tal-Mulej, bħall-glorja li kont rajt ħdejn ix-xmara Kebar, u waqajt wiċċi fl-art.

²⁴U daħal fija l-ispirtu u waqqafni fuq riġlejja, kellimni u qalli: “Mur ingħalaq ġo darek.

²⁵Ara, o bniedem, se jixħtu fuqek il-ħbula tagħhom u jorbtuk bihom, u ma tkunx tista’ toħroġ f’nofshom.

²⁶U nwaħħallek ilsienek ma’ saqaf ħalqek, u titbikkem[12], u ma tkellimhomx ta’ bniedem li jċanfarhom, għax huma razza ta’ nies rashom iebsa.

²⁷Imma meta nkellmek, iftaħ fommok u kellimhom u għidilhom: ‘Dan jgħid Sidi l-Mulej: Jisma’ min irid, u min ma jridx ma jismax, għax huma nies ta’ razza rashom iebsa.”