Read Maltese Bible with DC – IL-BIBBJA IL-KOTBA MQADDSA EŻEKJEL 34 Bible Online

EŻEKJEL 34 - Maltese Bible with DC – IL-BIBBJA IL-KOTBA MQADDSA bible

EŻEKJEL 34

¹U ġietni l-kelma tal-Mulej u qalli:

²“O bniedem, ħabbar kontra r-rgħajja ta’ Iżrael[92]. Ħabbar u għidilhom lir-rgħajja: ‘Hekk jgħid Sidi l-Mulej: Ħażin għalihom ir-rgħajja ta’ Iżrael li jirgħu lilhom infushom! Jaqaw mhux lin-nagħaġ jirgħu r-rgħajja?’

³“Intom tixorbu l-ħalib u tilbsu s-suf tagħhom, toqtlu n-nagħaġ imsemmna, u l-merħla ma tirgħuhiex.

⁴“Id-dgħajfa ma saħħaħtuhiex, u l-marida ma fejjaqtuhiex, u l-midruba ma dewwejtuhiex, ’l dik li tbiegħdet ma ġibtuhiex lura, lanqas ma fittixtu l-mitlufa. Imma mexxejtuhom b’saħħa u qalb iebsa.

⁵“U huma xterdu għax ma kellhomx ragħaj; u saru l-ikel ta’ kull bhima selvaġġa u xterdu.

⁶Intilfet il-merħla tiegħi fuq kull muntanja u fuq kull għolja; ma’ wiċċ l-art kollha xterdet il-merħla tiegħi, u ma hemm ħadd min jistaqsi għaliha, ma hemm ħadd min ifittixha.’

⁷“Għalhekk, ja rgħajja, isimgħu l-kelma tal-Mulej.

⁸“Daqs kemm jien ħaj, jgħid Sidi l-Mulej, billi l-merħla tiegħi waqgħet priża, u saret il-merħla tiegħi l-ikel ta’ kull bhima selvaġġa għax ma kienx hemm ragħaj, u billi r-rgħajja tiegħi ma fittxewx il-merħla tiegħi, u r-rgħajja qagħdu jirgħu lilhom infushom bla ma jirgħu l-merħla tiegħi,

⁹għalhekk, ja rgħajja, isimgħu l-kelma tal-Mulej.

¹⁰“Hekk jgħid Sidi l-Mulej: ‘Arawni ġej għar-rgħajja, neħdilhom minn taħt idejhom in-nagħaġ tiegħi, u ma nħallihomx jirgħu iżjed il-merħla. U ma jirgħux iżjed ir-rgħajja lilhom infushom. ‘U jien insalva l-merħla tiegħi minn ġo ħalqhom, u ma tibqax aktar l-ikel tagħhom.’

¹¹“Għax dan jgħid Sidi l-Mulej: ‘Arawni, hekk jien se nfittex in-nagħaġ tiegħi u nieħu ħsiebhom.

¹²Bħalma r-ragħaj jaħseb fil-merħla tiegħu meta jsib ruħu f’nofs in-nagħaġ imxerrda tiegħu, hekk naħseb jien fin-nagħaġ tiegħi, u nsalvahom minn kull fejn xterdu fi żmien is-sħab u s-swied tal-ajru.

¹³Noħroġhom minn qalb il-popli, niġborhom mill-artijiet, nġibhom lejn arthom. Nirgħahom fuq il-muntanji ta’ Iżrael, fil-widien u l-meddiet kollha tal-art.

¹⁴F’mergħat bnina għad nirgħahom, u fuq l-iġbla għolja ta’ Iżrael tkun mergħathom. Hemm jinxteħtu f’mergħa bnina, u jimirħu f’art tajba fuq il-muntanji ta’ Iżrael.

¹⁵Jiena stess nirgħa n-nagħaġ tiegħi, u jiena nserraħhom, oraklu ta’ Sidi l-Mulej.

¹⁶Jiena nfittex il-mitlufa, irreġġa’ lura l-imxerrda, ninfaxxa l-ġrieħi tal-miġrugħa, u nqawwi l-marida. Inħares is-smina u l-qawwija, u nirgħahom bil-ġustizzja.”

¹⁷“Imma għalik, merħla tiegħi, hekk jgħid Sidi l-Mulej: ‘Ara, jien nagħmel ħaqq bejn nagħġa u nagħġa, bejn imtaten u bdabad.

¹⁸“Ma kienx biżżejjed għalikom li tirgħu fl-aħjar mergħat, biex tgħaffġu b’riġlejkom il-bqija ta’ mergħatkom; li tixorbu l-ilma ċar, u ddardru l-bqija b’riġlejkom?

¹⁹U l-merħla tiegħi jkollhom jirgħu tagħfiġ riġlejkom, u jixorbu dardir saqajkom!

²⁰“Għalhekk dan jgħidilkom Sidi l-Mulej: Arawni! Se nagħmel ħaqq bejn in-nagħġa s-smina u n-nagħġa l-magħluba.

²¹“Għax intom imbuttajtu b’ġenbejkom u bi spallejkom, u bi qrunkom ħbattu għad-dgħajfa, sakemm gerrixtuhom ’il barra.

²²“Jien insalva n-nagħaġ tiegħi, u ma jkunux aktar priża, u nagħmel ħaqq bejn nagħġa u oħra.

²³“U nqiegħed fuqhom ragħaj wieħed, il-qaddej tiegħi David, u jieħu ħsiebhom u jirgħahom; hu jirgħahom u jkun ir-ragħaj tagħhom.

²⁴U jiena l-Mulej, inkun Alla tagħhom u l-qaddej tiegħi David ikun il-mexxej tagħhom. Jiena il-Mulej, tkellimt.

²⁵Nagħmel magħhom patt ta’ sliem u neqred mill-art il-bhejjem selvaġġi. Ikunu jistgħu jgħammru fid-deżert bla biża’ u jorqdu fl-imsaġar.

²⁶Inqegħedhom madwar l-għolja tiegħi, u nibgħat ix-xita f’waqtha, xita ta’ barka.

²⁷U s-siġar tar-raba’ jagħtu l-frott tagħhom, u l-art in-nebbieta tagħha, u huma joqogħdu bla biża’ fl-irziezet tagħhom. U huma jagħrfu li jiena l-Mulej meta nkisser l-irbit tal-madmad tagħhom, u neħlishom minn idejn dawk li ijassruhom.

²⁸Ma jkunux aktar priża għall-ġnus, u ma jikluhomx aktar il-bhejjem selvaġġi tal-art, imma jgħixu bi kwiethom u ħadd ma jbeżżagħhom aktar.

²⁹“U nnibbtilhom ġmiel ta’ ħxejjex u ma jkunux aktar mifnijin mill-ġuħ fil-pajjiż, u lanqas jitgħabbew bit-tagħjir tal-ġnus.

³⁰U jkunu jafu li jiena l-Mulej, Alla tagħhom, jiena magħhom u huma l-poplu tiegħi, id-dar ta’ Iżrael, oraklu ta’ Sidi l-Mulej.

³¹U intom, in-nagħaġ tiegħi, intom in-nagħaġ tal-mergħa tiegħi, jiena l-Mulej, Alla tagħkom, oraklu ta’ Sidi l-Mulej.”