Read Maltese Bible with DC – IL-BIBBJA IL-KOTBA MQADDSA EŻEKJEL 35 Bible Online

EŻEKJEL 35 - Maltese Bible with DC – IL-BIBBJA IL-KOTBA MQADDSA bible

EŻEKJEL 35

¹Ġara li ġiet fuqi l-kelma tal-Mulej, u qalli:

²“O bniedem, dawwar wiċċek lejn il-muntanja ta’ Xegħir[93], u ħabbar kontriha,

³u għidilha: ‘Dan jgħid Sidi l-Mulej: Arani! Jien kontrik, muntanja ta’ Xegħir, kontrik immidd idi, u nagħmel minnek ħerba fuq ħerba.

⁴Blietek nagħmilhom ħerba, u ħerba ssir minnek! U mbagħad tkun taf li jien il-Mulej!

⁵“Int dejjem kellek l-odju għal ulied Iżrael u rħejthom għall-qawwa tax-xabla fi żmien il-qerda tagħhom, fi żmien l-aħħar ħtija.

⁶“Għalhekk, daqs kemm jien ħaj, oraklu tal-Mulej, għad-demm ħejjejtek, u d-demm jiġri warajk; int bgħadt lil demmek u d-demm għad jiġri warajk.

⁷Nagħmel minn Xegħir ħerba u deżert, u neqred minnha ’l min ġej u sejjer.

⁸U nimla bil-mejtin il-muntanji tiegħek; u għoljietek, widienek, il-ħniedaq tiegħek fihom għad jaqgħu l-maqtulin bix-xabla.

⁹Nagħmel minnek ħerba għal dejjem, u blietek aktar ma jitgħammrux; imbagħad tkunu tafu li jien il-Mulej.

¹⁰“Int għedt: ‘Iż-żewġ popli u ż-żewġ pajjiżi[94] huma tiegħi u rrid neħodhom’, għalkemm kien hemm il-Mulej;

¹¹għalhekk, daqs kemm jien ħaj, oraklu ta’ Sidi l-Mulej, inġib ruħi miegħek skont l-għadab u l-għira tiegħek, li bihom ġibt ruħek magħhom skont il-mibegħda tiegħek, u nurik x’jien meta nagħmel ħaqq minnek.

¹²U tkun taf li jien il-Mulej. Smajt it-tagħjir kollu li int lissint kontra l-muntanji ta’ Iżrael meta għedt: ‘Saru ħerba! Hekk lesti għalina biex nibilgħuhom.’

¹³“Tkabbartu kontrija b’fommkom u kattartu kliemkom kontrija, u jiena smajt.

¹⁴“Dan jgħid Sidi l-Mulej: Bħalma fraħt int minħabba l-ħerba ta’ arti, hekk nagħmel lilek.

¹⁵Bħalma fraħt int bit-tħarbit tal-wirt ta’ dar Iżrael, hekk nagħmel minnek. Ħerba għad tkun il-muntanja ta’ Xegħir u Edom kollu jisfa’ fix-xejn. U mbagħad ikunu jafu li jien il-Mulej.”