Read Maltese Bible with DC – IL-BIBBJA IL-KOTBA MQADDSA EŻEKJEL 37 Bible Online

EŻEKJEL 37 - Maltese Bible with DC – IL-BIBBJA IL-KOTBA MQADDSA bible

EŻEKJEL 37

¹U ġiet fuqi id il-Mulej u ħaditni fl-ispirtu tal-Mulej u qegħditni f’nofs il-wied. Dan kien miżgħud bl-għadam[96].

²Huwa għaddieni dawramejt madwarhom, u kien hemm kotra kbira mxerrda mal-wied, u kienu kollha niexfa qoxqox.

³U l-Mulej qalli: “O bniedem, jista’ dan l-għadam jerġa’ jieħu l-ħajja?” Jiena weġibt: “Sidi Mulej, dan inti tafu.”

⁴U qalli: ‘Ħabbar lil dan l-għadam u għidlu: O għadam niexef, isma’ l-kelma tal-Mulej.

⁵Hekk qal Sidi l-Mulej: Ara, jien se nġib fik ir-ruħ, inti terġa’ tgħix.

⁶U nqiegħed fik in-nervi, u ntellagħlek il-laħam, u niksik bil-ġilda, u nqiegħed fik ir-ruħ. U inti terġa’ tgħix, u tkun taf li jiena l-Mulej.”

⁷Imbagħad ħabbart kif ordnali. U jiena u nħabbar instama’ ħoss, u ara, l-għadam tqanqal, u kollha bdew resqin lejn xulxin, għadma lejn għadma.

⁸Jien ħarist, u ara, ġew fihom in-nervi, telgħalhom il-laħam, fuqhom infirxet il-ġilda, imma nifs ma kienx hemm fihom.

⁹U qalli: “Ħabbar lir-ruħ, ħabbar, o bniedem, u għid lir-ruħ: Hekk qal Sidi l-Mulej: Ejja, ruħ, mill-erbat irjieħ tad-dinja, onfoħ fuq dawn il-mejtin, ħa jerġgħu jieħdu l-ħajja.”

¹⁰Jien ħabbart kif ordnali, u r-ruħ daħlet fihom, u reġgħu ħadu l-ħajja, u waqfu fuq riġlejhom, eżerċtu kbir fuq li kbir.

¹¹U qalli: “O bniedem, dan l-għadam huwa d-dar kollha ta’ Iżrael. Ara, huma jgħidu: ‘Nixef għadamna, it-tama tagħna għabet, inqridna għalkollox.’

¹²Għalhekk ħabbrilhom u għidilhom: Hekk qal Sidi l-Mulej: Ara, jiena niftaħ l-oqbra tagħkom, poplu tiegħi, u nġibkom lura f’art Iżrael.

¹³Imbagħad tkunu tafu li jiena l-Mulej, meta niftaħ l-oqbra tagħkom u ntellagħkom mill-oqbra tagħkom, poplu tiegħi.

¹⁴U jiena nqiegħed ruħi fikom, u terġgħu tieħdu l-ħajja. Inqegħedkom f’artkom u tkunu tafu li jiena l-Mulej. Hekk għedt, u hekk nagħmel, oraklu tal-Mulej.”

¹⁵U ġietni l-kelma tal-Mulej, u qalli:

¹⁶“O bniedem, ħu biċċa injama[97] u ikteb fuqha, ‘Għal Ġuda u għal ulied Iżrael li hemm miegħu.’ Imbagħad ħu biċċa oħra u ikteb fuqha, ‘Għal Ġużeppi, il-ħatar ta’ Efrajm, u għad-dar kollha ta’ Iżrael li hemm miegħu.’

¹⁷“Imbagħad ressaqhom lejn xulxin biex jingħaqdu f’injama waħda f’idejk.

¹⁸U meta wlied il-poplu tiegħek ikellmuk u jgħidulek, ‘Ma tfissrilniex xi trid tgħid b’dan?’

¹⁹għidilhom: Dan jgħid il-Mulej Sidi: Araw, se nieħu l-ħatar ta’ Ġużeppi, li hemm f’id Efrajm, u t-tribujiet ta’ Iżrael li hemm miegħu, u nqiegħed miegħu l-ħatar ta’ Ġuda u nagħmilhom ħatar wieħed, biex isiru ħaġa waħda f’idi.’

²⁰“Żomm f’idek quddiem għajnejhom iż-żewġ injamiet li fuqhom ktibt,

²¹u għidilhom: ‘Dan jgħid Sidi l-Mulej: Araw, se nieħu lil ulied Iżrael minn fost il-ġnus fejn marru, niġmagħhom minn kull naħa u nġibhom f’arthom.

²²U nagħmilhom ġens wieħed fil-pajjiż, fuq il-muntanji ta’ Iżrael; sultan wieħed ikun is-sultan tagħhom ilkoll. Ma jibqgħux iżjed żewġt iġnus, ma jibqgħux iżjed maqsuma f’żewġ saltniet.

²³Ma jitniġġsux aktar bl-allat foloz u l-ħwejjeġ moqżieża tagħhom, u b’ebda dnub ieħor minn tagħhom. Jien għad insalvahom mid-dnubiet li firduhom minni, jiena nsaffihom; u huma jkunu għalija l-poplu tiegħi, u jiena nkun għalihom Alla tagħhom.

²⁴“Il-qaddej tiegħi David ikun is-sultan tagħhom, u huma lkoll ikollhom ragħaj wieħed fuq kulħadd. Huma jimxu fuq il-preċetti tiegħi, u jħarsu l-liġijiet tiegħi u jżommuhom.

²⁵U jgħammru fl-art li jien kont tajt lill-qaddej tiegħi Ġakobb, l-art li fiha għammru missirijiethom; jgħammru fiha huma u wliedhom u wlied uliedhom għal dejjem. U l-qaddej tiegħi David ikun il-prinċep fuqhom għal dejjem.

²⁶Nagħmel magħhom patt ta’ sliem, ikun patt magħhom għal dejjem; inwettaqhom u nkattarhom, u nqiegħed fosthom għal dejjem is-santwarju tiegħi.

²⁷Fosthom tkun l-għamara tiegħi, u jiena nkun Alla tagħhom, u huma jkunu l-poplu tiegħi.

²⁸Imbagħad jagħrfu l-ġnus li jiena l-Mulej li nqaddes lil Iżrael, meta s-santwarju tiegħi jkun fosthom għal dejjem.”