Read Maltese Bible with DC – IL-BIBBJA IL-KOTBA MQADDSA EŻEKJEL 39 Bible Online

EŻEKJEL 39 - Maltese Bible with DC – IL-BIBBJA IL-KOTBA MQADDSA bible

EŻEKJEL 39

¹U int, o bniedem, ħabbar kontra Gog u għidlu: Dan jgħid Sidi l-Mulej: Arani, jien kontrik Gog, il-prinċep il-kbir ta’ Mesek u Tubal.

²Jien indawrek, insuqek u ntellgħek mill-ibgħad trufijiet tat-Tramuntana u nġibek fuq il-muntanji ta’ Iżrael,

³imma jien inkissirlek il-qaws mix-xellugija u nwaqqagħlek il-vleġeġ mil-leminija.

⁴Fuq il-muntanji ta’ Iżrael taqa’ int u l-qtajja’ tiegħek u l-popli li jkunu miegħek. U nitilqek b’ikel għat-tjur kollha tal-priża u l-bhejjem tax-xagħri.

⁵Fuq wiċċ ir-raba’ għad taqa’, għax jien tkellimt, oraklu ta’ Sidi l-Mulej.

⁶“Jien nibgħat in-nar fuq Magog u fuq in-nies li jgħammru fuq ix-xtut bi kwiethom, u jkunu jafu li jien il-Mulej.

⁷“U ismi l-qaddis ngħarraf f’nofs Iżrael, il-poplu tiegħi, u ma nħallix li ismi l-qaddis jitkasbar iżjed, u l-ġnus ikunu jafu li jien il-Mulej, il-Qaddis f’Iżrael.

⁸Araw: Dan għad jasal u jseħħ, oraklu ta’ Sidi l-Mulej. Dan hu l-Jum li jien minnu tkellimt.

⁹“U joħorġu n-nies li jgħammru fl-ibliet ta’ Iżrael, ikebbsu n-nar u jaħarqu t-tagħmir tal-gwerra; tarki kbar u żgħar, qwas u vleġeġ, mazez u lanez, u jdumu jkebbsu n-nar bihom għal seba’ snin sħaħ.

¹⁰Ma jkollhomx bżonn jiġbru l-ħatab mir-raba’ u ma jaqtgħux mill-foresti, għax bit-tagħmir tal-gwerra jkebbsu n-nar. Ineżżgħu lil dawk stess li neżżgħu lilhom minn ġidhom, u jagħmlu l-priża minn dawk li jkunu għamlu priża minnhom, oraklu ta’ Sidi l-Mulej.

¹¹“U jiġri dakinhar li nagħti lil Gog b’qabar post imsemmi f’Iżrael, Wied Għabarim, fuq il-Lvant tal-baħar, li jagħlaq it-triq għal dawk li jgħaddu minn hemm, għax hemm għad jidfnu lil Gog u l-kotra tiegħu kollha, u jsejħulu Wied Ħamon-gog.

¹²Seba’ xhur sħaħ jieħdu d-dar ta’ Iżrael biex jidfnuhom u jnaddfu l-pajjiż.

¹³Jidfinhom il-poplu kollu tal-pajjiż u jkollhom isem dakinhar li nissebbaħ jien, oraklu ta’ Sidi l-Mulej.

¹⁴“U jqabbdu xi nies li jduru dejjem il-pajjiż u jidfnu l-katavri li jkun għad fadal fuq wiċċ l-art biex inaddfuha. Għal seba’ xhur sħaħ idumu jfittxu.

¹⁵Kull meta jkunu jduru l-art u xi ħadd minnhom jara xi għadma ta’ bniedem, iwaqqfu plier ħdejha, sa ma d-deffiena jidfnuha f’Wied Ħamon-gog.

¹⁶U l-belt ukoll isemmuha Ħamona. U hekk inaddfu l-art.

¹⁷“U int, o bniedem, dan jgħid Sidi l-Mulej: Għid lil kull xorta ta’ tajra u ’l kull xorta ta’ bhima tax-xagħri: ‘Inġabru u ejjew, inġemgħu minn kull naħa għall-qatla tiegħi, li jien se nagħmlilkom, qatla kbira fuq il-muntanji ta’ Iżrael, u tieklu l-laħam u tixorbu d-demm.

¹⁸Tieklu laħam il-qalbenin u tixorbu demm il-prinċpijiet ta’ kull pajjiż: imtaten, ħrief, bdabad, għoġiela, kollha bhejjem smien minn Basan.

¹⁹U tieklu laħam grass sa tixbgħu, u tixorbu demm sa tiskru, mill-qatla li jien ħejjejt għalikom.

²⁰Fuq il-mejda tiegħi tixbgħu bi żwiemel u rikkieba, bil-qalbenin u nies tal-gwerra, oraklu ta’ Sidi l-Mulej.

²¹“B’hekk nuri l-glorja tiegħi fost il-ġnus, u jaraw il-ġnus kollha l-ħaqq tiegħi li jien għamilt u idi li meddejt fuqhom.

²²U jkunu jafu d-dar ta’ Iżrael minn dakinhar ’il quddiem li jien il-Mulej Alla tagħkom.

²³U jkunu jafu l-ġnus li l-poplu ta’ Iżrael kien itturufnat minħabba ħżunitu, u għax imxew ħażin miegħi jien ħbejt wiċċi minnhom, u rħejthom f’idejn l-għedewwa tagħhom, u lkoll waqgħu taħt ix-xabla.

²⁴Skont tniġġishom u skont dnubiethom imxejt magħhom, u ħbejt wiċċi minnhom.

²⁵“Għalhekk dan jgħid Sidi l-Mulej: Issa nbiddel ix-xorti ta’ Ġakobb u nħenn għad-dar kollha ta’ Iżrael, għax jien għajjur għal ismi l-qaddis.

²⁶Huma għad jinsew l-għajb tagħhom u l-qerq li qarrqu bija meta jibdew jgħammru fil-pajjiż bi kwiethom bla biża’ ta’ ħadd.

²⁷Meta nkun reġġajthom lura minn fost il-ġnus u ġbarthom mill-artijiet tal-għedewwa tagħhom, imbagħad nuri qdusiti bihom f’għajnejn il-kotra tal-ġnus.

²⁸U jkunu jafu li jien il-Mulej Alla tagħhom meta, wara li nkun itturufnajthom fost il-ġnus, inkun ġbarthom f’arthom u ma nkun ħallejt ’il ħadd minnhom hemm.

²⁹Wiċċi ma naħbihx aktar minnhom għax inkun sawwabt l-ispirtu tiegħi fuq id-dar ta’ Iżrael, oraklu ta’ Sidi l-Mulej.”