Read Maltese Bible with DC – IL-BIBBJA IL-KOTBA MQADDSA EŻEKJEL 41 Bible Online

EŻEKJEL 41 - Maltese Bible with DC – IL-BIBBJA IL-KOTBA MQADDSA bible

EŻEKJEL 41

¹U daħħalni fis-santwarju u kejjel il-pilastri, u kienu wesgħin sitt idriegħ minn ġenb u sitt idriegħ mill-ieħor.

²Il-wisa’ tal-bieb kien għaxart idriegħ u l-ġnub tal-bieb kienu ħamest idriegħ minn naħa u ħamsa min-naħa l-oħra. U kejjel ukoll it-tul tiegħu, u kien erbgħin driegħ ħxuna u l-wisa’ għoxrin driegħ.

³U daħal ġewwa u kejjel il-pilastri tad-daħla, żewġt idriegħ; il-bieb kien sitt idriegħ, u l-wisa’ tiegħu sebat idriegħ.

⁴U kejjel it-tul tiegħu li kien għoxrin driegħ, u l-wisa’ għoxrin driegħ ieħor ’il ġewwa min-nava. U qalli: “Dan hu l-Post il-Qaddis.”

⁵Kejjel il-ħajt tas-santwarju: sitt idriegħ ħxuna u l-wisa’ tal-bini tal-ġenb erbat idriegħ, dawramejt mas-santwarju.

⁶Kien hemm mal-ġnub tliet sulari fuq xulxin, bi tletin kamra kull wieħed. Kien hemm bħal xfar madwar is-santwarju biex fuqhom iserrħu dawn il-kmamar, u hekk ma jkunux imqabbdin ġol-ħajt tas-santwarju.

⁷U l-kmamar kienu jitwessgħu aktar ma kienu jogħlew ’il fuq skont il-qjies tax-xfar minn sular għal sular madwar is-santwarju, għax il-ħxuna tal-ħajt tas-santwarju kienet tonqos aktar ma kienet togħla ’l fuq. Kien hemm ukoll garigor jagħti għal fuq, u hekk kont titla’ mis-sular ta’ taħt nett, għas-sular tan-nofs, u mbagħad għas-sular ta’ fuq nett.

⁸U rajt madwar is-santwarju s-sisien tal-kmamar tal-ġnub; kienu għoljin qasba sħiħa ta’ sitt idriegħ tul.

⁹U l-ħxuna tal-ħajt tal-kmamar tal-ġnub kienet ta’ ħamest idriegħ; kienu għoljin qasba sħiħa u l-bankina kienet wiesgħa ħamest idriegħ.

¹⁰Bejn il-kmamar tal-ġenb tas-santwarju u bejn il-kmamar ta’ barra kien hemm għoxrin driegħ madwar is-santwarju dawramejt.

¹¹U l-bibien tal-kmamar tal-ġenb kienu jagħtu għal fuq il-bankina vojta: bieb wieħed fuq in-naħa tat-Tramuntana u bieb ieħor fuq in-Nofsinhar, u l-wisa’ vojt tal-bankina kien ta’ ħamest idriegħ dawramejt.

¹²U l-bini li kien biswit il-wesgħa vojta, fuq in-naħa tal-Punent, kien wiesa’ sebgħin driegħ, u l-ħajt tal-bini kien oħxon ħamest idriegħ dawramejt u twil disgħin driegħ.

¹³U kejjel is-santwarju li kien fih mitt driegħ tul u l-wesgħa vojta u l-bini u l-ħitan tiegħu kienu mitt driegħ tul.

¹⁴U l-wisa’ tal-faċċata tas-santwarju u l-wesgħa vojta n-naħa tal-Lvant kienu wkoll mitt driegħ.

¹⁵Kejjel ukoll it-tul tal-bini biswit il-bitħa, fuq in-naħa ta’ wara, u l-ħitan tiegħu, minn tarf sa tarf, u kienu ta’ mitt driegħ. Is-santwarju, il-post ta’ ġewwa u l-portiku ta’ barra,

¹⁶l-għetiebi, it-twieqi falza skorra u l-ħitan dawramejt, it-tlieta, sa mill-għatba, kienu miksija bl-injam dawramejt. Mill-art sat-twieqi, li kienu mgħottija,

¹⁷sa ’l fuq mill-bieb, sal-parti ta’ ġewwa nett tat-tempju, fuq barra u fuq kull ħajt dawramejt, minn ġewwa u minn barra,

¹⁸kien hemm xbihat minquxa: kerubini u palm, palma bejn kerubin u ieħor. Kull kerubin kellu żewġt uċuħ:

¹⁹wiċċ ta’ bniedem iħares lejn palma minn naħa u wiċċ ta’ ljun iħares lejn palma min-naħa l-oħra, minquxa mas-santwarju kollu dawramejt.

²⁰Mill-art sa ’l fuq mill-bieb kien hemm imnaqqxin fil-ħajt tas-santwarju dawramejt kerubini u palm.

²¹Il-ġnub tal-bieb tas-santwarju kienu kwadri u quddiem il-Post il-Qaddis kien hemm xi ħaġa tixbah

²²lil artal tal-injam, għoli tlitt idriegħ u twil żewġt idriegħ u żewġt idriegħ wiesa’. Kellu l-kantunieri, il-maqgħad u l-ġnub tiegħu tal-injam. U qalli: “Din hi l-mejda ta’ quddiem il-Mulej.”

²³Il-Post il-Qaddis u l-Post Qaddis kellhom żewġ bibien kull wieħed;

²⁴kull bieb kellu żewġ battenti, u kull battent kien b’żewġ tebqiet jiltwew fuq xulxin, tnejn għal battent u tnejn għall-ieħor.

²⁵Fuq il-bibien tal-Post Qaddis kien hemm minquxa kerubini u palm, bħalma kien hemm fuq il-ħitan. Kien hemm ukoll tisqifa tal-injam quddiem il-portiku minn barra;

²⁶u t-twieqi falza skorra, u palm minqux fuq kull naħa fuq il-ġnub tal-portiku, il-bini mal-ġnub tat-tempju u t-tisqifa.