Read Maltese Bible with DC – IL-BIBBJA IL-KOTBA MQADDSA EŻEKJEL 44 Bible Online

EŻEKJEL 44 - Maltese Bible with DC – IL-BIBBJA IL-KOTBA MQADDSA bible

EŻEKJEL 44

¹U raġa’ ħadni lejn il-bieb ta’ barra tat-tempju, li jħares lejn il-Lvant: dan kien magħluq.

²U qalli: “Dan il-bieb jibqa’ magħluq[105]: m’għandux jinfetaħ, u ħadd m’għandu jgħaddi minnu għax il-Mulej, Alla ta’ Iżrael, għadda minnu, għalhekk għandu jibqa’ magħluq.

³Il-prinċep, għax hu prinċep, jista’ joqgħod bilqiegħda fih, u jiekol l-ikel quddiem il-Mulej[106], imma jidħol u joħroġ mill-portiku.” Oraklu ta’ Sidi l-Mulej.

⁴U ħadni lejn il-bieb tat-Tramuntana biswit is-santwarju u, araw, jien rajt il-glorja tal-Mulej timla s-santwarju tal-Mulej u nxtħett wiċċi fl-art.

⁵U qalli l-Mulej: “O bniedem, moħħok hawn! Ara b’għajnejk u isma’ b’widnejk kulma se ngħidlek fuq il-preskrizzjonijiet kollha ta’ dar il-Mulej u l-liġijiet tagħha, u żomm sewwa f’qalbek dwar min jista’ jidħol fit-tempju u min għandu jibqa’ barra mis-santwarju.

⁶“U għid lix-xewwiexa ta’ dar Iżrael: ‘Dan jgħid Sidi l-Mulej: Ma kienx biżżejjed għalikom l-għemil mistkerrah tagħkom, dar Iżrael,

⁷biex daħħaltu l-barrani[107] bla ħtin f’qalbu u bla ħtin f’ġismu, fit-tempju tiegħi biex niġġistuh, waqt li kontu toffruli l-ħobż u x-xaħam u d-demm; u ġibtu fix-xejn il-patt tiegħi bl-għemejjel tagħkom?

⁸Flok ħadtu ħsieb il-ħwejjeġ qaddisa intom, qabbadtu oħrajn iservuni fit-tempju tiegħi.

⁹Għalhekk dan jgħid Sidi l-Mulej: Ebda barrani, bla ħtin f’qalbu u bla ħtin f’ġismu, ma jidħol fit-tempju tiegħi; ebda barrani minn dawk li jgħammru fost ulied Iżrael.

¹⁰“Il-Leviti, imbagħad, li tbiegħdu minni meta Iżrael twarrab minni għal wara allathom, ikollhom jitgħabbew bil-ħażen tagħhom.

¹¹Ikollhom iservu fit-tempju tiegħi bħala għases fil-bwieb tat-tempju u qaddejja tat-tempju; joqtlu l-vittma għas-sagrifiċċju tal-ħruq u l-vittmi l-oħra għall-poplu, u huma jibqgħu hemm biex iservuhom.

¹²Għax huma kienu jservuhom quddiem l-allat tagħhom u kienu huma li waqqgħu lil dar Iżrael fil-ħażen. Għalhekk jien erfajt idejja u ħlift kontrihom, oraklu ta’ Sidi l-Mulej, huma jħallsu ta’ dnubhom.

¹³Ma jersqux lejja biex iservuni ta’ qassisin, lanqas jersqu lejn il-ħwejjeġ ikkonsagrati u l-aktar qaddisa tiegħi, imma jħallsu għall-għajb tagħhom u l-għarukażijiet li għamlu.

¹⁴Nagħmilhom servi tat-tempju[108], għax-xogħol kollu tiegħu u kulma jsir fih.

¹⁵“Il-qassisin Leviti, nisel Sadok, li ħadu ħsieb is-servizz tat-tempju tiegħi meta twarrbu minni wlied Iżrael, huma jersqu lejja biex iservuni u jibqgħu quddiemi biex joffruli x-xaħam u d-demm, oraklu ta’ Sidi l-Mulej.

¹⁶Huma jidħlu fit-tempju tiegħi, u huma jersqu lejn il-mejda tiegħi biex iservuni, u jħarsu s-servizzi tiegħi.

¹⁷“Meta jiġu biex jidħlu mill-bieb tal-bitħa ta’ ġewwa, għandhom jilbsu lbies tal-għażel, u m’għandhomx ikollhom fuqhom ħwejjeġ tas-suf waqt is-servizz tagħhom fil-bieb tal-bitħa ta’ ġewwa jew tas-santwarju.

¹⁸Għandu jkollhom turbanti tal-għażel fuq rashom u srawal tal-għażel ma’ qaddhom; ma jitħażżmux bi ħwejjeġ li jġagħluhom jegħrqu.

¹⁹Meta joħorġu fil-bitħa ta’ barra lejn il-poplu, jinżgħu lbieshom li jkunu għamlu s-servizz bih u jqegħduh fil-kmamar tas-santwarju, u mbagħad ixiddu lbies ieħor biex ma jqaddsux il-poplu bi ħwejjiġhom[109].

²⁰Ma jqaxxrux il-qorriegħa ta’ rashom, u lanqas m’għandhom iħallu xagħarhom jitwal, imma jżommuh maqtugħ sewwa.

²¹L-ebda qassis m’għandu jixrob inbid meta jidħol fil-bitħa ta’ ġewwa.

²²Lanqas m’għandhom jieħdu b’marthom mara armla jew miċħuda minn żewġha, imma jieħdu xebbiet minn nisel Iżrael jew xi armla minn xi qassis.

²³“Għandhom juru lill-poplu tiegħi kif jagħżel dak li hu sagru minn dak li hu profan, u jgħallmuhom jagħżlu bejn dak li hu mniġġes u dak li hu nadif.

²⁴“Fil-kawżi jagħmluha ta’ mħallfin huma: jaqtgħu s-sentenza skont il-liġijiet tiegħi, u jħarsu l-liġijiet u l-preċetti tiegħi fil-festi kollha tiegħi, u jqaddsu Sibtijieti.

²⁵“Ma jersqux lejn bniedem mejjet, għax jitniġġsu. Jistgħu jitniġġsu biss jekk ikun missier, omm, iben, bint, ħu jew oħt li ma jkollhiex raġel.

²⁶Wara li wieħed ikun tnaddaf, jgħodd sebat ijiem;

²⁷u dakinhar li jidħol fis-santwarju, fil-bitħa ta’ ġewwa, biex jagħmel is-servizz fis-santwarju, joffri sagrifiċċju tal-purifikazzjoni, oraklu ta’ Sidi l-Mulej.

²⁸“Wirt ma jkollhomx, għax jiena wirthom, u ma tingħatalhom ebda proprjetà f’Iżrael, jiena l-proprjetà tagħhom.

²⁹L-offerti tal-qamħ, u l-vittmi għas-sagrifiċċji tal-purifikazzjoni u tar-riparazzjoni, jikluhom huma; u kulma jkun ikkonsagrat f’Iżrael ikun tagħhom.

³⁰Lill-qassisin imiss l-aħjar tal-bikri ta’ kull xorta u kull għotja mill-offerti tagħkom ta’ kull xorta; u l-aħjar tal-għaġna tagħkom tagħtuh lill-qassisin, biex tniżżel il-barka fuq darek.

³¹L-ebda tajra jew bhima, mejta jew żbranata, m’għandhom jieklu l-qassisin.”