Read Maltese Bible with DC – IL-BIBBJA IL-KOTBA MQADDSA EŻEKJEL 45 Bible Online

EŻEKJEL 45 - Maltese Bible with DC – IL-BIBBJA IL-KOTBA MQADDSA bible

EŻEKJEL 45

¹“Meta tiġu biex tqassmu bix-xorti l-art, il-wirt tagħkom, erfgħu sehem għall-Mulej; biċċa art qaddisa, twila ħamsa u għoxrin elf driegħ u wiesgħa għoxrin elf: tkun art sagra fil-medda tagħha kollha dawramejt.

²Minn din il-wesgħa tinqata’ biċċa kwadra għat-tempju, ħames mija b’ħames mitt driegħ mill-erbat iġnieb tagħha, u wesgħa oħra ta’ ħamsin driegħ madwarha.

³Minn din il-medda qis ħamsa u għoxrin elf driegħ tul u għaxart elef wisa’, fiha jkun hemm it-tempju, il-post l-aktar sagru.

⁴Din tkun l-aktar biċċa sagra mill-art kollha; tkun tal-qassisin ministri fis-santwarju, li jersqu biex iservu lill-Mulej, u tkun għalihom il-post għad-djar u l-mergħa għall-imrieħel;

⁵U ħamsa u għoxrin elf driegħ tul u għaxart elef wisa’ jkunu proprjetà tal-Leviti li jservu fit-tempju, biex ikollhom bliet fejn jgħixu.

⁶U bħal proprjetà għall-belt ħallu biċċa ta’ ħamest elef wisa’ u tul ta’ ħamsa u għoxrin elf driegħ matul il-parti sagra, u din tkun tad-dar kollha ta’ Iżrael.

⁷Lill-prinċep imbagħad tkun tmiss il-medda tal-art fuq il-ġnieb tal-parti sagra u tal-parti tal-belt matul il-waħda u l-oħra, min-naħa tal-Punent sal-baħar, u min-naħa tal-Lvant sal-fruntiera tal-Lvant u t-tul ikun daqs dak ta’ parti waħda minn xatt il-baħar sal-fruntiera tal-Lvant.

⁸Din tkun l-art tiegħu, proprjetà tiegħu f’Iżrael; hekk il-prinċpijiet tiegħi ma jaħqrux aktar il-poplu tiegħi, imma jħallu art lil dar Iżrael skont it-tribujiet tagħhom.”

⁹Dan jgħid Sidi l-Mulej: “Issa biżżejjed, prinċpijiet ta’ Iżrael, warrbu l-vjolenza u l-moħqrija, u agħmlu l-ħaqq u s-sewwa, tisirqux iżjed il-poplu tiegħi, oraklu ta’ Sidi l-Mulej.

¹⁰Ħa jkollkom miżien sewwa[110], efa sewwa, u bat sewwa.

¹¹Ħa jkunu l-efa u l-bat ta’ kejl wieħed, li l-bat ikun jesa’ minn għaxra waħda ta’ ħomer, u l-efa minn għaxra waħda ta’ ħomer; il-kejl tagħhom ikun skont il-ħomer.

¹²U x-xekel ikun ta’ għoxrin gera; ħames xwiekel ikunu ħamsa, għoxrin xekel ikunu għoxrin, u ħamsin xekel ikunu l-mina tagħkom.

¹³“Din hi l-offerta li għandkom terfgħu: waħda minn sitta ta’ efa minn kull ħomer qamħ, u waħda minn sitta ta’ efa minn kull ħomer xgħir.

¹⁴U r-regola għaż-żejt tkun waħda minn għaxra ta’ bat minn kull kor[111], għaliex għaxar batiet jagħmlu ħomer.

¹⁵U nagħġa minn kull merħla ta’ mitejn mill-mergħat għammiela ta’ Iżrael għall-offerta, u l-vittmi għas-sagrifiċċji tal-ħruq, is-sagrifiċċji tas-sliem, biex taqlgħalkom il-maħfra, oraklu ta’ Sidi l-Mulej.

¹⁶“Il-poplu kollu għandu jagħti din l-offerta lill-prinċep ta’ Iżrael.

¹⁷Il-prinċep, imbagħad, ikollu d-dmir li jaħseb għas-sagrifiċċji tal-ħruq, l-offerta tal-qmuħ u l-libazzjonijiet fil-festi, fil-qamar ġdid, fis-Sibtijiet, u fil-btajjel kollha ta’ Iżrael; hu għandu jaħseb għas-sagrifiċċji tal-purifikazzjoni, l-offerta tal-qmuħ, is-sagrifiċċji tal-ħruq, is-sagrifiċċji tas-sliem għall-maħfra ta’ dar Iżrael.”

¹⁸Dan jgħid Sidi l-Mulej: “Fl-ewwel xahar, fl-ewwel tax-xahar, tieħu għoġol bla difett u tnaddaf is-santwarju.

¹⁹U l-qassis jieħu mid-demm tal-vittma tal-purifikazzjoni u jroxx minnu mal-ġnub tal-bwieb tas-santwarju, fuq l-erba’ kantunieri tal-bażi tal-artal u fuq l-ġnub ta’ bwieb il-bitħa ta’ ġewwa.

²⁰Hekk ukoll tagħmel fis-sebgħa tax-xahar għal kull min ikun dineb b’aljenazzjoni jew għax ma kienx jaf: hekk tippurifika s-santwarju.

²¹Fl-erbatax tal-ewwel xahar ikollhom il-festa tal-Għid, u għal sebat ijiem jittiekel ħobż bla ħmira.

²²Dakinhar il-prinċep joffri għoġol b’sagrifiċċju tal-purifikazzjoni għalih u għall-poplu kollu tal-pajjiż.

²³U matul is-sebat ijiem tal-festa joffri sagrifiċċju tal-ħruq lill-Mulej ta’ seba’ għoġiela u seba’ mtaten bla difett kull jum għal sebat ijiem, u bodbod b’sagrifiċċju tal-purifikazzjoni kull jum.

²⁴U ssir offerta tal-qmuħ: efa mal-għoġol u mal-muntun, u ħin[112] żejt ma’ kull efa.

²⁵“Fil-ħmistax il-jum tas-seba’ xahar, fil-festa, joffri għal sebat ijiem dawn l-istess ħwejjeġ, sagrifiċċji tal-purifikazzjoni, sagrifiċċji tal-ħruq, offerta tal-qmuħ u taż-żejt.”