Read Maltese Bible with DC – IL-BIBBJA IL-KOTBA MQADDSA EŻEKJEL 46 Bible Online

EŻEKJEL 46 - Maltese Bible with DC – IL-BIBBJA IL-KOTBA MQADDSA bible

EŻEKJEL 46

¹Dan jgħid Sidi l-Mulej: “Il-bieb tal-bitħa ta’ ġewwa li jħares fuq il-Lvant jibqa’ magħluq fis-sitt ijiem tax-xogħol, u jinfetaħ nhar ta’ Sibt u fl-ewwel tax-xahar, jum il-qamar ġdid.

²U l-prinċep jidħol mill-portiku tal-bieb min-naħa ta’ barra u jieqaf ħdejn il-koxox tal-bieb: imbagħad il-qassisin joffru s-sagrifiċċji tiegħu tal-ħruq u tas-sliem, u hu jadura minn fuq l-għatba tal-bieb u joħroġ. U l-bieb ma jingħalaqx qabel filgħaxija.

³U l-poplu tal-pajjiż jadura fid-daħla ta’ dan il-bieb fis-Sibtijiet u f’jum il-qamar ġdid quddiem il-Mulej.

⁴“Is-sagrifiċċju tal-ħruq li joffri l-prinċep nhar ta’ Sibt ikun ta’ sitt iħrief bla difett u muntun bla difett.

⁵L-offerta tal-qmuħ tkun ta’ efa mal-muntun; u mal-ħrief din l-offerta tkun ta’ kemm ikun jogħġbu jagħti, u jżid ħin żejt ma’ kull efa.

⁶U f’jum il-qamar ġdid ikun għoġol bla difett, sitt iħrief u bodbod bla difett.

⁷U l-offerta tal-qmuħ tkun ta’ efa mal-għoġol u l-bodbod, u ta’ kemm wieħed ikun jogħġbu jagħti dik ta’ mal-ħrief, u jżid ħin żejt ma’ kull efa.

⁸“Meta jidħol il-prinċep, jidħol u joħroġ mill-portiku tal-bieb.

⁹U meta fil-festi jidħol il-poplu tal-pajjiż għal quddiem il-Mulej, min jidħol mill-bieb tan-Nofsinhar joħroġ mill-bieb tat-Tramuntana: Ħadd ma jerġa’ joħroġ mill-bieb li minnu jkun daħal, imma joħorġu minn dak ta’ biswitu.

¹⁰Il-prinċep imbagħad li jkun f’nofshom, jidħol meta jidħlu huma u joħroġ meta joħorġu huma.

¹¹“Fil-festi u fis-sollennitajiet l-offerta tal-qmuħ tkun ta’ efa għall-għoġol, u ta’ efa għall-muntun, u għall-ħrief skont ma wieħed ikun jogħġbu jagħti u jżid ħin żejt għal kull efa.

¹²Meta l-prinċep jagħmel sagrifiċċju minn rajh, sagrifiċċju tal-ħruq jew tas-sliem, lill-Mulej, jiftħulu l-bieb li jħares lejn il-Lvant, u jagħmel is-sagrifiċċju tiegħu tal-ħruq u s-sagrifiċċju tas-sliem, bħalma joffrih nhar ta’ Sibt f’jum is-Sibt; imbagħad joħroġ, u meta jkun ħareġ jagħlqu l-bieb.

¹³“Kull jum għandek toffri b’sagrifiċċju tal-ħruq ħaruf ta’ sena bla difett lill-Mulej, toffrih filgħodu.

¹⁴U tagħmel ukoll kull filgħodu l-offerta tal-qmuħ miegħu: waħda minn sitta ta’ efa, u żejt waħda minn tlieta ta’ ħin biex troxxu fuq is-smid, offerta lill-Mulej. Din tkun liġi għal dejjem.

¹⁵U jagħmlu l-offerta tal-ħaruf u l-offerta tal-qmuħ, u taż-żejt kull filgħodu: sagrifiċċju tal-ħruq għal dejjem.”

¹⁶Dan jgħid Sidi l-Mulej: “Jekk il-prinċep jagħti xi rigal mill-wirt tiegħu lil xi ħadd minn uliedu, dan jibqa’ ta’ wliedu; ikun tagħhom b’wirt.

¹⁷U jekk jagħti xi rigal mill-wirt tiegħu lil xi ħadd mill-uffiċjali tiegħu, dan jibqa’ tiegħu sas-sena tal-fidwa[113], imbagħad jerġa’ jmur għand il-prinċep; biss il-wirt ta’ wliedu jibqa’ tagħhom għal dejjem.

¹⁸Il-prinċep m’għandu qatt jieħu għalih mill-wirt tal-poplu billi jgħakkishom u jċaħħadhom minn ġidhom; dak li hu tiegħu jħallih b’wirt lil uliedu, biex ħadd mill-poplu tiegħi ma jkun imkeċċi mill-proprjetà tiegħu.”

¹⁹U ġiebni fid-daħla ta’ maġenb il-bieb ħdejn il-kmamar tas-santwarju tal-qassisin li jħarsu lejn it-Tramuntana, u kien hemm post ’il ġewwa n-naħa tal-Punent.

²⁰U qalli: “Hawn hu l-post fejn il-qassisin isajru l-vittmi għas-sagrifiċċju tar-riparazzjoni u dawk tas-sagrifiċċju tal-purifikazzjoni, u fejn jaħmu l-offerta tal-qmuħ biex ma joħorġuhomx fil-bitħa ta’ barra; u hekk ma jitqaddisx il-poplu.”

²¹U ħariġni fil-bitħa ta’ barra, għaddieni mill-erba’ rkejjen tal-bitħa, u ara, kien hemm bitħa f’kull rokna tal-bitħa.

²²Fl-erba’ rkejjen tal-bitħa kien hemm btieħi magħluqa għalihom, twal erbgħin driegħ u wesgħin tletin; l-erba’ ta’ qjies wieħed.

²³Kien hemm ħajt madwarhom l-erbgħa u dawramejt taħt il-ħajt kien hemm mibnija fuklarijiet.

²⁴U qalli: “Dawn huma l-kċejjen fejn is-servi tat-tempju jsajru l-vittmi tal-poplu.”