Read Maltese Bible with DC – IL-BIBBJA IL-KOTBA MQADDSA EŻEKJEL 47 Bible Online

EŻEKJEL 47 - Maltese Bible with DC – IL-BIBBJA IL-KOTBA MQADDSA bible

EŻEKJEL 47

¹Imbagħad ħadni lura ħdejn il-bieb tas-santwarju; u ara, kien hemm l-ilma ħiereġ minn taħt l-għatba tas-santwarju[114] lejn il-Lvant - għax is-santwarju kien iħares lejn il-Lvant. U l-ilma kien ħiereġ min-naħa tal-lemin tal-għatba, in-naħa tan-Nofsinhar tal-altar.

²Imbagħad ħariġni mill-bieb tat-Tramuntana u mexxieni madwar, minn barra, sal-bieb ta’ barra li jħares lejn il-Lvant; u l-ilma kien inixxi min-naħa tal-lemin tal-għatba.

³Xħin ħareġ dan ir-raġel għan-naħa tal-Lvant, kellu f’idu il-ħajt tal-qjies. Imbagħad qies elf driegħ, u għaddieni mill-ilma li kien jilħaq sal-għekiesi.

⁴Raġa’ qies elf oħra, u għaddieni mill-ilma jilħaq sa rkupptejja. Qies elf oħra, u għaddieni mill-ilma jilħaqli sa ġenbejja.

⁵Imbagħad qies elf oħra, u ma stajtx naqsam, għax l-ilma tant għola li kont tista’ tgħum fih, xmara li ma tistax taqsamha.

⁶Imbagħad qalli: “Rajtu dan, o bniedem?” U ħadni fuq xatt ix-xmara u rġajna lura.

⁷U ara, kif konna rieġgħa lura, rajt ħafna siġar ma’ xatt ix-xmara, fuq naħa u fuq oħra.

⁸U qalli: “Dan l-ilma ħiereġ lejn in-naħa tal-Lvant u nieżel lejn l-Għaraba; u meta jasal fil-Baħar il-Mejjet b’dak l-ilma mielaħ, l-ilma jsir ilma ħelu.

⁹U jiġri li, kull fejn tgħaddi dik ix-xmara, kull ħaġa ħajja li tiċċaqlaq tgħix; u jkun hemm kotra kbira ta’ ħut, għax, minn kull fejn jgħaddi dak l-ilma, l-ilma jitjieb u jkun hemm il-ħajja minn kull fejn tgħaddi x-xmara.

¹⁰U f’xatt ix-xmara jkun hemm is-sajjieda, u x-xbiek tagħhom ikunu mifruxa minn Għajn-geddi sa Għajn Għeglajm[115], u l-ħut ikun ta’ kull ġens u kotran daqs il-ħut tal-baħar il-kbir.

¹¹Imma l-ilma qiegħed u l-għadajjar ma jitjibux, imma jibqgħu mielħa.

¹²Fuq iż-żewġt ixtut tax-xmara jikbru siġar ta’ kull ġens ta’ frott; il-weraq tagħhom ma jidbielx, il-frott tagħhom ma jonqosx. Kull xahar jagħmlu frott ġdid, għax l-ilma tagħhom ħiereġ mit-tempju, u l-frott tagħhom ikun ikel, u l-weraq duwa.”

¹³Dan jgħid Sidi l-Mulej: “Dawn huma l-oqsma li fihom għandkom tqassmu l-art bejn it-tnax-il tribù ta’ Iżrael: żewġt ishma lil Ġużeppi.

¹⁴U għandkom tqassmuha ’l-wieħed u ’l-ieħor indaqs, l-art li jien erfajt idi u ħlift li nagħtiha lil missirijietkom, għax dan il-pajjiż imiss lilkom b’wirt.

¹⁵“Dawn huma l-fruntieri tal-art[116] in-naħa tat-Tramuntana mill-Baħar il-Kbir, tgħaddi minn Ħetlon, sad-daħla ta’ Ħamat, Sedad,

¹⁶Berot, Sibrajm, li hemm bejn il-fruntiera ta’ Damasku u l-fruntiera ta’ Ħamat, sa Ħasar-għenon, li jiġi fuq il-fruntiera ta’ Ħawran.

¹⁷Il-fruntiera mela tibda mill-baħar u tibqa’ sejra sa Ħasar-għenon, hekk li fuq nett ikollha l-fruntiera ta’ Damasku u l-fruntiera ta’ Ħamat, it-tnejn fuq it-Tramuntana tagħha.

¹⁸In-naħa tal-Lvant il-fruntiera tgħaddi minn bejn Ħawran u bejn Damasku, bejn Gilgħad u l-pajjiż ta’ Iżrael, il-Ġordan iservi ta’ fruntiera sal-baħar tal-Lvant, sa Tamar. Din hi l-fruntiera fuq il-Lvant.

¹⁹“Il-fruntiera fuq in-naħa tan-Nofsinhar: minn Tamar sal-ilmijiet ta’ Meribat-kades, sal-wied tal-Eġittu, sal-Baħar il-Kbir. Din tkun il-fruntiera ta’ isfel, lejn in-Nofsinhar.

²⁰Għan-naħa tal-Punent il-Baħar il-Kbir ikun il-fruntiera minn biswit id-daħla ta’ Ħamat. Din tkun il-fruntiera fuq il-Punent.

²¹“Din l-art taqsmuha bejnietkom skont it-tribujiet ta’ Iżrael.

²²Ittellgħu x-xorti għaliha biex tirtuha intom u l-barranin li jgħixu f’nofskom, u li wildu ’l uliedhom f’nofskom; tqisuhom bħan-nies tal-pajjiż, bħal ulied Iżrael; magħkom itellgħu x-xorti għall-art b’wirt fost it-tribujiet ta’ Iżrael.

²³U tagħtuh sehem b’wirt fit-tribù li jkun jgħammar ta’ frustier fiha,” oraklu ta’ Sidi l-Mulej.