Read Maltese Bible with DC – IL-BIBBJA IL-KOTBA MQADDSA EŻEKJEL 48 Bible Online

EŻEKJEL 48 - Maltese Bible with DC – IL-BIBBJA IL-KOTBA MQADDSA bible

EŻEKJEL 48

¹“Dawn huma l-ismijiet tat-tribujiet[117]: fuq il-fruntiera tat-Tramuntana mill-baħar matul it-triq li tieħu lejn Ħetlon sad-daħla ta’ Ħamat, sa Ħasar-għenon, bl-art ta’ Damasku fuq it-Tramuntana, ħdejn Ħamat, kull waħda jkollha sehem min-naħa tal-Lvant għan-naħa tal-Punent: Dan sehem wieħed.

²“U jmiss ma’ Aser min-naħa tal-Lvant għan-naħa tal-Punent: Aser, sehem wieħed.

³“U jmiss ma’ Aser min-naħa tal-Lvant għan-naħa tal-Punent: Naftali, sehem wieħed.

⁴“U jmiss ma’ Naftali min-naħa tal-Lvant għan-naħa tal-Punent: Manassi, sehem wieħed.

⁵“U jmiss ma’ Manassi min-naħa tal-Lvant għan-naħa tal-Punent: Efrajm, sehem wieħed.

⁶“U jmiss ma’ Efrajm min-naħa tal-Lvant għan-naħa tal-Punent: Ruben, sehem wieħed.

⁷“U jmiss ma’ Ruben min-naħa tal-Lvant għan-naħa tal-Punent: Ġuda, sehem wieħed.

⁸“U jmiss ma’ Ġuda, min-naħa tal-Lvant san-naħa tal-Punent, ikun hemm sehem maqtugħ għalih, wiesa’ ħamsa u għoxrin elf driegħ u twil daqs l-ishma l-oħra, min-naħa tal-Lvant san-naħa tal-Punent: f’nofsu jkun hemm it-tempju.

⁹Is-sehem imbagħad li taqtgħu għall-Mulej ikun twil ħamsa u għoxrin elf driegħ u għoxrin elf wisa’.

¹⁰“Is-sehem sagru jkun merfugħ għal dawn: in-naħa tat-Tramuntana għall-qassisin: ħamsa u għoxrin elf fuq it-Tramuntana u n-naħa tal-Punent għaxart elef driegħ wiesa’, u n-naħa tal-Lvant għaxart elef wiesa’, u n-naħa tan-Nofsinhar ħamsa u għoxrin elf twil, u f’nofsu jkun hemm it-tempju tal-Mulej.

¹¹Ikun dan is-sehem tal-qassisin ikkonsagrati, ulied Sadok, li jieħdu ħsieb is-servizz tiegħi, għax dawn ma twarrbux minni meta twarrbu wlied Levi.

¹²Huma jkollhom dan is-sehem, is-sehem l-aktar qaddis, maqtugħ mill-art matul il-limitu tal-Leviti.

¹³Il-Leviti, imbagħad, ikollhom is-sehem li jmiss mal-limitu tal-qassisin, ħamsa u għoxrin elf driegħ tul u għaxart elf driegħ u wisa’ ta’ għoxrin elf.

¹⁴Ma jistgħu jbigħu ebda biċċa minnu u anqas ipartu jew iwellu l-aħjar tal-art, għax hi kkonsagrata lill-Mulej.

¹⁵“Il-ħamest elef driegħ wisa’ li jifdal mill-ħamsa u għoxrin wisa’ tkun art profana merfugħa għall-belt, għad-djar u għar-raba’; u l-belt tkun f’nofsha.

¹⁶Dawn huma l-qisien tagħha: in-naħa tat-Tramuntana erbat elef u ħames mitt driegħ, in-naħa tan-Nofsinhar erbat elef u ħames mija, in-naħa tal-Lvant erbat elef u ħames mija, u dik tal-Punent erbat elef u ħames mija.

¹⁷Il-belt ikollha qatgħa raba’ ta’ mitejn u ħamsin driegħ in-naħa tat-Tramuntana, mitejn u ħamsin in-naħa tan-Nofsinhar, mitejn u ħamsin in-naħa tal-Lvant, u mitejn u ħamsin in-naħa tal-Punent.

¹⁸“U l-art li jifdal mit-tul matul il-biċċa sagra, jiġifieri għaxart elef driegħ fuq il-Lvant, u għaxart elef in-naħa tal-Punent, il-frott tagħha jmur għall-ikel tal-ħaddiema tal-belt.

¹⁹Jaħdmuha l-ħaddiema tal-belt miġbura mit-tribujiet kollha ta’ Iżrael.

²⁰Il-biċċa maqtugħa għaliha tkun kwadru ta’ ħamsa u għoxrin elf driegħ b’ħamsa u għoxrin elf driegħ. Taqtgħu għalihom flimkien l-art sagra u l-proprjetà tal-belt.

²¹“Il-prinċep, imbagħad, imissu l-bċejjeċ li jifdal fuq iż-żewġ naħat tal-parti sagra u tal-biċċa tal-belt matul il-ħamsa u għoxrin elf driegħ lejn il-Lvant sat-truf tal-Lvant, u fuq in-naħa tal-Punent matul il-ħamsa u għoxrin elf sat-truf tal-Punent matul il-qasmiet tat-tribujiet. Dan kollu jkun tal-prinċep. Il-biċċa art sagra u s-santwarju tat-tempu jkunu f’nofsha.

²²Il-parti tal-Leviti u l-parti tal-belt ikunu bejn l-oqsma tal-prinċep, u l-art tiegħu tkun bejn il-limiti ta’ Ġuda u ta’ Benjamin.

²³Il-bqija tat-tribujiet min-naħa tal-Lvant għan-naħa tal-Punent: Benjamin, sehem wieħed.

²⁴U jmiss ma’ Benjamin min-naħa tal-Lvant għan-naħa tal-Punent: Simgħon, sehem wieħed.

²⁵U jmiss ma’ Simgħon min-naħa tal-Lvant għan-naħa tal-Punent: Issakar, sehem wieħed.

²⁶U jmiss ma’ Issakar min-naħa tal-Lvant għan-naħa tal-Punent: Żebulun, sehem wieħed.

²⁷U jmiss ma’ Żebulun min-naħa tal-Lvant għan-naħa tal-Punent: Gad, sehem wieħed.

²⁸U jmiss ma’ Gad, ’l isfel in-naħa tan-Nofsinhar, il-fruntiera tgħaddi minn Tamar sal-ilmijiet ta’ Meribat-kades sal-wied tal-Eġittu, sal-Baħar il-Kbir.

²⁹Din hi l-art li għandkom tqassmu b’wirt bejn it-tribujiet ta’ Iżrael, u dawn huma l-oqsma tagħhom,” oraklu tal-Mulej.

³⁰Dawn huma l-bibien tal-belt[118], min-naħa tat-Tramuntana, medda ta’ erbat elef u ħames mitt driegħ.

³¹U l-bibien jissemmew għat-tribujiet ta’ Iżrael, tlieta fuq it-Tramuntana: bieb Ruben, bieb Ġuda, bieb Levi;

³²u fuq in-naħa tal-Lvant, medda ta’ erbat elef u ħames mitt driegħ, ikun hemm tliet bibien: bieb Ġużeppi, bieb Benjamin, u l-ieħor bieb Dan.

³³U fuq in-naħa tan-Nofsinhar, medda ta’ erbat elef u ħames mitt driegħ, ikun hemm tliet bibien: bieb Simgħon, bieb Issakar, u bieb Żebulun.

³⁴Fuq in-naħa tal-Punent erbat elef u ħames mitt driegħ, ikun hemm tliet bibien: bieb Gad, bieb Aser, u bieb Naftali.

³⁵Id-dawra tal-belt tkun ta’ tmintax-il elf driegħ; u minn dak in-nhar isem il-belt ikun: “Hemm il-Mulej[119]!”