Read Maltese Bible with DC – IL-BIBBJA IL-KOTBA MQADDSA EŻEKJEL 5 Bible Online

EŻEKJEL 5 - Maltese Bible with DC – IL-BIBBJA IL-KOTBA MQADDSA bible

EŻEKJEL 5

¹“U Int, o bniedem, aqbad sejf misnun, ħudu u għaddih bħal mus tal-leħja fuq rasek u lħitek; imbagħad ħu miżien u qassam ix-xagħar.

²Meta jgħaddu jiem l-assedju, aħraq terz minnu f’nofs il-belt; ħu terz ieħor u qattgħu bis-sejf madwar il-belt, u l-aħħar terz tajru mar-riħ, u jien nislet ix-xabla għal warajhom.

³Minn dan, imbagħad, ħu ftit bil-għadd u sorrhom f’tarf mantarek;

⁴u erġa’ ħu ftit minn dan u itfgħu fin-nar u aħarqu fih; u ’l dar Iżrael għidilhom ilkoll kemm huma:

⁵‘Dan jgħid Sidi l-Mulej: Din hi Ġerusalemm, li jien qegħedt f’nofs il-ġnus b’artijiethom ta’ madwarha.

⁶Imma hi rvellat b’ħażen kontra l-ordnijiet tiegħi aktar mill-ġnus, u kontra l-liġijiet tiegħi aktar mill-artijiet ta’ madwarha. Stmerrew l-ordnijiet tiegħi u ma mxewx skont il-liġijiet tiegħi.’

⁷Għalhekk dan jgħid Sidi l-Mulej: ‘Billi intom irvellajtu kontrija aktar mill-ġnus kollha ta’ madwarkom u ma għamiltux l-ordnijiet tiegħi u lanqas ħaristu l-liġijiet tiegħi imma għamiltu skont id-drawwiet ta’ dawn il-ġnus ta’ madwarkom,

⁸għalhekk dan jgħid Sidi l-Mulej: ‘Arani, jiena wkoll kontrik u nagħmel ħaqq minnek f’nofsok quddiem għajnejn il-ġnus.

⁹U minħabba l-kotra ta’ qżiżijietek, se nagħmel ħwejjeġ fik li qatt għadni ma għamilt bħalhom u lanqas għad nagħmel.

¹⁰Għalhekk f’nofsok ikun hemm missirijiet li jieklu ’l uliedhom[18], u ulied li jieklu ’l missirijiethom. Intemm fik il-vendetta tiegħi u nxerred mal-erbat irjieħ ’il min jibqa’ minnek.

¹¹Għalhekk, daqs kemm jien ħaj, oraklu ta’ Sidi l-Mulej, talli int niġġist is-santwarju tiegħi bil-kruhat u l-qżiżijiet tiegħek kollha, jien ukoll inqaċċtek, u għajnejja ma jitħassrukx u lanqas jien ma nħenn għalik.

¹²Terz minnkom imutu bil-pesta u jinfnew bil-ġuħ f’nofsok; terz ieħor jaqgħu bix-xabla fl-inħawi ta’ madwarek, u terz ieħor inxerridhom ma’ kull riħ, u x-xabla nislet għal warajhom.

¹³U hekk niżfoga l-korla tiegħi u nserraħ il-qilla tiegħi fuqhom, ħa jkunu jafu li jien, il-Mulej, tkellimt, imqanqal bl-għira tiegħi meta nkun serraħt il-qilla tiegħi fuqhom.

¹⁴Nagħmel minnek ħerba u għajb fost il-ġnus ta’ madwarek taħt il-ħars ta’ kull min jgħaddi minn hemm.

¹⁵Inti ssir għajb u saħta, twiddiba u biża’, għall-ġnus ta’ madwarek, meta jiena nkun temmejt fik il-vendetta tiegħi fil-qilla tas-saħna tiegħi bl-eħrex kastigi. Jien, il-Mulej, tkellimt.

¹⁶Jien invenven fuqkom il-vleġeġ tal-ġuħ u l-qerda, li jien inwaddab fuqkom biex neqridkom u nżidilkom il-ġuħ u nkissrilkom l-appoġġ tal-ikel.

¹⁷Inkeskes kontrikom il-ġuħ u l-bhejjem selvaġġi, u jneżżgħuk minn uliedek; il-pesta u d-demm jgħaddu minn nofsok u jien ngħaddi x-xabla minn fuqek. Jiena l-Mulej tkellimt.”