Read Maltese Bible with DC – IL-BIBBJA IL-KOTBA MQADDSA EŻEKJEL 8 Bible Online

EŻEKJEL 8 - Maltese Bible with DC – IL-BIBBJA IL-KOTBA MQADDSA bible

EŻEKJEL 8

¹Ġara li fis-sitt sena[24], fil-ħames jum tas-sitt xahar, jien kont qiegħed f’dari, u l-anzjani ta’ Ġuda bilqiegħda quddiemi, meta waqgħet hemm fuqi id Sidi l-Mulej.

²U ħarist u rajt ħaġa qisha bniedem: minn fejn kien donnu ġenbejh ’l isfel kien qisu nar, u minn ġenbejh ’il fuq kien jidher jiddi bħal bronż ileqq.

³U medd għamla ta’ id u qabadni minn xagħri u l-ispirtu refagħni, bejn l-art u s-sema, u ħadni f’dehra ta’ Alla Ġerusalemm, ħdejn id-daħla tal-bieb ta’ ġewwa, li jħares lejn it-Tramuntana, fejn hemm it-tron tal-idolu tal-għira[25], li jġib l-għira.

⁴U ara, kien hemm il-glorja ta’ Alla ta’ Iżrael kif kont rajtha f’dehra fil-wita.

⁵U qalli: “O bniedem, ħares lejn it-Tramuntana.” U ħarist lejn it-Tramuntana, u rajt fin-naħa tat-Tramuntana tal-bieb tal-artal, l-idolu tal-għira, li kien fid-daħla.

⁶U qalli: “O bniedem, qed tara x’qegħdin jagħmlu? Qed tara l-għemejjel mistkerrha kollha li qed jagħmlu dar Iżrael, biex ikeċċuni ’l barra mit-tempju tiegħi? Għad tara għarukażijiet akbar.”

⁷U ħadni ħdejn id-daħla tal-bitħa u ħarist, u ara, kien hemm toqba fil-ħajt.

⁸U qalli: “O bniedem, ħaffer fil-ħajt,” u ħaffirt, u rajt bieb.

⁹U qalli: “Idħol u ara l-għarukażijiet li jagħmlu hemmhekk.”

¹⁰U jien dħalt u ħarist, u rajt ix-xbihat ta’ kull xorta ta’ sriep u bhejjem moqżieża[26], u kemm allat foloz naqqxet dar Iżrael fil-ħajt dawramejt.

¹¹U sebgħin wieħed mix-xjuħ ta’ Iżrael, fosthom Ġażanija bin Safan, weqfin fin-nofs quddiemhom, kull wieħed minnhom biċ-ċensier f’idu u sħaba duħħan ta’ inċens ifuħ tielgħa ’l fuq.

¹²U qalli: “Qiegħed tara, o bniedem, x’qegħdin jagħmlu fid-dlam ix-xjuħ ta’ Iżrael kull wieħed f’kamart l-idolu tiegħu, għax jgħidu: ‘Hemm il-Mulej ma jaraniex, il-Mulej telaq il-pajjiż!’ ”

¹³U qalli: “Issa tara x’għarukażijiet akbar qegħdin jagħmlu.”

¹⁴U ħadni fid-daħla ta’ bieb dar il-Mulej li qiegħda n-naħa tat-Tramuntana, u hemm rajt in-nisa bilqiegħda jibku lil Tammuż[27].

¹⁵U qalli: “Qiegħed tara, o bniedem? U għad tara għarukażijiet akbar minn dawn.”

¹⁶U ħadni fil-bitħa ta’ ġewwa tat-tempju tal-Mulej, u hemm fid-daħla tat-tempju tal-Mulej, bejn il-portiku u l-artal, kien hemm xi ħamsa u għoxrin raġel, b’daharhom lejn it-tempju tal-Mulej, u wiċċhom lejn il-Lvant, imilu lejn ix-xemx[28].

¹⁷U qalli: “O bniedem, m’intix tara? Mhux biżżejjed għad-dar ta’ Ġuda li jagħmlu l-għarukażijiet li qegħdin jagħmlu hawn? Li jimlew l-art bil-vjolenza u hekk iqanqlu aktar l-għadab tiegħi? U arahom, bil-fergħa taż-żebbuġ f’imneħirhom[29].

¹⁸Għalhekk jien nimxi bl-għadab magħhom; għajnejja ma jagħdruhom ma nħennx għalihom, jistgħu jgħajtu f’widnejja b’kemm jifilħu, għax jien ma nismagħhomx.”