Read Maltese Bible with DC – IL-BIBBJA IL-KOTBA MQADDSA HOSEGĦA 10 Bible Online

HOSEGĦA 10 - Maltese Bible with DC – IL-BIBBJA IL-KOTBA MQADDSA bible

HOSEGĦA 10

¹Iżrael dielja kollha friegħi, tagħmel ħafna frott. Aktar ma kellu frott, aktar bena artali. Aktar ma kienet tagħti l-art, aktar sebbaħ il-plieri sagri[39].

²Qalbhom mifruda fiha nfisha, u issa jkollhom ipattu. Hu Alla li se jkissrilhom l-artali, u jfarrkilhom il-plieri sagri tagħhom.

³Għax issa huma jgħidu: “M’hemmx sultan għalina. Aħna ma nibżgħux mill-Mulej. X’jista’ jagħmlilna s-sultan?”

⁴Kollhom tpaċpiċ, jiffirmaw ftehim bil-ħalf fil-vojt; u l-ġustizzja tinbet bħal ħaxix morr[40] fir-raddi tar-raba’.

⁵Għall-għoġol ta’ Bet-awen[41] jitkexkxu n-nies ta’ Samarija; għax għad jibki l-poplu tiegħu, u jitniehdu l-qassisin tiegħu għax għab minnu ġmielu.

⁶Lilu wkoll jeħduh fl-Assirja, bħal offerta lis-sultan il-kbir. Efrajm jaqa’ fl-għajb, u Iżrael jistħi minn fehmietu.

⁷Intemmet Samarija; is-sultan tagħha bħal laqxa f’wiċċ l-ilma.

⁸Jiġġarrfu s-santwarji fuq l-għoljiet tal-ħażen, id-dnub ta’ Iżrael; xewk u għollieq għad jinbet fuq l-artali tagħhom. Għad jgħidu lill-muntanji: “Għattuna” u lill-għoljiet: “Ordmuna”.

⁹Sa minn żmien Gibgħa dnibt, o Iżrael! Hemm baqgħu f’dak il-ħażen. Ma laħqithomx il-gwerra f’Gibgħa,

¹⁰minħabba wlied il-ħażen? Jien niġi u nikkastigahom. Jinġemgħu kontrihom il-ġnus, biex jikkastigawhom għaż-żewġ dnubiet.

¹¹Efrajm kien għoġla mħarrġa, tħobb id-dris. Imma jiena għabbejt madmad fuq għonqha s-sabiħ, u rbatt lil Efrajm għall-ħrit. Ġuda għad jaħrat, u Ġakobb ixattab.

¹²Iżirgħu għalikom il-ġustizzja, u taħsdu l-frott tat-tjieba. Agħżqu l-art mistrieħa, għax wasal żmien li tfittxu l-Mulej. Sakemm jiġi u jibgħat ix-xita tas-sewwa fuqkom.

¹³Imma intom żrajtu l-ħażen, u ħsadtu l-għawġ, u jkollkom tieklu frott il-gideb, għax int fdajt fl-imriekeb tiegħek, fil-kotra tal-qalbenin tiegħek.

¹⁴Tqum għagħa fost il-poplu tiegħek, u l-fortizzi tiegħek isiru ħerba, bħalma Salman qered lil Bet-arbel[42], f’jum it-taqtigħa, meta l-omm kienet misħuqa ma’ wliedha.

¹⁵Hekk nagħmlilkom, dar Iżrael, minħabba kobor ħżunitek. Mas-sebħ jinqered is-sultan ta’ Iżrael.