Read Maltese Bible with DC – IL-BIBBJA IL-KOTBA MQADDSA HOSEGĦA 13 Bible Online

HOSEGĦA 13 - Maltese Bible with DC – IL-BIBBJA IL-KOTBA MQADDSA bible

HOSEGĦA 13

¹Meta Efrajm kien jitkellem, kien ibażża’ n-nies, għax kien prinċep f’Iżrael: imma dineb minħabba Bagħal u miet.

²U issa baqgħu jidinbu, u jagħmlu xbihat imdewba mill-fided tagħhom; idoli skont kif ifettlilhom, kollha xogħol in-nies tas-sengħa. “Lil dawn,” jgħidulhom, “offru s-sagrifiċċju,” u n-nies ibusu l-għoġiela!

³Għalhekk ikunu bħal sħaba fis-sebħ, u bħan-nida li tgħib malajr; bħall-karfa li ttir mill-qiegħa, u bħad-duħħan ħiereġ mit-tieqa.

⁴U jiena l-Mulej, Alla tiegħek sa mill-art tal-Eġittu. Int m’għandek ebda Alla ieħor ħliefi, U m’hemmx għalik salvatur ieħor għajri.

⁵Jiena paxxejtek fid-deżert, fl-art tan-nixfa.

⁶Imma aktar ma paxxejthom, aktar ma mtlew u xebgħu, aktar tkabbret qalbhom, u lili nsewni.

⁷Inkun għalihom bħal iljun, bħal ljupard fit-triq ngħassilhom.

⁸Inħebb għalihom bħal orsa misruqa mill-frieħ tagħha, u niftħilhom il-qafas ta’ sidirhom, u nikolhom fil-post bħal iljun, u bħall-bhejjem selvaġġi niżbranahom.

⁹Jien neqirdek, Iżrael, imbagħad min jista’ jgħinek?

¹⁰Fejn hu s-sultan tiegħek biex isalvak? Fejn huma prinċpijietek biex jaqbżu għalik? Int kont għedt għalihom: “Agħtini sultan u prinċpijiet.”

¹¹Jien nagħtik sultan f’għadbi[48], u nneħħihulek fis-saħna tiegħi.

¹²Misrur il-ħażen ta’ Efrajm, merfugħ id-dnub tiegħu.

¹³Uġigħ il-ħlas għad jilħqu, imma hu iben bla għaqal[49]; għax meta jasal il-waqt, ma jersaqx lejn fomm il-ġuf.

¹⁴Neħlishom jien mill-qawwa tax-Xe’ol[50]? Jew mill-mewt nifdihom? Fejn huma l-flaġelli tiegħek, mewt? Fejn hija l-qerda tiegħek, Xe’ol? Il-mogħdrija nħbiet minn għajnejja.

¹⁵U għax hu bejn l-aħwa jġib il-firda, għad jiġih riħ mix-Xlokk, riħ tal-Mulej ġej mid-deżert, u jnixxiflu l-għajn, u n-nixxiegħa jixxuttalu. Jisraqlu t-teżor tal-ħwejjeġ prezzjużi.