Read Maltese Bible with DC – IL-BIBBJA IL-KOTBA MQADDSA HOSEGĦA 14 Bible Online

HOSEGĦA 14 - Maltese Bible with DC – IL-BIBBJA IL-KOTBA MQADDSA bible

HOSEGĦA 14

¹Tpatti, għad tpatti Samarija, għax qamet kontra Alla tagħha. Għad jaqgħu taħt ix-xabla, U jisħqulhom iż-żgħar tagħhom, U jiftħulhom in-nisa tqal.

²Erġa’ dur, Iżrael, lejn il-Mulej Alla tiegħek, għax int tfixkilt minħabba fi ħżunitek.

³Ħudu kliem magħkom, duru mill-ġdid lejn il-Mulej, u għidulu: “Int tneħħi l-ħażen kollu: ilqa’ t-tajjeb, u rroddu frott xufftejna.

⁴L-Assirja ma ssalvaniex, fuq żiemel aktar ma nirkbux, lanqas ma ngħidu iżjed ’Alla tagħna’ lil xogħol idejna. Għandek l-iltim isib il-ħniena.”

⁵Naħfrilhom, għad li xxewxu kontrija; minn qalbi nħobbhom, għaliex il-korla tiegħi reġgħet lura minn fuqhom.

⁶Jien għad inkun għal Iżrael bħal nida. Ħa jiftaħ bħal ġilju,

⁷għeruqu jxenxel bħal siġra tal-luq, jinfirxu r-rimjiet tiegħu, sbuħitu ta’ siġra taż-żebbuġ, u jkun ifewwaħ qisu l-Libanu.

⁸U jerġgħu jiġu jgħammru taħt id-dell tiegħi, isiru qishom ġnien, jisbieħu qishom dielja, inbid tal-Libanu tkun tistħajjilhom.

⁹X’għandi x’naqsam mal-idoli, Efrajm? Kont jiena li weġibtek, u jien inħarsek; għalik jien bħal ċipressa dejjem tħaddar, minni tikseb il-frott.

¹⁰Kull min hu għaref, jifhem dawn il-ħwejjeġ; ħa jagħrafhom kull min hu bil-għaqal, għax il-Mulej it-triqat tiegħu dritti, il-ġusti jimxu fihom, iżda jitfixklu fihom il-midinbin.