Read Maltese Bible with DC – IL-BIBBJA IL-KOTBA MQADDSA HOSEGĦA 2 Bible Online

HOSEGĦA 2 - Maltese Bible with DC – IL-BIBBJA IL-KOTBA MQADDSA bible

HOSEGĦA 2

¹U jiġri li l-għadd ta’ wlied Iżrael ikun bħar-ramel tal-baħar li ma jitkejjilx u lanqas jingħadd. U jiġri li fil-post fejn kienu jgħidulhom: ‘M’intomx il-poplu tiegħi,’ jibdew jgħidulhom: ‘Intom ulied Alla l-ħaj’.

²Imbagħad ulied Ġuda u wlied Iżrael jinġemgħu flimkien, u jaħtru kap wieħed għalihom u jitilgħu mill-art: għax kbir ikun jum Ġeżragħel.

³Għidu lil ħutkom subien, ‘Għammi[5]’, u lil ħutkom bniet, ‘Ruħama’.

⁴“Tlewmu ma’ ommkom! Tlewmu magħha! għax hi mhijiex marti, u jien m’iniex żewġha. Ħa twarrab iż-żina tagħha minn fuq wiċċha, u l-adulterji tagħha minn ħobbha.

⁵Li ma nneżżagħhiex għarwiena[6], u nagħmilha bħal dakinhar li twieldet, u nġibha bħad-deżert u nagħmilha bħal art niexfa, u noqtolha bil-għatx.

⁶Lanqas għal uliedha ma nħenn għax huma wlied iż-żina;

⁷għax ommhom żniet. Dik li wildithom waqgħet fl-għajb għax hi qalet: ‘Jiena mmur wara ħbiebi[7] għax huma tawni l-ikel u l-ilma, is-suf u l-għażel, iż-żejt u x-xorb tiegħi.’

⁸Għalhekk nagħlqilha triqitha bix-xewk, nibnilha ħajt madwarha, biex ma ssibx mogħdija.

⁹Tmur tiġri wara ħbiebha, u ma tilħaqhomx; tmur tfittixhom u ma ssibhomx. U tgħid: ‘Nerġa’ lura għand l-ewwel żewġi, għaliex kont aħjar f’dak iż-żmien minn issa.’

¹⁰Hi ma għarfitx li kont jien li tajtha l-qamħ u l-inbid u ż-żejt, u kattartilha l-fidda u d-deheb li bihom għamlu ’l Bagħal.

¹¹“Għalhekk nerġa’ nieħu lura l-qamħ tiegħi f’waqtu, l-inbid tiegħi f’waqtu, nieħu lura s-suf u l-għażel tiegħi li kienu jgħattu l-għera tagħha;

¹²nikxef l-għajb tagħha quddiem ħbiebha, u ħadd ma jeħlisha minn idejja.

¹³U ntemm il-ferħ kollu tagħha, il-festi, il-qamar ġdid, is-Sibtijiet u l-btajjel kollha tagħha.

¹⁴Nagħmel ħerba d-dwieli u t-tin tagħha, li għalihom qalet: ‘Dawn huma l-ħlas li tawni ħbiebi’, nagħmilhom masġar fejn jirgħu l-bhejjem tar-raba’.

¹⁵Inġegħelha tħallas għall-jiem kollha li fihom offriet l-inċens quddiem Bagħal[8], u żżejnet bid-deheb u l-ġawhar u ġriet wara ħbiebha; u lili nsietni,” jgħid il-Mulej.

¹⁶“Għalhekk, araw, jiena se niġbidha, neħodha fid-deżert u lil qalbha nkellem[9].

¹⁷Minn hemm nagħtiha lura l-għelieqi tad-dwieli li kellha, u wied Għakor ikunilha bieb għat-tama. Hemmhekk hi twieġeb bħal fi żmien żgħożitha, bħal fi żmien ħruġha minn art l-Eġittu.

¹⁸U jiġri f’dak il-jum, oraklu tal-Mulej, li hi ssejjaħli: ‘Żewġi’; lili ma ssejjaħlix ‘Sidi[10]’, iżjed.

¹⁹Inneħħilha minn fommha isem il-Bagħalim u isimhom ma ssemmihx aktar.

²⁰U f’dak il-jum nagħmel patt għalihom mal-bhejjem tar-raba’ u mat-tjur tal-ajru mal-annimali li jitkaxkru mal-art, u nkisser minn fuq l-art il-qaws, ix-xabla u l-gwerra; kulħadd jorqod moħħu mistrieħ.

²¹“Għal dejjem ngħarrsek miegħi[11], ngħarrsek miegħi fis-sewwa u l-ħaqq, fl-imħabba u l-ħniena,

²²b’rabta fidila jiena ngħarrsek miegħi, u int tagħraf lill-Mulej[12].

²³F’dak il-jum, oraklu tal-Mulej, is-smewwiet ikollhom tweġiba mingħandi,

²⁴u l-art ikollha tweġiba mingħandhom; u l-qamħ u l-inbid u ż-żejt ikollhom tweġiba mill-art, u Ġeżragħel ikollu tweġiba mingħandhom.

²⁵U niżirgħu għalija fl-art, u nħobb lil ‘Lo-ruħama’[13], u lil ‘Lo-għammi’ ngħidlu: ‘Inti l-poplu tiegħi’ u hu jgħidli: ‘Alla tiegħi’.”