Read Maltese Bible with DC – IL-BIBBJA IL-KOTBA MQADDSA HOSEGĦA 4 Bible Online

HOSEGĦA 4 - Maltese Bible with DC – IL-BIBBJA IL-KOTBA MQADDSA bible

HOSEGĦA 4

¹Isimgħu l-kelma tal-Mulej, ulied Iżrael. Għax il-Mulej għandu kawża man-nies tal-pajjiż. Għax m’hemmx fedeltà u lanqas tjieba; m’hemmx għarfien ta’ Alla fl-art;

²ħalf u gideb, qtil u serq; u kotra ta’ adulterji, vjolenza fil-pajjiż, u delitt fuq ieħor.

³Għalhekk il-pajjiż għad jibki, u jinfena kull min jgħammar fih; il-bhejjem tax-xagħri, u t-tajr tal-ajru, u mqar il-ħut ukoll jinqered.

⁴Madankollu ħadd m’għandu jitlewwem, ħadd m’għandu jipprotesta: il-ġlieda tiegħi[18] miegħek, qassis.

⁵Int togħtor binhar, u jogħtor miegħek billejl il-profeta wkoll, u jien neqridlek ’l ommok.

⁶Jinqered il-poplu tiegħi minħabba n-nuqqas ta’ għarfien. U billi inti warrabt l-għarfien, inwarrbek jien milli tkun qassis għalija. Talli int insejt il-liġi ta’ Alla tiegħek, jien wkoll ninsa lil uliedek.

⁷Aktar ma kotru, aktar dinbu kontrija. Imma jien inbiddel il-glorja tagħhom f’għajb.

⁸Jieklu minn fuq dnub il-poplu tiegħi, imxennqa għal ħżunithom.

⁹Poplu u qassis l-istess jiġrilhom. Jien nikkastiga mġibtu, u għemilu rreġġa’ għal fuqu.

¹⁰Għad jieklu, u ma jixbgħux, jiżnu u ma joktrux. Għax warrbu lill-Mulej, biex marru jgħożżu ż-żina.

¹¹L-inbid ġdid u l-qadim itellfu l-għaqal.

¹²Il-poplu tiegħi jmur jistħarreġ l-għuda tiegħu[19], u l-ħatar tiegħu iħabbarlu; għax l-ispirtu taż-żina tellifhom it-triq, u żnew u tbiegħdu minn Alla tagħhom.

¹³Joffru s-sagrifiċċji fuq il-qċaċet tal-muntanji, u jaħarqu l-inċens fuq l-għoljiet, taħt il-ballut, il-luq u t-terebint, għax dellhom tajjeb. Għalhekk bnietkom jiżnu, u n-nisa ta’ wliedkom adulteri.

¹⁴Ma nikkastigax ’il bnietkom għax jiżnu, lanqas in-nisa ta’ wliedkom għax adulteri. Għax l-irġiel stess iwarrbu man-nisa żienja, u joffru s-sagrifiċċju man-nisa tas-santwarji[20], u hekk jintemm poplu bla għaqal.

¹⁵Jekk żienja int, Iżrael, tħallix ’il Ġuda jaqa’ fil-ħtija. La tmorrux Gilgal[21] u la titilgħux Bet-awen, u la taħilfux: “Daqs kemm hu ħaj il-Mulej.”

¹⁶Bħal għoġla rasha iebsa, webbset rasha Iżrael: Jista’ issa jirgħahom il-Mulej, bħallikieku ħrief fil-mergħat wiesgħa?

¹⁷Efrajm[22] issieħeb mal-allat, erħilu waħdu.

¹⁸Legilgu kemm felħu, u żnew kemm riedu. Ħabbew l-għajb aktar minn ġieħhom.

¹⁹Riefnu għad jaħtafhom taħt ġwinħajh, u huma għad jistħu mill-artali tagħhom.