Read Maltese Bible with DC – IL-BIBBJA IL-KOTBA MQADDSA HOSEGĦA 6 Bible Online

HOSEGĦA 6 - Maltese Bible with DC – IL-BIBBJA IL-KOTBA MQADDSA bible

HOSEGĦA 6

¹“Imxi, ħa nerġgħu lura għand il-Mulej, għax huwa tertaqna, imma se jdewwina, hu sawwat, imma se jinfaxxalna l-ġrieħi.

²Wara jumejn jerġa’ jagħtina l-ħajja, imbagħad fit-tielet jum jerġa’ jqajjimna, sabiex quddiemu ngħixu.

³Nagħrfu l-Mulej, u nfittxu nagħrfuh iżjed, daqs kemm hu żgur is-sebħ, hekk il-ħruġ tiegħu; hu jiġi bħalma tiġi x-xita fuqna, bħax-xita mwaħħra illi ssaqqi l-art.”

⁴U x’naqbad nagħmel jien bik, Efrajm? X’se naqbad nagħmel bik, Ġuda? It-tjieba tagħkom qisha s-sħab tal-għodwa, tixbah lin-nida li tinxtorob kmieni.

⁵Għalhekk inġarthom jiena bil-profeti, u bi kliem fommi qtilthom, u l-ħaqq tiegħi joħroġ qisu dawl.

⁶Għaliex jiena tjieba rrid, mhux sagrifiċċju; li tagħrfu ’l Alla rrid, u mhux vittmi maħruqa.

⁷Iżda huma bħal Adam kisru l-patt, u ma baqgħux fidili lejja.

⁸Gilgħad hi belt ta’ nies li jagħmlu l-ħażen, kollha rfis bid-demm.

⁹Bħal ġemgħa ħallelin jistennew bniedem, qatgħa ta’ qassisin miftiehma, jaqbżu u joqtlu fit-triq ta’ Sikem; għamlu għemil li jkexkex.

¹⁰F’Betel rajt ħwejjeġ li jwaħħxu, hemm Efrajm jagħtiha għaż-żina, u Iżrael jitniġġes.

¹¹Ġuda, għalik ukoll għad inħejji l-ħsad. Kull meta rrid, rraġġa’ x-xorti tal-poplu tiegħi.