Read Maltese Bible with DC – IL-BIBBJA IL-KOTBA MQADDSA HOSEGĦA 7 Bible Online

HOSEGĦA 7 - Maltese Bible with DC – IL-BIBBJA IL-KOTBA MQADDSA bible

HOSEGĦA 7

¹Meta rrid infejjaq lil Iżrael, nsib quddiemi l-ħtija ta’ Efrajm, u l-ħażen ta’ Samarija: qarrieq għemilhom, bħall-ħallelin jidħlu fid-djar, u bħall-briganti jisirqu minn barra.

²Qatt ma jieqfu jaħsbu li jien naf ħżunithom kollha; għemilhom kollu ta’ madwarhom, kollu quddiem għajnejja.

³Bil-ħażen tagħhom iferrħu s-sultan[27], u bil-qerq tagħhom il-prinċpijiet.

⁴Ilkoll mixgħula bl-għadab, bħal forn imkebbes li l-furnar ma jrewwaħlux in-nar, minn xħin jagħġen sakemm l-għaġna togħla.

⁵F’jum is-sultan tagħna, il-prinċpijiet tegħlibhom is-saħna tal-inbid, u hu idu jagħti lin-nies qarrieqa.

⁶Qalbhom bħal forn taħraq bit-tnassis; l-għadab tagħhom billejl jorqod, u mas-sebħ iħeġġeġ bħal nar ilebleb.

⁷Ilkoll mixgħula bħal forn imqabbad, u jikkunsmaw il-mexxejja tagħhom. Is-slaten kollha tagħhom waqgħu, u ħadd minnhom ma sejjaħli.

⁸Efrajm mal-ġnus jitħallat[28], Efrajm bħal ftira mhux imqallba.

⁹Il-barranin kilulu saħħtu, u hu ma ntebaħx. Ix-xagħar abjad ukoll traxxax fuqu, u anqas intebaħ bih.

¹⁰Is-suppervja ta’ Iżrael tixhed kontrih; imma huma ma jerġgħux lura lejn il-Mulej, Alla tagħhom; minkejja dan kollu ma jfittxuhx.

¹¹Efrajm sar qisu ħamiema, belha u bla għaqal; lill-Eġittu jsejjaħ, u lejn l-Assirja jmur.

¹²Huma u sejrin, nifrex ix-xbiek fuqhom, u bħat-tajr tas-sema nniżżilhom; nikkastigahom minħabba ħżunithom.

¹³Gwaj għalihom li ħarbu minni, saħta fuqhom, għax irvellaw kontrija. Jiena kieku nifdihom, imma huma mhux ħlief jigdbu kontrija.

¹⁴Qatt ma sejħuli minn qalbhom, meta joqogħdu jnewħu fuq friexhom. Għall-qamħ u l-inbid iqattgħu ġisimhom[29], u jirvellaw kontrija.

¹⁵Jiena kont li saħħaħtilhom dirgħajhom, imma huma bdew ifasslu l-ħażen kontrija.

¹⁶U jduru lejn ix-xejn, qishom qaws li jfalli. Taħt ix-xabla għad jaqgħu prinċpijiethom, minħabba tlaqliq ilsienhom. Dan ikun l-għajb tagħhom fl-art tal-Eġittu.