Read Maltese Bible with DC – IL-BIBBJA IL-KOTBA MQADDSA HOSEGĦA 8 Bible Online

HOSEGĦA 8 - Maltese Bible with DC – IL-BIBBJA IL-KOTBA MQADDSA bible

HOSEGĦA 8

¹Lejn xufftejk ressaq it-tromba, int li tgħasses fuq dar il-Mulej. Għax kisru l-patt tiegħi, u dinbu kontra l-liġi tiegħi.

²Lili jsejħu u jgħidu: “Aħna nagħrfuk, Alla ta’ Iżrael!”

³Iżrael stmerr it-tajjeb, l-għadu għad jagħmel għal warajh.

⁴Huma ħatru slaten f’Iżrael[30], iżda dan ma kienx ġej minni; għażlu prinċpijiet, bla ma kont naf jien. Il-fidda u d-deheb tagħhom dewbuhom f’idoli għall-qerda tagħhom stess.

⁵Nistmerru l-għoġol tiegħek, Samarija. Il-korla tiegħi xegħlet għalik. Kemm se jdumu wlied Iżrael, bla ħila li jissaffew?

⁶Dak għamlu raġel tas-sengħa; dak mhuwiex Alla. L-għoġol ta’ Samarija għad isir frak.

⁷Ladarba huma jiżirgħu r-riħ, għad jaħsdu r-riefnu. Il-qamħ ma jsebbilx, ma joħroġx dqiq minnu; u jekk isir, jibilgħuh il-barranin.

⁸Iżrael inbala’! Issa qegħdin fost il-ġnus bħal biċċa tagħmir bla ħajr.

⁹Għax huma telgħu l-Assirja, waħdu bħal ħmar selvaġġ; Efrajm kera l-ħbieb.

¹⁰U wkoll jekk isibuhom qalb il-ġnus, jien dalwaqt niġborhom, u jieqfu għal ftit milli jidilku slaten u prinċpijiet.

¹¹Efrajm kattar l-artali biex jidneb, artali biex jidneb[31] saru għalih.

¹²Kieku kelli niktiblu bl-eluf il-liġijiet tiegħi, kieku jqisuhom liġijiet tal-barranin.

¹³Jistgħu joffru l-vittmi u jieklu l-laħam, lill-Mulej ma jogħġbuh xejn. Għad jiftakar fi ħżunithom u ħtijiethom jikkastigahom. Lejn l-Eġittu għad jerġgħu jmorru.

¹⁴Iżrael nesa lil min għamlu, u bena palazzi; Ġuda kattar l-ibliet fortizzi. Imma jien għad nitlaq in-nar fi blietu, u dan jibla’ l-fortizzi tiegħu.