Read Maltese Bible with DC – IL-BIBBJA IL-KOTBA MQADDSA HOSEGĦA 9 Bible Online

HOSEGĦA 9 - Maltese Bible with DC – IL-BIBBJA IL-KOTBA MQADDSA bible

HOSEGĦA 9

¹La tifraħx Iżrael, la taqbiżx bil-ferħ bħall-ġnus. Inti żnejt u tlaqt lil Alla tiegħek, ħabbejt ħlas iż-żina fuq kull qiegħa tal-qamħ[32].

²Il-qiegħa u l-magħsar ma jitimgħuhomx, u l-inbid ġdid għad jonqoshom.

³Ma jibqgħux jgħammru f’art il-Mulej; imma Efrajm jerġa’ jmur lejn l-Eġittu, u ikel imniġġes jieklu fl-Assirja.

⁴Ma jsawbux libazzjonijiet tal-inbid f’ġieħ il-Mulej; lanqas jogħġbuh is-sagrifiċċji tagħhom. Ikilhom bħall-ikel tal-vistu[33], kull min jiekol minnu jitniġġes, ħobżhom jaqtgħalhom il-ġuħ imma ma jidħolx f’dar il-Mulej.

⁵X’se tagħmlu f’jum il-festa, f’jum għid il-Mulej[34]?

⁶Għax, arahom, meta jaħarbu mill-ħerba; jiġborhom l-Eġittu, u Menfi għad tidfinhom. Il-ħurrieq għad jiret il-fided għeżież tagħhom, u l-għollieq jikber fl-għerejjex tagħhom.

⁷Waslu jiem il-kastig, wasal żmien il-ħlas. Ħa jkun jaf Iżrael, jekk hux iblah il-profeta, jew miġnun il-bniedem tar-ruħ! Kbira hi ħżunitek, u bla qjies il-mibegħda tiegħek.

⁸Il-profeta hu l-għassies ta’ Efrajm, il-poplu ta’ Alla tiegħi, imma hemm in-nasba tan-nassab fi triqtu, u l-mibegħda f’dar Alla tiegħi.

⁹Għoddsu sal-qiegħ fi ħżunithom, bħal fi żmien Gibgħa[35]. Imma għad jiftakar fi ħżunithom, u jikkastiga ħtijiethom.

¹⁰Bħall-għeneb fid-deżert sibt lil Iżrael; bħall-bikri tat-tina fl-ewwel żmien tagħha, jien rajt lil missirijietkom. Huma ġew Bagħal-pegħor[36], u kkonsagraw ruħhom lil dak il-mistkerraħ, u sfaw mistkerrha bħal min ħabbew.

¹¹Efrajm bħal għasfur, ġieħhom itir, u jkunu mingħajr wild, bla tqala, bla tnissil.

¹²U mqar jekk irabbu l-ulied, inħallihom bla tfal, sakemm ma jifdal ħadd. Għax tassew, ħażin għalihom meta jien inwarrab minnhom.

¹³Efrajm, kif rajtu, kien bħal Tir, imxettel f’post sabiħ. Imma Efrajm għad joħroġ ’l uliedu għall-qatla.

¹⁴Agħtihom, Mulej, u x’se tagħtihom? Agħtihom ġuf bla frott[37] u isdra niexfa qoxqox.

¹⁵Ħżunithom kollha f’Gilgal[38], u hemm bdejt nistmellhom. Minħabba l-ħażen ta’ għemilhom, minn dari nkeċċihom. Ma nħobbhomx aktar, għax il-prinċpijiet tagħhom kollha rvellaw.

¹⁶Efrajm midrub, għeruqhom niexfa, frott ma jagħmlux. Imqar jekk jildu, jien noqtlilhom l-għożża ta’ ġufhom.

¹⁷Ikeċċihom Alla tiegħi, għax ma semgħux minnu, u jkunu jiġġerrew fost il-ġnus.