Read Maltese Bible with DC – IL-BIBBJA IL-KOTBA MQADDSA ĠOEL 2 Bible Online

ĠOEL 2 - Maltese Bible with DC – IL-BIBBJA IL-KOTBA MQADDSA bible

ĠOEL 2

¹Doqqu t-tromba f’Sijon, semmgħu l-aħbar minn fuq il-muntanja mqaddsa tiegħi! Ħa jitriegħdu dawk kollha li jgħammru fil-pajjiż, għax Jum il-Mulej wasal, għax hu fil-qrib!

²Jum ta’ dlam u ta’ swied, jum ta’ sħab u ta’ ċpar magħqud. Fuq il-muntanji jinfirex bħal sħaba sewda poplu kotran u qawwi, li bħalu ma kien hemm qatt fl-imgħoddi, lanqas ma jkun hemm warajh saż-żminijiet l-aktar imbiegħda.

³Quddiemu jiekol in-nar, warajh iserrpu l-ilsna tan-nar, quddiemu l-pajjiż qisu l-ġnien tal-Għeden, warajh ikun deżert bla ħajja. Xejn ma jkun hemm li jaħrablu.

⁴Id-dehra tiegħu bħal dehra ta’ żwiemel; u bħal żwiemel tal-ġiri, hekk ilebbtu.

⁵Bħal ħsejjes ta’ karrijiet jaqbżu fuq qċaċet il-muntanji, bħat-tfaqqigħ ta’ lsien in-nar iqabbad il-qasbija, bħal armata qawwija mqassma għall-battalja.

⁶Għad-dehra tagħha l-popli jitkexkxu, l-uċuħ kollha jisfaru.

⁷Huma jinxteħtu bħal nies qalbiena, jixxabbtu mas-swar bħal suldati. Kull wieħed minnhom iżomm triqtu, ħadd minnhom ma jitlifha.

⁸Ebda wieħed minnhom ma jross fuq ta’ ħdejh, kull wieħed iżomm il-passi tiegħu; u jinxteħtu qalb l-armi bla ma jwarrbu minn posthom.

⁹Jintefgħu għal fuq is-swar, jixxabbtu mal-ħitan tad-djar, jidħlu mit-twieqi, qishom ħallelin.

¹⁰Quddiemhom l-art titriegħed, is-smewwiet jitqanqlu! Ix-xemx u l-qamar jiddallmu, u l-kwiekeb jitilfu dijiethom!

¹¹U l-Mulej isamma’ leħnu f’ras it-truppi tiegħu. Għax bla għadd qtajjietu, għax hu qawwi dak li jagħmel l-ordni tiegħu, għax Jum il-Mulej hu kbir, tal-biża’ wisq, u min jiflaħ għalih?

¹²“Iżda mqar issa, oraklu tal-Mulej, erġgħu duru lejja b'qalbkom kollha, bis-sawm, bil-biki u bl-ilfiq;

¹³ċarrtu qalbkom, u mhux ilbieskom, u erġgħu duru lejn il-Mulej, Alla tagħkom, għax hu twajjeb u ħanin, tqil biex jinkorla, u kollu tjieba; u jisgħobbih għall-ħażen.

¹⁴Min jaf jerġax jibdielu u jisgħobbih, u jħalli barka wrajh, offerta tal-ikel u tax-xorb lill-Mulej, Alla tagħkom?

¹⁵Doqqu t-tromba f’Sijon! Ordnaw sawma, sejħu laqgħa mqaddsa;

¹⁶iġbru l-poplu, qaddsu l-ġemgħa għajtu x-xjuħ, iġbru t-tfal, u t-trabi tal-ħalib! Ħa joħroġ l-għarus minn ġo kamartu u l-għarusa mill-kmajra tagħha!

¹⁷Bejn il-portiku u bejn l-artal[3] ħa jibku l-qassisin, qaddejja tal-Mulej! U ħa jgħidu: “Ħenn għall-poplu tiegħek, Mulej, u la tħallix il-wirt tiegħek jaqa’ għaż-żebliħ, u jiġi fi lsien il-ġnus! L-għala għandu jingħad fost il-popli: “Fejn hu Alla tagħhom?”

¹⁸U l-Mulej ġietu għira għall-art tiegħu, għader il-poplu tiegħu.

¹⁹Il-Mulej wieġeb u qal lill-poplu tiegħu: “Ara, jiena se nibagħtilkom il-qamħ u l-inbid ġdid u ż-żejt, u jkollkom minnhom bix-xaba’. U ma nħallikomx iżjed taqgħu għaż-żebliħ tal-ġnus.

²⁰Inbiegħed minnkom lil tat-Tramuntana[4] u nixħtu f’post niexef u d-deżert, il-quddiemi tiegħu lejn il-baħar tal-Lvant, u l-warrani lejn il-baħar tal-Punent. U titla’ minnu ntiena, riħa tinten titla’ minnu għax għamel ħsara kbira.”

²¹Tibżax, art, ifraħ u thenna, għax ħwejjeġ kbar għamel il-Mulej!

²²La tibżgħux, bhejjem tar-raba’! Għax il-ħdura tal-kampanja reġgħet nibtet, is-siġar qed jitqalu bil-frott tagħhom, it-tina u d-dielja qed iroddu l-ġid tagħhom.

²³Ulied Sijon, ifirħu, thennew fil-Mulej, Alla tagħkom! Għaliex hu takom ilma bikri kif imiss, bagħtilkom ix-xita bikrija[5], u x-xita mwaħħra, bħal fl-imgħoddi.

²⁴L-andrijiet jimtlew bil-qmuħ, l-imgħasar ifuru bi nbid ġdid u żejt.

²⁵U nerġa’ nagħtikom l-annati li ttieklu mill-ġrad qattiegħ u l-ġrad gerriem, u mill-ġrad qerried u l-ġrad qabbież, l-armata kbira tiegħi, li jien bgħatt kontrikom.”

²⁶U tieklu sewwa u tixbgħu, u tfaħħru isem il-Mulej, Alla tagħkom, li jkun għamel għeġubijiet. Il-poplu tiegħi ma jkollu qatt iżjed mniex jistħi!

²⁷U tagħrfu li jien ninsab f’nofs Iżrael, u li jiena l-Mulej, Alla tagħkom, u m’hemmx ħliefi! U l-poplu tiegħi ma jkollu qatt iżjed mniex jistħi!