Read Maltese Bible with DC – IL-BIBBJA IL-KOTBA MQADDSA GĦAMOS 2 Bible Online

GĦAMOS 2 - Maltese Bible with DC – IL-BIBBJA IL-KOTBA MQADDSA bible

GĦAMOS 2

¹Dan jgħid il-Mulej: “Għal tliet dnubiet ta’ Mowab, erbgħa anzi, ma rreġġax lura kelmti, għax għadam is-sultan[10] ta’ Edom ħarquh irmied;

²nibgħat in-nar f’Mowab, u jeqred il-palazzi ta’ Kerijjot, u Mowab imut fost l-għajjat, u l-għagħa u d-daqq tat-tromba;

³neqred min-nofs ’il min jaħkimha, u miegħu noqtol il-prinċpijiet tagħha kollha,” jgħid il-Mulej.

⁴Dan jgħid il-Mulej: “Għal tliet dnubiet ta’ Ġuda, erbgħa anzi, ma rreġġax lura kelmti, għax huma telqu l-liġi tal-Mulej, u ma ħarsux il-kmandamenti tiegħu; ħarġuhom barra mit-triq l-idoli tagħhom[11], li mxew warajhom missirijiethom;

⁵għalhekk jien nibgħat nar fuq Ġuda, u naħraq il-palazzi ta’ Ġerusalemm.”

⁶Dan jgħid il-Mulej: “Għal tliet dnubiet ta’ Iżrael, erbgħa anzi, ma rreġġax lura kelmti, għax huma biegħu l-bniedem ġust għall-fidda, u l-fqir għal żewġt iqrieq;

⁷saħqu ras l-imsejkna mat-trab tal-art, u għawġu t-triq tal-umli; għax huma jidħlu għand l-istess żagħżugħa, sew l-iben, sew missieru, biex iżebilħu l-isem qaddis tiegħi;

⁸u għax ħdejn kull artal jimteddu fl-art fuq ħwejjeġ mirhunin[12]; u fid-dar ta’ alla tagħhom ilegilgu l-inbid ta’ dawk li huma jimmultaw.

⁹U safrattant kont jien li qridtilhom ġens l-Amurrin, minn quddiemhom, minkejja li kien għoli daqs iċ-ċedri, u l-qawwa tiegħu qawwa tal-ballut. U qridtlu l-frott minn fuqu u sal-għeruq minn taħtu.

¹⁰Kont jien li tellajtkom mill-Eġittu, mexxejtkom erbgħin sena fid-deżert, biex tieħdu art ġens l-Amurrin.

¹¹Kont jien li għażilt profeti minn uliedkom u nażrin miż-żgħażagħ tagħkom. Mhux hekk għamilt magħkom, ulied Iżrael?” jgħid il-Mulej.

¹²“Iżda intom sqejtu l-inbid lin-nażrin, u lill-profeti għedtulhom: ‘Tħabbrulniex!’

¹³Araw, se rrosskom mal-art, kif jintrass ’l isfel karettun mgħobbi bil-qatet.

¹⁴Il-ħafif ma jibqagħlux ħila biex jaħrab, il-qawwi ma jwettaqx saħħtu; lanqas il-qalbieni ma jsalva ħajtu;

¹⁵min jaqbad l-ark ma jiqafx fuq riġlejh, min hu riġlejh ħfief ma jsalvax, lanqas ir-rikkieb ma jsalva ħajtu;

¹⁶u mqar l-aqwa wieħed fost il-qalbiena, ikollu jaħrab għarwien dakinhar,” jgħid il-Mulej.