Read Maltese Bible with DC – IL-BIBBJA IL-KOTBA MQADDSA GĦAMOS 3 Bible Online

GĦAMOS 3 - Maltese Bible with DC – IL-BIBBJA IL-KOTBA MQADDSA bible

GĦAMOS 3

¹Ulied Iżrael, isimgħu din il-kelma, li l-Mulej qal kontrikom, u kontra t-tribujiet kollha, li jien tellajt minn art l-Eġittu. Huwa qal,

²“Mir-razez kollha tal-art ma ridt naf b’ħadd ħliefkom[13]; għalhekk se nikkastigakom minħabba l-ħażen kollu tagħkom.

³Forsi tnejn min-nies se jimxu flimkien jekk ma jiftehmux?

⁴L-iljun se jriegħed fil-foresta jekk ma jsibx il-priża? Il-ferħ tal-ljun se jsamma’ leħnu fl-għar tiegħu jekk ma jkun qabad xejn?

⁵L-għasfur se jaqa’ f’wiċċ l-art, jekk ma jkunx hemm ix-xbiek? Se jinqaleb il-mansab mal-art, jekk ma jkunx hemm x’jaqbad?

⁶Forsi tindaqq it-tromba fil-belt u l-poplu ma jibżax? Se tiġri xi ħsara f’belt, jekk ma jkunx għamilha l-Mulej[14]?

⁷Għax ebda ħaġa ma jagħmel Sidi l-Mulej, jekk ma jurix il-ħwejjeġ moħbija tiegħu lill-qaddejja tiegħu l-profeti.

⁸L-iljun jgħajjat: min ma jibżax? Sidi l-Mulej jitkellem: min ma jħabbarx?”

⁹Ħabbru fil-fortizzi tal-Assirja[15], u fil-palazzi tal-art tal-Eġittu, u għidu: “Inġabru fuq il-muntanji ta’ Samarija u araw: it-taħwid kbir li hemm ġo fiha, il-moħqrijiet f’nofsha.

¹⁰Jagħmlu s-sewwa ma jafux, oraklu tal-Mulej, nies li jrekknu l-vjolenza u s-serq fil-palazzi tagħhom.”

¹¹Għalhekk dan jgħid Sidi l-Mulej: “L-għadu għad idawwarlek artek, ineżżgħek minn qawwietek, u jisraqlek il-palazzi tiegħek.”

¹²Dan jgħid il-Mulej: “Bħalma r-ragħaj jaħtaf minn ħalq l-iljun xi żewġ saqajn jew xi biċċa widna tan-nagħaġ tiegħu, daqshekk jeħilsu minn ulied Iżrael minn dawk li jgħammru f’Samarija, li jixxaħxħu fl-irkejjen tad-divani, u s-sufanijiet ta’ Damasku.”

¹³“Isimgħu u ixhdu kontra dar Ġakobb, oraklu ta’ Sidi l-Mulej, Alla tal-eżerċti:

¹⁴Dakinhar li nikkastiga ’l Iżrael għal dnubietu, nikkastiga wkoll l-artali ta’ Betel, jitqaċċtu l-qrun tal-artal tagħha, u jiġġarrfu fl-art.

¹⁵Naħbat għad-dar tax-xitwa u għad-dar tas-sajf; u jiġġarrfu l-palazzi tal-avorju, u jispiċċaw id-djar il-kbar,” oraklu tal-Mulej.