Read Maltese Bible with DC – IL-BIBBJA IL-KOTBA MQADDSA GĦAMOS 5 Bible Online

GĦAMOS 5 - Maltese Bible with DC – IL-BIBBJA IL-KOTBA MQADDSA bible

GĦAMOS 5

¹Isimgħu din il-kelma, li jien se llissen għalikom, għanja ta’ biki, O Iżrael.

²“Waqgħet biex ma terġax tqum, ix-xbejba ta’ Iżrael. Minxura fl-art, ħadd ma jqajjimha.”

³Għax dan jgħid Sidi l-Mulej: “Il-belt li ħarġet b’elf ruħ, tibqa’ b’mija, u dik li ħarġet b’mija, tibqa’ b’għaxra, għad-dar ta’ Iżrael.”

⁴Għax dan jgħid il-Mulej lil dar Iżrael: “Fittxuni u tgħixu.

⁵La tfittxux lil Betel, la tmorrux f’Gilgal, la tgħaddux lejn Birsaba. Għax Gilgal tittieħed fl-eżilju, u Betel issir ħerba.”

⁶Fittxu lill-Mulej u tgħixu. Li ma joħroġx bħan-nar għal dar Ġużeppi[20], jibla’ kollox u ma jkunx hemm min jitfih, għad-dar ta’ Iżrael.

⁷Intom li tibdlu l-ġustizzja fi mrar, u tixħtu s-sewwa mal-art!

⁸Hu li għamel il-Plejadi u l-Orjon, li jibdel id-dlam fis-sebħ, u l-jiem fil-lejl mudlam; li jsejjaħ ilmijiet il-baħar, u jsawwabhom fuq wiċċ l-art, Jaħweh jismu.

⁹Li jġiegħel tleħħ il-qerda fuq il-qawwi, u l-qerda jġib fuq il-fortizza.

¹⁰Jobogħdu ’l min iwiddeb fil-bieb, u jistmerru ’l min jgħid is-sewwa.

¹¹Għax intom għakkistu l-fqir, u teħdulu t-taxxa minn fuq il-qamħ. Intom bnejtu djar b’ġebel minġur, imma intom fihom ma tgħammrux. Xettiltu oqsma sbieħ tad-dwieli, imma l-inbid ma tixorbuhx.

¹²Għax naf kemm huma dnubietkom, u ħtijietkom kemm huma kbar. Intom tgħakksu l-bniedem sewwa, tieħdu r-rigali, u twarrbu l-ġustizzja mill-imsejknin fil-bieb.

¹³Min hu għaqli jibqa’ sieket fi żmien bħal dan, għax huwa żmien ħażin.

¹⁴Fittxu l-ġid, u mhux id-deni, jekk tridu tgħixu, u l-Mulej, Alla tal-eżerċti, ikun magħkom, bħalma għedtu.

¹⁵Obogħdu d-deni u ħobbu l-ġid, saħħu l-ġustizzja f’bieb il-belt; u l-Mulej Alla tal-eżerċti għandu mnejn iħenn għal fdal Ġużeppi.

¹⁶Għalhekk jgħid il-Mulej, Alla tal-eżerċti, Sidi: “Tinwiħ fil-pjazez kollha, u fit-triqat kollha jgħajtu: ‘Jaħasra! Jaħasra!’ Isejħu lill-bidwi biex isewwed qalbu, u l-bekkejja biex inewħu.

¹⁷Tinwiħ f’kull għalqa tad-dwieli, għax jien se ngħaddi minn ġo nofsok,” jgħid il-Mulej.

¹⁸Jaħasra għalikom li tixtiequ Jum il-Mulej[21]! L-għala triduh Jum il-Mulej? Dlam hu, u mhux dawl.

¹⁹Bħal meta wieħed jaħrab minn quddiem l-iljun, u jiltaqa’ miegħu l-ors, jew jidħol id-dar u jqiegħed idu mal-ħajt, u jigdmu s-serp.

²⁰Jaqaw mhux tassew li Jum il-Mulej dlam u mhux dawl? Mhuwiex swied bla ebda dija?

²¹Il-festi tagħkom sirt nobgħodhom[22] u nistmerrhom, ebda gost ma nsib fil-laqgħat tagħkom.

²²Meta tressquli quddiemi l-offerti tal-ħruq u s-sagrifiċċji tagħkom, ma jogħġbunix, u anqas biss inħares lejn l-offerti tas-sliem tal-bhejjem imsemmna tagħkom.

²³Warrbu minni l-għajjat tal-għana tagħkom, ma rridx nisma’ bid-daqq tal-arpi tagħkom.

²⁴Ħallu l-ġustizzja tgelgel bħall-ilma, u s-sewwa bħal wied ta’ dejjem.

²⁵Ressaqtuli, forsi, vittmi[23] u offerti għall-erbgħin sena fid-deżert, dar ta’ Iżrael?

²⁶Intom iġġorru ’l Sikkut, is-sultan tagħkom[24], u l-kewkba ta’ Kewan, alla tagħkom, l-idoli li intom għamiltu għalikom.

²⁷Imma jien neżiljakom ’l hemm minn Damasku.” Dan jgħid il-Mulej, Alla tal-eżerċti jismu.