Read Maltese Bible with DC – IL-BIBBJA IL-KOTBA MQADDSA GĦAMOS 9 Bible Online

GĦAMOS 9 - Maltese Bible with DC – IL-BIBBJA IL-KOTBA MQADDSA bible

GĦAMOS 9

¹Rajt lil Sidi wieqaf ħdejn l-artal u qalli: “Ħabbat fuq il-kaptelli sa ma jitheżżu l-għatbiet, u ġarrafhom fuq irjus in-nies kollha; min jibqa’ ħaj minnhom neqirdu bix-xabla: ħadd minnhom ma jaħrab, ħadd minnhom ma jeħles.

²Jekk iħaffru f’Qiegħ l-Art, minn hemm taħtafhom idi; jekk jitilgħu fis-smewwiet, minn hemm inniżżilhom;

³jekk jinħbew fuq il-quċċata tal-Karmel, hemm infittixhom, u minn hemm naqbadhom; u jekk jinħbew minn quddiem għajnejja f’qiegħ il-baħar, nordna lis-serp jigdimhom[33];

⁴u jekk imorru fl-eżilju quddiem l-għedewwa tagħhom, hemm nordna lix-xabla toqtolhom: għajnejja jkunu fuqhom għad-deni u mhux għall-ġid.”

⁵U Sidi l-Mulej tal-eżerċti li jmiss l-art u din iddub, u jibku dawk kollha li jgħammru fiha, u togħla bħan-Nil, u terġa’ tinżel bħax-xmara tal-Eġittu;

⁶li jibni l-għamara tiegħu fl-għoli tas-smewwiet, u jwaqqaf fuq l-art is-sisien tal-wesgħa tas-smewwiet; li jsejjaħ l-ilmijiet tal-baħar, u jferragħhom fuq wiċċ l-art: Jaħweh hu ismu.

⁷“Mhux bħal ulied Kus intom għalija[34], ulied Iżrael?” Oraklu tal-Mulej. “Ma ħriġtx jien lil Iżrael mill-Eġittu, u l-Filistin minn Kaftor, u n-nies tas-Sirja minn Kir?

⁸Ara, għajnejn Sidi l-Mulej fuq is-saltna ħatja, u jien neqridha minn wiċċ l-art, iżda ma neqridx għalkollox lil dar Ġakobb,” oraklu tal-Mulej.

⁹“Ara, jiena nordna, u nqalleb lil dar Iżrael fost il-ġnus, bħalma jqallbu t-terrapien f’għarbiel, imma ebda żrara ma taqa’ fl-art.

¹⁰Bix-xabla jmutu l-ħatja kollha fost il-poplu, dawk li jgħidu: ‘Id-deni ma jmissniex, ma jilħaqniex.’

¹¹Dakinhar intalla’ mill-ġdid l-għarix ta’ David[35], li sar ħerba waħda, u rraqqa’ t-tiċrit tiegħu; nerġa’ ntellagħlu dak li ġġarraf minnu, u nibnih kif kien fl-imgħoddi,

¹²biex huma jirtu l-fdal ta’ Edom, u l-ġnus kollha msemmija għalija,” oraklu tal-Mulej li għad jagħmel dan.

¹³“Araw, għad jiġi żmien,” oraklu tal-Mulej, “meta min jaħrat jilħaq fuq min jaħsad, min jagħsar l-għeneb jilħaq fuq min jiżra’; u l-inbid ġdid iqattar mill-muntanji, l-għoljiet kollha jkunu jnixxu minnu.

¹⁴Irreġġa’ l-poplu tiegħi Iżrael għal li kien; jibnu l-ibliet meqruda u jgħammru fihom; iħawlu d-dwieli u jixorbu l-inbid tagħhom; u jxettlu ġonna u jieklu mill-frott tagħhom.

¹⁵U nħawwilhom f’arthom, u qatt iżjed ma jinqalgħu mill-art li tajthom,” jgħid il-Mulej, Alla tiegħek.