Read Maltese Bible with DC – IL-BIBBJA IL-KOTBA MQADDSA ĠONA 1 Bible Online

ĠONA 1 - Maltese Bible with DC – IL-BIBBJA IL-KOTBA MQADDSA bible

ĠONA 1

¹Il-kelma tal-Mulej waslet lil Ġona bin Amittaj[1], u qallu:

²“Qum, mur Ninwè, il-belt il-kbira, u xandrilha li ħżunithom telgħet quddiemi.”

³Imma Ġona qam biex jaħrab lejn Tarsis[2] minn quddiem il-Mulej. Niżel Ġaffa, fejn inzerta ġifen sejjer lejn Tarsis, ħallas il-passaġġ, u telaq fuqu biex imur magħhom f’Tarsis, ’il bogħod mill-Mulej.

⁴Iżda l-Mulej bagħat riefnu fuq il-baħar, u qamet taqliba kbira, hekk li l-ġifen kien għoddu nqasam.

⁵Il-baħrin twerwru, u kull wieħed minnhom beda jgħajjat lill-alla tiegħu; u waddbu l-baħar il-merkanzija li kien hemm fuq il-ġifen, biex iħaffu minn fuqhom. Iżda Ġona niżel isfel nett tal-ġifen, imtedd u raqad fil-fond.

⁶Imbagħad resaq fuqu l-kaptan u qallu: “Int kif int rieqed? Qum, u sejjaħ lil Alla tiegħek! Għandu mnejn Alla jiftakar fina u ma nintilfux!”

⁷Imbagħad bdew jgħidu wieħed lil ieħor: “Ejjew nitfgħu x-xorti, ħa nkunu nafu ta’ min hi l-ħtija li waqa’ fuqna dan l-għawġ kollu.” Tefgħu x-xorti, u x-xorti waqgħet fuq Ġona.

⁸Imbagħad qalulu: “Issa għidilna: ħtija ta’ min ġie fuqna dan il-għawġ? X’inhu xogħlok, minn fejn int ġej, liema hu pajjiżek, u minn liema poplu int?”

⁹“Jien Għebrew,” qalilhom, “u nqim lill-Mulej, Alla tas-sema, li għamel il-baħar u l-art.”

¹⁰Dawk l-irġiel beżgħu biża’ kbir, u qalulu: “Dan għax għamiltu?” Għax billi hu qalilhom kollox, saru jafu li kien ħarab minn quddiem il-Mulej.

¹¹Imbagħad qalulu: “X’se nagħmlu bik, biex il-baħar jikkwitalna?” Għax il-baħar baqa’ jżid.

¹²“Aqbduni u ixħtuni l-baħar,” qalilhom, “u l-baħar jikkwitalkom. Għax naf li din it-tempesta kollha waqgħet fuqkom ħtija tiegħi.”

¹³In-nies armaw jaqdfu biex jerġgħu jaqbdu l-art, iżda ma seħħilhomx, għax it-taqlib tal-baħar baqa’ jżid kontrihom.

¹⁴Għalhekk sejħu l-Mulej u qalu: “Jaħasra, Mulej, nitolbuk li ma tħalliniex nintilfu ħtija tal-ħajja ta’ dan il-bniedem, u twaħħalniex ħatja ta’ demm bla ħtija[3], għax kont int, Mulej, li għamilt kif għoġbok.”

¹⁵U qabdu ’l Ġona u xeħtuh il-baħar, u l-baħar raqqad il-qilla tiegħu.

¹⁶U l-irġiel qabadhom biża’ kbira mill-Mulej, u offrew sagrifiċċji lill-Mulej u għamlu wegħdiet.