Read Maltese Bible with DC – IL-BIBBJA IL-KOTBA MQADDSA ĠONA 2 Bible Online

ĠONA 2 - Maltese Bible with DC – IL-BIBBJA IL-KOTBA MQADDSA bible

ĠONA 2

¹U l-Mulej qabbad ħuta kbira tibla’ ’l Ġona, u Ġona baqa’ tlitt ijiem u tliet iljieli f’żaqq il-ħuta.

²U talab Ġona lill-Mulej, Alla tiegħu, minn żaqq il-ħuta,

³u qal: “Fid-dwejjaq tiegħi lill-Mulej sejjaħt, u hu weġibni; mill-ġuf ta’ Art l-Imwiet krabt għall-għajnuna, u leħni smajtu.

⁴Inti tfajtni fil-qiegħ, ġo nofs il-baħar, u l-wied dar miegħi; l-imwieġ il-kbar u l-ħalel kollha tiegħek għaddew minn fuqi.

⁵U jiena għedt: “Tgerrixt minn quddiem wiċċek: kif nerġa’ nara t-tempju mqaddes tiegħek?”

⁶Dawruni l-ilmijiet sa għoddhom fgawni, l-abbiss dar miegħi, tkebbet ma’ rasi l-alka, f’tarf il-muntanji.

⁷Inżilt ġol-art, madwari l-qofol tagħha dar għal dejjem. Imm’int tellajtli ħajti minn ġol-ħofra, Mulej, Alla tiegħi.

⁸Meta ġo fija kelli ruħi mħeddla, jien fil-Mulej ftakart; u t-talba tiegħi telgħet sa quddiemek, fit-tempju mqaddes tiegħek.

⁹Dawk li jirrispettaw l-idoli fiergħa ikunu qed jarmu t-tjieba tagħhom.

¹⁰Jien, iżda, lilek noffri s-sagrifiċċji, b’leħen ta’ radd il-ħajr, u dak li wegħedt irroddu. Is-salvazzjoni tiġi mill-Mulej.”

¹¹U l-Mulej kellem lill-ħuta, u din xeħtet lil Ġona fuq l-art.