Read Maltese Bible with DC – IL-BIBBJA IL-KOTBA MQADDSA ĠONA 4 Bible Online

ĠONA 4 - Maltese Bible with DC – IL-BIBBJA IL-KOTBA MQADDSA bible

ĠONA 4

¹Iżda dan xejn li xejn m’għoġbu lil Ġona, u nkorla.

²U talab lill-Mulej u qal: “Jaħasra, Mulej, mhux dan kien kliemi meta kont għadni f’pajjiżi? Kien għalhekk li jien għall-ewwel ħrabt lejn Tarsis, għax kont naf li int Alla ħanin u tagħder, tqil biex tinkorla, kollok tjieba u jisgħob bik għad-deni.

³U issa, Mulej, ħudli ħajti, nitolbok, għax għalija aħjar immut milli nibqa’ ħaj!”

⁴U qal il-Mulej: “Dan sewwa għalik li tinkorla?”

⁵Imbagħad Ġona ħareġ mill-belt u qagħad in-naħa tal-Lvant tal-belt; tella’ għalih għarix hemmhekk, u qagħad taħtu, għad-dell, biex jara x’kien se jiġri mill-belt.

⁶U l-Mulej Alla ordna li titla’ siġra tar-riġnu għal Ġona, biex ikollu d-dell fuq rasu u teħilsu mill-ħsara. Ġona feraħ wisq bis-siġra;

⁷imma kif sebaħ l-għada, Alla bagħat dudu li mess is-siġra u din nixfet.

⁸Ġara mbagħad li, kif telgħet ix-xemx, il-Mulej bagħat riħ jaħraq mil-Lvant, ix-xemx qabdet tisreġ fuq ras Ġona, hekk li dan ħassu ħażin u xtaq li jmut, u qal: “Għalija aħjar immut milli nibqa’ ħaj!”

⁹U qal Alla lil Ġona: “Dan sewwa għalik li tinkorla għas-siġra?” Iżda hu wieġeb: “Iva, sewwa li nkurlajt sal-mewt.”

¹⁰Imbagħad qallu l-Mulej: “Inti ġietek ħasra mis-siġra tar-riġnu, li la tħabatt għaliha u lanqas kabbartha int, u li f’lejl wieħed ġiet u f’lejl wieħed marret.

¹¹Mela jiena ma kellix tiġini ħasra minn Ninwè[4], il-belt il-kbira fejn hemm aktar minn mija u għoxrin elf ruħ li ma jafux jagħżlu bejn il-lemin u x-xellug tagħhom, u fejn hemm ukoll ħafna bhejjem?”