Read Maltese Bible with DC – IL-BIBBJA IL-KOTBA MQADDSA NUMRI 1 Bible Online

NUMRI 1 - Maltese Bible with DC – IL-BIBBJA IL-KOTBA MQADDSA bible

NUMRI 1

¹Il-Mulej kellem lil Mosè fid-deżert tas-Sinaj, fit-tinda tal-laqgħa, fl-ewwel jum tat-tieni xahar, fit-tieni sena mill-ħruġ tagħhom mill-art tal-Eġittu u qallu:

²“Għoddu l-ġemgħa kollha ta’ Iżrael skont il-familji u d-djar ta’ missirijietkom, u għoddu l-irġiel kollha, wieħed wieħed, b’isimhom,

³minn għoxrin sena ’l fuq, ’il dawk kollha fost Iżrael tajbin għall-gwerra. Tgħodduhom qatgħa qatgħa, int u Aron.

⁴Magħkom ikun hemm ukoll wieħed minn kull tribù, li jkun il-kap ta’ dar missirijietu.

⁵“Dawn huma l-ismijiet tal-irġiel li joqogħdu magħkom: Elisur bin Sedewr mit-tribù ta’ Ruben;

⁶Selumjel bin Surisaddaj mit-tribù ta’ Simgħon;

⁷Naħson bin Għamminadab mit-tribù ta’ Ġuda;

⁸Natanjel bin Sugħar mit-tribù ta’ Issakar;

⁹Elijab bin Ħelon mit-tribù ta’ Żebulun;

¹⁰Elisama bin Għammiħud mit-tribù ta’ Efrajm u Gamaljel bin Pedaħsur mit-tribù ta’ Manassi, ulied Ġużeppi;

¹¹Abidan bin Gidegħoni mit-tribù ta’ Benjamin;

¹²Aħigħeżer bin Għammisaddaj mit-tribù ta’ Dan;

¹³Paggħijel bin Għokran mit-tribù ta’ Aser;

¹⁴Eljasaf bin Degħwel mit-tribù ta’ Gad;

¹⁵Aħira bin Għenan mit-tribù ta’ Naftali.”

¹⁶Dawn kienu l-magħżulin fost il-ġemgħa, il-prinċpijiet tat-tribujiet ta’ missirijiethom, il-kapijiet tal-eluf ta’ Iżrael[1].

¹⁷Mosè u Aron ħadu lil dawn in-nies li semmew b’isimhom,

¹⁸u sejħu lill-ġemgħa kollha fl-ewwel jum tat-tieni xahar, u għaddew u kitbu b’isimhom lil dawk kollha li kellhom minn għoxrin sena ’l fuq, wieħed wieħed, skont il-familji u d-djar ta’ missirijiethom.

¹⁹Għaddhom Mosè fid-deżert tas-Sinaj, kif kien ordnalu l-Mulej.

²⁰Għaddew in-nisel ta’ Ruben, l-iben il-kbir ta’ Iżrael: il-lista tat-tribù ta’ Ruben magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

²¹kienet tgħodd sitta u erbgħin elf u ħames mitt ruħ.

²²Għaddew in-nisel ta’ Simgħon: magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

²³kienet tgħodd disgħa u ħamsin elf u tliet mitt ruħ.

²⁴Għaddew in-nisel ta’ Gad: il-lista tat-tribù ta’ Gad, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

²⁵kienet tgħodd ħamsa u erbgħin elf u sitt mija u ħamsin ruħ.

²⁶Għaddew in-nisel ta’ Ġuda: il-lista tat-tribù ta’ Ġuda, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

²⁷kienet tgħodd erbgħa u sebgħin elf u sitt mitt ruħ.

²⁸Għaddew in-nisel ta’ Issakar: il-lista tat-tribù ta’ Issakar, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

²⁹kienet tgħodd erbgħa u ħamsin elf u erba’ mitt ruħ.

³⁰Għaddew in-nisel ta’ Żebulun: il-lista tat-tribù ta’ Żebulun, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

³¹kienet tgħodd sebgħa u ħamsin elf u erba’ mitt ruħ.

³²Għaddew in-nisel ta’ Ġużeppi: il-lista tat-tribù ta’ Efrajm, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

³³kienet tgħodd erbgħin elf u ħames mitt ruħ;

³⁴u l-lista tat-tribù ta’ Manassi, magħduda wieħed wieħed skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

³⁵kienet tgħodd tnejn u tletin elf u mitejn ruħ.

³⁶Għaddew in-nisel ta’ Benjamin: il-lista tat-tribù ta’ Benjamin, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

³⁷kienet tgħodd ħamsa u tletin elf u erba’ mitt ruħ.

³⁸Għaddew in-nisel ta’ Dan: il-lista tat-tribù ta’ Dan, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

³⁹kienet tgħodd tnejn u sittin elf u seba’ mitt ruħ.

⁴⁰Għaddew in-nisel ta’ Aser: it-tribù ta’ Aser, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

⁴¹kienet tgħodd wieħed u erbgħin elf u ħames mitt ruħ.

⁴²Għaddew it-tribù ta’ Naftali: il-lista tat-tribù ta’ Naftali, magħduda wieħed wieħed, skont il-familji u d-djar ta’ missirijiethom, bl-isem ta’ kull raġel minn għoxrin sena ’l fuq, tajjeb għall-gwerra,

⁴³kienet tgħodd tlieta u ħamsin elf u erba’ mitt ruħ.

⁴⁴Dawn kienu l-listi li għamlu Mosè u Aron u t-tnax-il prinċep ta’ Iżrael, wieħed għal kull dar.

⁴⁵L-għadd kollu ta’ wlied Iżrael magħdudin skont id-djar ta’ missirijiethom, l-irġiel minn għoxrin sena ’l fuq, tajbin għall-gwerra,

⁴⁶kien jilħaq sitt mija u tlitt elef, ħames mija u ħamsin ruħ.

⁴⁷Il-Leviti[2] ma għaddewhomx magħhom skont id-djar ta’ missirijiethom,

⁴⁸għax il-Mulej kien kellem lil Mosè u qallu:

⁴⁹“Biss it-tribù ta’ Levi tagħmilx lista tiegħu u tgħoddux ma’ wlied Iżrael.

⁵⁰Ħalli fi ħsieb il-Leviti t-tabernaklu tax-xhieda miktuba, u t-tagħmir kollu tiegħu, u kulma hemm fih. Huma jġorru t-tabernaklu u t-tagħmir tiegħu kollu; iservu fit-tabernaklu u jwaqqfu t-tined tagħhom madwar it-tabernaklu.

⁵¹Kull meta jenħtieġ iġorru t-tabernaklu, għandhom iħottuh il-Leviti; u meta jkun jenħtieġ iwaqqfu t-tabernaklu, jarmawh il-Leviti; kull profan li jersaq jagħtuh il-mewt.

⁵²“Ulied Iżrael iwaqqfu l-kampijiet tagħhom, kulħadd f’postu, kulħadd taħt l-istendard tiegħu, qatgħa qatgħa.

⁵³Iżda l-Leviti jwaqqfu t-tined tagħhom madwar it-tabernaklu tax-xhieda miktuba biex ma tiġri ebda ħsara lil ulied Iżrael, u l-Leviti jgħassu mat-tabernaklu tax-xhieda miktuba.”

⁵⁴Ulied Iżrael għamlu kulma ordna l-Mulej lil Mosè, kollox kif kien ordnalu.