Read Maltese Bible with DC – IL-BIBBJA IL-KOTBA MQADDSA NUMRI 11 Bible Online

NUMRI 11 - Maltese Bible with DC – IL-BIBBJA IL-KOTBA MQADDSA bible

NUMRI 11

¹Ġara li l-poplu beda jgemgem u jsemma’ l-ilmenti tiegħu lill-Mulej. U l-Mulej semagħhom, u xegħel bil-qilla, u bagħtilhom in-nar, u ħarqilhom it-truf tal-kamp.

²U l-poplu għajjat lil Mosè, u dan talab għalihom lill-Mulej, u n-nar intefa.

³U dak il-post semmewh Tabgħera għax qabad ġo nofshom nar il-Mulej.

⁴U dik il-qabda nies li kienet magħhom kienet mikluba għall-ikel, u wlied Iżrael ukoll bdew jibku u jgħidu: “Min se jitmagħna l-laħam?

⁵Niftakru l-ħut li konna nieklu fl-Eġittu b’xejn; il-ħjar, il-bettieħ, il-kurrat, il-basal, u t-tewm.

⁶U issa bil-ġuħ; għajnejna ma jarawx ħlief il-manna.”

⁷U l-manna kienet tixbah iż-żerriegħa tal-kożbor, u lewn ir-raża.

⁸Il-poplu kien jixtered jiġborha, u jlaqqtuha, u mbagħad jitħnuha bil-mitħna, jew jisħquha fil-mehrież. Kienu jsajruha fil-borma u jagħmluha ftajjar; u t-togħma tagħha kienet bħal tal-għaġina maħduma biż-żejt.

⁹U meta billejl kienet taqa’ n-nida fuq il-kamp, kienet taqa’ magħha l-manna wkoll.

¹⁰Mosè sama’ l-poplu jibki, familja familja, kulħadd f’bieb it-tinda tiegħu. Il-Mulej xegħel b’qilla kbira, u Mosè inkwieta.

¹¹U Mosè staqsa lill-Mulej: “Għala inkwetajt il-qaddej tiegħek? Jaqaw ma sibtx grazzja quddiemek, biex għabbejtni bil-piż ta’ dan il-poplu?

¹²Forsi jien ġibt f’ġufi dan il-poplu kollu? Forsi wellidtu jien biex tgħidli: Ġorru fi ħdanek bħalma l-imraddgħa ġġorr tarbija fi ħdanha, sakemm twasslu fl-art li int ħlift li tagħtiha lil missirijiethom?

¹³Mnejn se nġib jien il-laħam biex nagħtih lill-poplu kollu, li qegħdin jibkuli u jgħiduli: ‘Agħtina laħam x’nieklu.’

¹⁴Ma niflaħx jien waħdi l-piż ta’ dan il-poplu kollu; tqil wisq għalija!

¹⁵Jekk int se timxi hekk miegħi, oqtolni, jekk sibt grazzja quddiemek, u ma narax id-deni tiegħi.”

¹⁶U l-Mulej qal lil Mosè: “Iġborli sebgħin mill-anzjani ta’ Iżrael li int taf li huma xjuħ u għandhom il-ħila li jiggvernaw, u laqqagħhom fit-tinda tal-laqgħa, u hemm joqogħdu miegħek.

¹⁷U jien ninżel u nitkellem miegħek hemmhekk, u nieħu mill-ispirtu li hemm fik, u nqiegħdu fihom, u huma jaqsmu miegħek il-piż ta’ dan il-poplu, u ma terfgħux int waħdek.

¹⁸“Imbagħad tgħid lill-poplu: Tqaddsu għall-għada, u intom tieklu l-laħam, għaliex il-biki tagħkom wasal f’widnejn il-Mulej meta intom għedtu: Min se jitmagħna l-laħam? Kemm konna sewwa fl-Eġittu! Il-Mulej se jagħtikom laħam x’tieklu.

¹⁹Ma jkollkomx x’tieklu għal jum wieħed, anqas għal jumejn, anqas għal ħamsa, anqas għal għaxra, u anqas għal għoxrin biss,

²⁰imma għal xahar sħiħ, sakemm joħroġ minn imnifsejkom u jdardarkom, għax stmellejtu lill-Mulej li qiegħed f’nofskom, u bkejtu quddiemu u għedtu: ‘Għalfejn ħariġna mill-Eġittu?’ ”

²¹U Mosè wieġeb: “Sitt mitt elf raġel fih dan il-poplu li jien ġo nofsu! U inti tgħidli, ‘Agħtihom jieklu l-laħam għal xahar sħiħ!’

²²Se jkun biżżejjed għalihom jekk noqtlu n-nagħaġ u l-baqar? Jekk niġbru l-ħut kollu tal-baħar ikun biżżejjed?”

²³U l-Mulej wieġeb lil Mosè: “Jaqaw ma tlaħħaqx id il-Mulej; issa tara jekk isseħħlekx il-kelma tiegħi.”

²⁴U Mosè ħareġ, u kellem lill-poplu u qalilhom kliem il-Mulej, u ġabar is-sebgħin raġel mill-anzjani tal-poplu u qegħedhom madwar it-tinda.

²⁵Il-Mulej niżel fi sħaba jkellem lil Mosè, u ħa mill-ispirtu li kellu fih, u tah lis-sebgħin xiħ; u ġara li, hekk kif l-ispirtu qagħad fuqhom, bdew jipprofetizzaw, imma ma ssuktawx[9].

²⁶Issa fil-kamp kien baqa’ żewġt irġiel, wieħed jismu Eldad u l-ieħor Medad, u fuqhom ukoll niżel l-ispirtu. Hekk dawn ġew magħduda mal-magħżulin għax, għalkemm ma marrux fit-tinda, bdew jipprofetizzaw fil-kamp.

²⁷Dlonk mar wieħed żagħżugħ jgħarraf b’dan lil Mosè, u qallu: “Eldad u Medad qegħdin jipprofetizzaw fil-kamp.”

²⁸U Ġożwè bin Nun, li minn ċkunitu kien qaddej ta’ Mosè, qabad u qal: “Sidi Mosè, tħallihomx aktar.”

²⁹Iżda Mosè wieġbu: “Jaqaw qiegħed tgħir minħabba fija? Jalla l-poplu tal-Mulej ikun kollu profeti, u jalla l-Mulej iqiegħed fuqhom l-ispirtu tiegħu!”

³⁰Imbagħad Mosè nġabar fil-kamp, hu u x-xjuħ ta’ Iżrael.

³¹U l-Mulej qajjem riħ, li ġarr quddiemu s-summien mill-baħar lejn il-kamp u xerridhom mal-kamp fuq medda ta’ jum mixi minn naħa u medda ta’ jum mixi min-naħa l-oħra, dawramejt, f’għoli ta’ dirgħajn minn fuq wiċċ l-art.

³²U l-poplu għadda l-jum sħiħ u l-lejl kollu u l-għada kollu jiġbor is-summien, u l-inqas li wieħed ġabar kien għaxart igzuz. Imbagħad ferrxuhom madwar il-kamp.

³³Kien għad għandhom il-laħam bejn snienhom, u anqas kienu għadhom kiluh, meta l-Mulej inkorla għall-poplu u laqtu b’qerda kbira.

³⁴U semmew dak il-post: Kibrotħattawa, għaliex hemm difnu ’l dawk li mietu bil-klubija li kellhom għall-ikel.

³⁵Imbagħad il-poplu telaq minn Kibrotħattawa għal Ħaserot u waqaf hemm.