Read Maltese Bible with DC – IL-BIBBJA IL-KOTBA MQADDSA NUMRI 22 Bible Online

NUMRI 22 - Maltese Bible with DC – IL-BIBBJA IL-KOTBA MQADDSA bible

NUMRI 22

¹U wlied Iżrael telqu u waqqfu l-kamp fil-wita ta’ Mowab[32], in-naħa l-oħra tal-Ġordan, biswit Ġeriko.

²Balak bin Siffur ra kulma kien għamel Iżrael lill-Amurrin,

³u Mowab beża’ quddiem dik il-kotra ta’ poplu; u Mowab twerwer quddiem ulied Iżrael.

⁴U Mowab qal lix-xjuħ ta’ Midjan: “Issa din il-kotra tibla’ l-inħawi kollha ta’ madwarna, bħalma l-gendus jibla’ l-ħdura tar-raba’.” Balak bin Siffur dik il-ħabta kien sultan ta’ Mowab.

⁵U bagħat messaġġiera għand Balgħam bin Begħor[33] f’Petor, li qiegħda fl-art ta’ wlied Għammaw, ħdejn ix-xmara, isejħulu u jgħidulu: “Ara! Poplu ħareġ mill-Eġittu, u kesa l-art, u diġà qiegħed jgħammar qrib tiegħi,

⁶u issa ejja u isħet lil dan il-poplu, għax jiflaħ aktar minni, biex jien inkun nista’ nkissru u nkeċċih ’il barra mill-art. Jien naf li kulma tbierek int, ikun imbierek, u kulma tisħet int, ikun misħut.”

⁷U x-xjuħ ta’ Mowab u x-xjuħ ta’ Midjan marru bil-ħlas tal-magħmul f’idejhom. U ġew għand Balgħam, u qalulu kulma qalilhom Balak.

⁸U qalilhom: “Għaddu l-lejl hawnhekk, u jien inweġibkom skont ma jgħidli l-Mulej.” U l-prinċpijiet ta’ Mowab qagħdu ma’ Balgħam.

⁹U Alla ġie għand Balgħam u qallu: “Min huma dawn in-nies li hawn għandek?”

¹⁰U Balgħam wieġeb lil Alla: “Balak bin Siffur, is-sultan ta’ Mowab, bagħat jgħidli:

¹¹Ara! Hawn hu l-poplu li ħareġ mill-Eġittu u kesa wiċċ l-art. Ejja malajr u isħethuli ħalli nkun nista’ niġġilidlu u nkeċċih.”

¹²U Alla qal lil Balgħam: “Tmurx magħhom, tisħetx lil dak il-poplu, għax hu mbierek.”

¹³U Balgħam qam filgħodu u qal lill-prinċpijiet ta’ Balak: “Morru lejn pajjiżkom, għax il-Mulej ma jridx iħallini niġi magħkom.”

¹⁴U l-prinċpijiet ta’ Mowab qamu u marru għand Balak, u qalulu: “Balgħam ma jridx jiġi magħna.”

¹⁵U Balak raġa’ bagħat prinċpijiet aktar u ogħla minnhom.

¹⁶U ġew għand Balgħam u qalulu: “Dan jgħid Balak bin Siffur: Tħallix xi jżommok milli tiġi għandi.

¹⁷Nimliek bil-ġid, u nagħmel kulma tgħidli. Ejja isħetli ’l dan il-poplu.”

¹⁸U Balgħam wieġeb u qal lill-qaddejja ta’ Balak: “Imqar jekk Balak jagħtini l-fidda u d-deheb b’kemm tasa’ daru, jien ma stajtx nikser il-kelma tal-Mulej Alla tiegħi, u nagħmel xi ħaġa, la kbira u la żgħira.

¹⁹Imma għaddu l-lejl intom ukoll, u nara xi jgħidli aktar il-Mulej.”

²⁰U Alla ġie għand Balgħam billejl u qallu: “La darba ġew dawn in-nies ifittxuk, qum u mur magħhom, iżda qis li tagħmel biss dak li ngħidlek jien.”

²¹U Balgħam qam filgħodu, xedd il-ħmara tiegħu, u telaq mal-prinċpijiet ta’ Mowab.

²²Il-Mulej inkorla għaliex mar; u l-anġlu tal-Mulej waqaf quddiemu u għalaqlu t-triq. Balgħam kien riekeb fuq il-ħmara, u miegħu kellu żewġ qaddejja.

²³Kif il-ħmara rat l-anġlu tal-Mulej wieqaf fit-triq bix-xabla misluta f’idu, ilwiet mit-triq u marret fir-raba’. Balgħam beda jsawwatha biex jerġa’ jġibha fit-triq.

²⁴U l-anġlu tal-Mulej qagħad f’mogħdija dejqa bejn id-dwieli, bejn żewġ ħitan, wieħed f’naħa u l-ieħor f’oħra.

²⁵U l-ħmara rat l-anġlu tal-Mulej u trasset mal-ħajt, u rasset riġel Balgħam mal-ħajt, u dan raġa’ beda jsawwatha.

²⁶U l-anġlu tal-Mulej raġa’ qabiżhom u waqaf f’post dejjaq li ma kienx hemm mogħdija ’l fejn tilwi, la lejn il-lemin u lanqas lejn ix-xellug.

²⁷U l-ħmara rat l-anġlu tal-Mulej u għotrot taħt Balgħam; u Balgħam inkorla għaliha u raġa’ beda jagħtiha bil-ħatar.

²⁸U l-Mulej fetaħ fomm il-ħmara, u din qalet lil Balgħam: “X’għamiltlek? Diġà sawwattni tliet darbiet!”

²⁹U Balgħam qal lill-ħmara: “Għax qiegħda tgħaddi ż-żmien bija? Li kelli xabla f’idi kont noqtlok issa stess.”

³⁰U l-ħmara wieġbet lil Balgħam: “M’iniex jien il-ħmara tiegħek, li int dejjem irkibt sal-lum? Għandi forsi d-drawwa li nagħmillek hekk?” U wieġeb: “Le.”

³¹U l-Mulej fetaħ għajnejn Balgħam, u ra l-anġlu tal-Mulej wieqaf fit-triq bix-xabla misluta f’idu; u baxxa rasu u nxteħet wiċċu fl-art.

³²U l-anġlu tal-Mulej qallu: “Għaliex sawwatt il-ħmara s’issa tliet darbiet? Arani, jien ħriġt biex nagħlaqlek it-triq, għax għalija t-triq li int qbadt hi ħażina.

³³Il-ħmara ratni u lwiet minn quddiemi tliet darbiet. Li kieku ma lwietx, kieku bħalissa diġà qtiltek, u ħallejt lilha ħajja.”

³⁴U Balgħam wieġeb lill-anġlu tal-Mulej: “Dnibt, għaliex ma għaraftx li int kont wieqaf fit-triq quddiemi. Issa jekk hemm xi ħaġa ħażina f’għajnejk, nerġa’ lura.”

³⁵U l-anġlu tal-Mulej qal lil Balgħam: “Mur ma’ dawn in-nies, iżda għidilhom biss li ngħidlek jien.” U Balgħam mar mal-prinċpijiet ta’ Balak.

³⁶U Balak sama’ li Balgħam kien wasal, u ħareġ jilqgħu fil-belt ta’ Għir-mowab li qiegħda fuq il-fruntiera tal-Arnon, f’tarf il-fruntiera.

³⁷U Balak qal lil Balgħam: “Ma bgħattx insejjaħlek? Għaliex ma ġejtlix? Jaqaw ma nistax nimliek bil-ġieħ?”

³⁸U Balgħam wieġeb lil Balak: “Arani, jien ġejt għandek; nista’ ngħid xi ħaġa minn rajja? Ngħid dak li l-Mulej iqiegħed fuq xufftejja.”

³⁹U Balgħam telaq ma’ Balak, u waslu Kirjat-ħusot.

⁴⁰Balak offra sagrifiċċji gniedes u nagħaġ, u bagħat minnhom lil Balgħam u lill-prinċpijiet li kienu miegħu.

⁴¹L-għada filgħodu Balak qabad lil Balgħam u tellgħu fuq Bamot-bagħal, mnejn seta’ jara sa tarf il-poplu.