Read Maltese Bible with DC – IL-BIBBJA IL-KOTBA MQADDSA NUMRI 23 Bible Online

NUMRI 23 - Maltese Bible with DC – IL-BIBBJA IL-KOTBA MQADDSA bible

NUMRI 23

¹U Balgħam qal lil Balak: “Ibnili hawn seba’ artali, u lestili seba’ għoġiela u seba’ mtaten.”

²U Balak għamel kif qallu Balgħam. U Balgħam u Balak offrew għoġol u muntun fuq kull artal;

³u Balgħam qal lil Balak: “Int oqgħod ħdejn is-sagrifiċċju tiegħek, u jien nitbiegħed; għandu mnejn jiġi l-Mulej jiltaqa’ miegħi, u ngħidlek kulma jurini.” U telaq lejn għolja għerja.

⁴U l-Mulej ġie jiltaqa’ miegħu, u Balgħam qallu: “Jien lestejt seba’ artali, u offrejt għoġol u muntun fuq kull artal.”

⁵U l-Mulej qiegħed dan il-kliem fuq fomm Balgħam u qallu: “Erġa’ lura lejn Balak u għidlu li ngħidlek jien.”

⁶U raġa’ mar ħdejh u sabu wieqaf ħdejn is-sagrifiċċju tiegħu, hu u l-prinċpijiet kollha ta’ Mowab, u

⁷beda jitkellem u jgħid: “Minn Aram[34] ġiebni Balak, is-Sultan ta’ Mowab mill-għoljiet tal-Lvant[35]: ‘Ejja u isħetli lil Ġakobb; Ejja u idgħili lil Iżrael.’

⁸Kif nista’ nisħet lil min Alla ma seħtux? u kif nidgħi lil min Alla ma dgħalux?

⁹Minn fuq il-qċaċet tal-blat qiegħed narah; nħares lejh minn fuq l-għoljiet. Dan poplu jgħammar waħdu[36]; mal-ġnus ma jitħallatx.

¹⁰Min għaddu trab Ġakobb[37], u min jgħodd ir-ramel ta’ Iżrael? Jalla mmut bħalma jmut il-ġust, u tmiemi jkun bħal tmiemu.”

¹¹Imbagħad Balak qal lil Balgħam: “X’għamiltli! Jien ġibtek biex tisħetli l-għedewwa tiegħi, u issa int qiegħed tberikhom!”

¹²U wieġbu: “Mhux il-kliem li jqegħedli l-Mulej fuq fommi għandi nqis li ngħid?”

¹³U Balak qallu: “Ejja miegħi post ieħor mnejn tista’ tarahom. Tarf biss minnu tista’ tara, ma tarahx kollu, u isħethuli minn hemm.”

¹⁴Ħadu fil-wita ta’ Sofim fuq il-quċċata tal-Pisga, u bena hemm seba’ artali, u offra għoġol u muntun fuq kull artal.

¹⁵U qal lil Balak: “Oqgħod wieqaf ħdejn is-sagrifiċċju tiegħek, u jien ikolli laqgħa hemm.”

¹⁶U l-Mulej iltaqa’ ma’ Balgħam, u qegħedlu dan il-kliem fuq fommu, u qallu: “Erġa’ lura u mur għand Balak, u għidlu li se ngħidlek.”

¹⁷U ġie ħdejh, u sabu wieqaf ħdejn is-sagrifiċċju, u l-prinċpijiet ta’ Mowab miegħu. U Balak staqsieh: “X’jgħid il-Mulej?”

¹⁸U Balgħam raġa’ beda jitkellem u jgħid: “Qum Balak u isma’; agħtini widen bin Siffur.

¹⁹Alla mhux bniedem biex jigdeb; anqas bin Adam biex jibdielu. Forsi jgħid u ma jagħmilx? jitkellem, u ma jżommx kelmtu?

²⁰Arani! Ordnali nbierek. Hu bierek, u jiena ma nistax il-barka reġġa’ lura!

²¹Ebda deni ma sab f’Ġakobb; u ebda ħażen ma ra f’Iżrael. Il-Mulej, Alla tiegħu, miegħu; sultan milqugħ b’għajjat ta’ ferħ.

²²Bħalma huma l-qrun[38] għall-gendus selvaġġ, hekk għalihom Alla, li ħariġhom mill-Eġittu.

²³Ma hemmx seħer kontra Ġakobb; ma hemmx magħmul kontra Iżrael. Issa huwa l-waqt li jgħidu minn Ġakobb u Iżrael: ‘Araw Alla x’għamel!’

²⁴Araw hawn poplu! Bħal iljun iqum, bħal iljun jieqaf fuq riġlejh; ma jistrieħx qabel ma jqarmeċ il-priża, qabel ma jixrob demm il-maqtulin.”

²⁵U Balak qal lil Balgħam: “Tisħtu xejn. Jekk int m’intix se tisħtu, anqas m’għandek tbierku.”

²⁶U Balgħam wieġeb lil Balak: “Ma kellimtekx u għedtlek li jien nagħmel dak li jgħidli l-Mulej?”

²⁷U Balak qal lil Balgħam: “Ejja nieħdok naħa oħra, għandu mnejn Alla jogħġbu li tisħethuli minn hemm.”

²⁸U Balak ħa lil Balgħam fuq il-quċċata ta’ Pegħor, li tħares lejn id-deżert.

²⁹U Balgħam qal lil Balak: “Ibnili hawn seba’ artali, u lestili seba’ għoġiela u seba’ mtaten.”

³⁰U Balak għamel kif ordnalu Balgħam, u offra għoġol u muntun fuq kull artal.